Ind Vs Aus: பிரிஸ்பேனிலும் இந்திய அணிக்கு வில்லனாக அமைந்த மழை.. டி20 தொரை கைப்பற்றிய இந்தியா..

இந்தியா, ஆஸ்திரேலியா இடையேயான 5வது மற்றும் கடைசி டி20 கிரிக்கெட் போட்டி மழையால் கைவிடப்பட்ட நிலையில் டி20 தொடரை இந்திய அணி 2 - 1 என்ற கணக்கில் கைப்பற்றி அசத்தி உள்ளது.

இந்தியா - ஆஸ்திரேலியா டி20 தொடரின் ஐந்தாவது மற்றும் கடைசிப் போட்டி மழையால் கைவிடப்பட்டது. டாஸ் தோற்று முதலில் பேட்டிங் செய்த இந்திய அணி, 4.5 ஓவர்களில் விக்கெட் இழப்பின்றி 52 ரன்கள் எடுத்திருந்தபோது மழை குறுக்கிட்டதால் ஆட்டம் நிறுத்தப்பட்டது. சுப்மன் கில் 16 பந்துகளில் 29 ரன்களுடனும், அபிஷேக் ஷர்மா 13 பந்துகளில் 23 ரன்களுடனும் களத்தில் இருந்தனர். பின்னர் மழை தொடர்ந்ததால், ஆட்டத்தை மீண்டும் தொடங்க முடியவில்லை. இதனால், போட்டி கைவிடப்பட்டதாக அறிவிக்கப்பட்டது. இந்தியாவின் அபிஷேக் ஷர்மா தொடர் நாயகனாக தேர்வு செய்யப்பட்டார்.

ஐந்து போட்டிகள் கொண்ட இந்தத் தொடரின் முதல் போட்டியும் மழையால் கைவிடப்பட்டது. இதன்மூலம், தொடரில் இரண்டு போட்டிகளில் வென்ற இந்திய அணி, 2-1 என்ற கணக்கில் டி20 தொடரைக் கைப்பற்றியது. ஆஸ்திரேலியாவுக்கு எதிராக இந்தியா பெறும் தொடர்ச்சியான மூன்றாவது டி20 தொடர் வெற்றி இதுவாகும். முன்னதாக 2023-24 மற்றும் 2022-ல் இந்தியாவில் நடைபெற்ற டி20 தொடர்களை இந்தியா முறையே 4-1 மற்றும் 2-1 என்ற கணக்கில் வென்றிருந்தது. 2020-21க்குப் பிறகு ஆஸ்திரேலிய மண்ணில் இந்தியா பெறும் முதல் டி20 தொடர் வெற்றி இதுவாகும். தொடரின் முதல் போட்டி மழையால் கைவிடப்பட்ட நிலையில், இரண்டாவது போட்டியில் ஆஸ்திரேலியா வென்றது. மூன்று மற்றும் நான்காவது போட்டிகளில் வென்று இந்தியா 2-1 என தொடரைக் கைப்பற்றியது.

இந்தியாவின் அதிரடி தொடக்கம், சொதப்பிய ஆஸ்திரேலியா

ஐந்தாவது போட்டியில் டாஸ் தோற்று பேட்டிங் செய்ய களமிறங்கிய இந்தியா, முதல் ஓவரிலிருந்தே அதிரடியைத் தொடங்கியது. பென் ட்வார்ஷூயிஸின் நான்காவது பந்தை பவுண்டரிக்கு விரட்டிய அபிஷேக் ஷர்மா, அடுத்த பந்தில் கொடுத்த எளிதான கேட்சை கிளென் மேக்ஸ்வெல் தவறவிட்டார். அடுத்த பந்தையும் பவுண்டரிக்கு விரட்டி, முதல் ஓவரிலேயே இந்தியாவை 11 ரன்களுக்கு கொண்டு சென்றார் அபிஷேக். பின்னர் அபிஷேக் சற்று தடுமாற, சுப்மன் கில் தாக்குதலைத் தொடங்கினார். சேவியர் பார்ட்லெட்டை பவுண்டரியுடன் வரவேற்ற கில், ட்வார்ஷூயிஸ் வீசிய மூன்றாவது ஓவரில் நான்கு பவுண்டரிகளை விளாசி இந்தியாவின் தொடக்கத்தை அமர்க்களப்படுத்தினார்.

நாதன் எல்லிஸ் வீசிய நான்காவது ஓவரில், அபிஷேக்கின் கேட்சை ட்வார்ஷூயிஸ் மீண்டும் தவறவிட்டார். இதற்குப் பிறகு சிக்ஸர் பறக்கவிட்ட அபிஷேக், டி20 கிரிக்கெட்டில் 1000 ரன்களை கடந்தார். டி20 கிரிக்கெட்டில் குறைந்த பந்துகளில் 1000 ரன்களை கடந்த வீரர் என்ற சாதனையையும் அபிஷேக் படைத்தார். சேவியர் பார்ட்லெட் வீசிய ஐந்தாவது ஓவரின் ஐந்தாவது பந்துக்குப் பிறகு மழை குறுக்கிட்டது. இதனால் ஆட்டம் நிறுத்தப்பட்டது. கடந்த போட்டியில் வென்ற இந்திய அணியில் ஒரு மாற்றம் செய்யப்பட்டிருந்தது. திலக் வர்மாவுக்குப் பதிலாக ரிங்கு சிங் பிளேயிங் லெவனில் இடம்பிடித்தார். அதே போன்று, ஆஸ்திரேலிய அணியில் எந்த மாற்றமும் செய்யப்படவில்லை.