TNPL 2025 : சாய் கிஷோரின் அதிரடி; சேலம் எக்ஸ்பிரஸ் நடராஜனின் மின்னல் வேக பவுலிங் –வெற்றியை ருசித்த திருப்பூர் தமிழன்ஸ்!

TNPL 2025 : IDTT vs NRK : நெல்லை ராயல் கிங்ஸ் அணிக்கு எதிரான டிஎன்பிஎல் தொடரின் 27ஆவது லீக் போட்டியில் ஐடீரீம் திருப்புர் தமிழன்ஸ் அணியானது 69 ரன்கள் வித்தியாசத்தில் வெற்றி பெற்றுள்ளது.

TNPL 2025 : IDTT vs NRK : தமிழ்நாடு பிரீமியர் லீக் இறுதி கட்டத்தை எட்டியுள்ளது. இந்த தொடரில் இடம் பெற்ற 8 அணிகளில் சேப்பாக்கம் சூப்பர் கில்லீஸ், திண்டுக்கல் டிராகன்ஸ், ஐடிரீம் திருப்பூர் தமிழன்ஸ் ஆகிய அணிகள் ஏற்கனவே பிளே ஆஃப் சுற்றுக்கு தகுதி பெற்றன. இதில் கடைசி இடத்திற்கான போட்டியில் சேலம் ஸ்பார்டன்ஸ் மற்றும் திருச்சி கிராண்ட் சோழாஸ் அணிகளுக்கு இடையில் கடும் போட்டி நிலவி வருகிறது. மற்ற அணிகள் இந்த தொடரிலிருந்து வெளியேறிவிட்டன.

இந்த நிலையில் தான் இன்று நடைபெற்ற டிஎன்பிஎல் தொடரில் 27ஆவது லீக் போட்டியில் நெல்லை ராயல் கிங்ஸ் மற்றும் ஐடிரீம் திருப்பூர் தமிழன்ஸ் ஆகிய அணிகள் இடம் பெற்று விளையாடின. இதில் திருப்பூர் தமிழன்ஸ் 69 ரன்கள் வித்தியாசத்தில் வெற்றி வாகை சூடியது. இந்த போட்டியில் சாய் கிஷோர் ஆட்டநாயகனாக தேர்வு செய்யப்பட்டார்.

டாஸ் வென்ற நெல்லை அணி முதலில் பவுலிங் தேர்வு செய்தது. அதன்படி முதலில் பேட்டிங் செய்த திருப்பூர் தமிழன்ஸ் நிர்ணயிக்கப்பட்ட 20 ஓவர்களில் 5 விக்கெட்டுகளை இழந்து 182 ரன்கள் எடுத்தது. இதில், கேப்டன் சாய் கிஷோர் அதிரடியாக விளையாடி 34 பந்துகளில் 8 பவுண்டரி, ஒரு சிக்சர் உள்பட 55 ரன்கள் எடுத்து ஆட்டமிழந்தார். அமித் சாத்விக் 41 ரன்கள் எடுத்து கொடுத்தார். துஷார் ரஹேஜா 32 ரன்கள் எடுத்தார். மற்ற வீரர்கள் சொற்ப ரன்களில் ஆட்டமிழக்க திருப்பூர் அணி 20 ஓவர்களில் 5 விக்கெட்டுகளை இழந்து 182 ரன்கள் எடுத்தது.

பவுலிங்கைப் பொறுத்த வரையில் நெல்லை அணியில் சோனு யாதவ் 3 விக்கெட்டுகள் எடுத்தார். இதைத் தொடர்ந்து 183 ரன்களை வெற்றி இலக்காக கொண்ட நெல்லை அணி பேட்டிங் செய்தது. இதில் தொடக்க வீரர் சந்தோஷ் குமார் 0 ரன்னில் வெளியேற அஜிதேஷ் குருசாமி 28 ரன்கள் எடுத்தார். விக்கெட் கீப்பர் ரித்திக் ஈஸ்வரன் 39 ரன்கள் சேர்த்தார். ஆனால், பின்வரிசை வீரர்கள் சொற்ப ரன்களில் ஆட்டமிழக்க நெல்லை ராயல் கிங்ஸ் 19.4 ஓவர்களில் அனைத்து விக்கெட்டுகளையும் இழந்து 113 ரன்கள் மட்டுமே எடுத்து 69 ரன்கள் வித்தியாசத்தில் தோல்வியை தழுவியது.

திருப்பூர் அணியைப் பொறுத்த வரையில் டி நடராஜன் 4 ஓவர்கள் வீசி ஒரு மெய்டன் உள்பட 14 ரன்கள் மட்டுமே கொடுத்து 3 விக்கெட்டுகள் கைப்பற்றினார். மோகன் பிரசாத் 2 விக்கெட்டுகள் எடுத்துக் கொடுத்தார். இந்தப் போட்டியில் வெற்றி பெற்றதன் மூலமாக திருப்பூர் தமிழன்ஸ் 7 போட்டிகளில் விளையாடி 5 வெற்றி பெற்றது. 2 தோல்வி அடைந்து புள்ளிப்பட்டியலில் 2ஆவது இடத்தில் உள்ளது. மேலும், பிளே ஆஃப் சுற்றுக்கு தகுதி பெற்றுள்ளது.