ஸ்டீவ் வாக்கை கடைசிவரை கடுமையாக வெறுத்த ஷேன் வார்ன்..! இதுதான் காரணம்

ஸ்டீவ் வாக்கின் கேப்டன்சியிலும், அவருடன் இணைந்தும் அதிகமாக விளையாடிய போதிலும், ஸ்டீவ் வாக்கை ஷேன் வார்னுக்கு பிடிக்கவே பிடிக்காது. அதற்கு என்ன காரணம் தெரியுமா.? வாங்க பார்ப்போம்.  

ஸ்டீவ் வாக் - ஷேன் வார்ன் ஆகிய இருவருமே ஆஸ்திரேலிய கிரிக்கெட்டின் ஆல்டைம் சிறந்த வீரர்கள். இவர்கள் இருவருமே ஆஸ்திரேலிய அணியின் வெற்றிகளில் சிறந்த பங்களிப்பு செய்திருக்கின்றனர். இவர்களது கிரிக்கெட் கெரியரில் நீண்டகாலம் இருவரும் இணைந்து ஆடியிருக்கிறார்கள். ஸ்டீவ் வாக் கேப்டனான பிறகு, அவரது கேப்டன்சியிலும் அதிகமாக ஆடியிருக்கிறார் ஷேன் வார்ன். 

ஸ்டீவ் வாக்கும் ஷேன் வார்னும் எந்தளவிற்கு நண்பர்களாக இருந்தார்களோ, அந்தளவிற்கு, ஒரு கட்டத்திற்கு மேல் எதிரிகளாகவும் இருந்தார்கள். ஸ்டீவ் வாக்கிற்கும் ஷேன் வார்னேவுக்கும் இடையேயான மோதல் அனைவரும் அறிந்ததே. ஆனால் தனிப்பட்ட முறையில் அவர்களுக்கு இடையேயான கருத்து வேறுபாடு, களத்தில் அவர்களது ஆட்டத்தில் எந்த விதத்திலும் வெளிப்பட்டதில்லை. ஆஸ்திரேலிய அணிக்காக களத்தில் இறங்கிவிட்டால், இருவரும் நன்றாகவே பழகுவார்கள்; இணைந்து செயல்படுவார்கள். ஆனால் களத்திற்கு வெளியே அவர்களுக்கு இடையே மோதல்போக்கும் வெறுப்புணர்வும் இருந்துவந்தது.

இருவரும் கிரிக்கெட்டிலிருந்து ஓய்வுபெற்றுவிட்ட பின்னரும் ஒருவரையொருவர் சாடுவதை வழக்கமாக கொண்டிருந்தனர். ஸ்டீவ் வாக்கை எப்போதுமே சுயநல கிரிக்கெட் வீரர் என்று ஷேன் வார்ன் விமர்சிப்பதுண்டு. ஸ்டீவ் வாக்கிற்கு அணி ஜெயிப்பதெல்லாம் முக்கியமில்லை; அவர் அரைசதம் அடித்தால் போதும். அதுதான் அவருக்கு முக்கியம். அவரைப்போன்ற ஒரு சுயநல கிரிக்கெட் வீரரை நான் பார்த்ததில்லை என்றெல்லாம் கடுமையாக பலமுறை விமர்சித்திருக்கிறார் ஷேன் வார்ன். 

ஸ்டீவ் வாக் அவரது கெரியரில் 70க்கும் அதிகமானோரை ரன் அவுட்டாக்கியதாகவும் அதற்கான வீடியோ தொகுப்பையும் கிரிக்கெட் ஆவண காப்பாளர் ஒருவர் வெளியிட்டிருந்தார். அதைக்கண்ட ஷேன் வார்ன், நான் தான் பலகாலமாக சொல்லிவருகிறேனே.. ஸ்டீவ் வாக் மிகப்பெரிய சுயநல கிரிக்கெட்டர். அவர் மீது எனக்கு தனிப்பட்ட பகையெல்லாம் கிடையாது. ஆனால் அவர் சுயநல கிரிக்கெட்டர் என்று ஷேன் வார்ன் விமர்சித்தார். ஷேன் வார்ன், அவரது மனநிலையையும் கேரக்டரையும் பிரதிபலிக்கிறார் என்று ஸ்டீவ் வாக் பதிலடி கொடுத்திருந்தார்.

இப்படியாக இருவரும் ஒருவரையொருவர் சாடுவதை வழக்கமாக கொண்டிருந்த நிலையில், இருவருக்கும் இடையேயான மோதல் போக்கிற்கும், 1999ம் ஆண்டு வெஸ்ட் இண்டீஸுக்கு எதிரான டெஸ்ட் போட்டியில் ஷேன் வார்னை, கேப்டன் ஸ்டீவ் வாக் புறக்கணித்ததே. இதை முன்னாள் வீரர் மார்க் டெய்லர் ஒருமுறை கூறியிருக்கிறார்.

அதுமட்டுமல்லாது, ஷேன் வார்ன் அவரது சுயசரிதை புத்தகமான “நோ ஸ்பின்”னில் இதுகுறித்து விரிவாக எழுதியிருந்தார். தனது சுயசரிதையில் கேப்டன் ஸ்டீவ் வாக் தன்னை ஆஸ்திரேலிய அணியில் புறக்கணித்தது குறித்து எழுதியிருந்த ஷேன் வார்ன், 1999ம் ஆண்டு வெஸ்ட் இண்டீஸுக்கு எதிரான 4 போட்டிகள் கொண்ட டெஸ்ட் தொடரில் ஸ்டீவ் வாக் கேப்டன், நான் துணை கேப்டன். இந்த தொடரின் முதல் 3 போட்டிகளில் நான் சரியாக பந்துவீசவில்லை. 

எனவே என்னை 4வது போட்டியிலிருந்து நீக்க முடிவெடுத்த ஸ்டீவ் வாக், அவருக்கும் எனக்குமான சந்திப்பை நடத்தினார். அப்போது, அணியின் பயிற்சியாளர் ஜெஃப் மார்ஷ் என்னிடம் வந்து ஷேன், நீ அடுத்த போட்டியில் ஆடமுடியாது என்று கூறினார். நான், ஏன் என கேட்டேன். அதற்கு நீ நன்றாக பந்து வீசுவதுபோல் தெரியவில்லை, அதனால்தான் என்றார். நீங்கள் சொல்வது சரிதான், எனது தோள்பட்டை காயம் முழுவதுமாக குணமடைந்துவிடும் என எண்ணினேன். ஆனால் நீண்ட நாட்கள் ஆகிறது. அதனால்தான் சரியாக வீசமுடியவில்லை. நிதம் மெதுவாகத்தான் வரும். கவலையில்லை என்றேன். ஆனால் அவர் ஏற்றுக்கொள்ளவில்லை. 

அப்போது ஆலன் பார்டர்(ஆஸ்திரேலிய அணியின் முன்னாள் கேப்டன்) எனக்கு ஆதரவாக பேசினார். ஷேன் வார்னே அணிக்கு செய்த நன்மைகளை கருதி அவருக்கு வாய்ப்பளிக்க வேண்டும் என்று ஆலன் கூறினார். எனினும் ஸ்டீவ் வாக் அதை ஏற்றுக்கொள்ளவில்லை.

ஆனால், ஸ்டீவ் வாக், உங்களது சிந்தனையை பாராட்டுகிறேன் ஆலன். ஆனால் ஷேன் வார்னே இந்த போட்டியில் ஆடப்போவதில்லை. நான் இந்த முடிவை தைரியமாகவே எடுக்கிறேன் என பதிலளித்துவிட்டார். நான் அந்த போட்டியில் ஆடவில்லை. அந்த போட்டியில் ஆஸ்திரேலிய அணி வெற்றி பெற்று தொடரை சமன் செய்தது. அணிக்காக எனது பங்களிப்பை அளிக்க முடியவில்லை என்ற வேதனை எனக்கு இருந்தது. நான் நன்றாக ஆடியிருக்க வேண்டும். எனினும் நான் நன்றாக ஆடவில்லை என்று என்னை அணியை விட்டு நீக்குவதை பற்றி எனக்கு கவலையில்லை. ஆனால் நான் நல்ல நண்பராக கருதிய ஸ்டீவ் வாக் என்னை கைவிட்டுவிட்டார். அவருக்கு பல தருணங்களில் நான் ஆதரவாக இருந்துள்ளேன். ஆனால் அவர் என்னை கைவிட்டுவிட்டார் என்பதே வேதனை.

முதல் 3 டெஸ்ட் போட்டிகளில் சில வீரர்கள் ஸ்டீவ் வாக்கின் கேப்டன்சி, பீல்டிங் வியூகம் குறித்து என்னிடம் விமர்சனம் செய்தனர். நான் அப்போது கூட ஸ்டீவ் வாக்கிற்கு ஆதரவாகவே பதில் அளித்தேன். ஆனால் அவர் எனக்கு கைமாறு செய்யவில்லை. கேப்டனானவுடன் ஸ்டீவ் வாஹ் முற்றிலும் வேறு ஒரு மனிதராகி விட்டார். அவர் என்னை நீக்கியதால் அல்ல. நான் சரியாக ஆடவில்லை எனில் என்னை நீக்குவது பற்றி எனக்குக் கவலையில்லை. ஆனால் வெறும் என் ஆட்டம் மட்டுமே அங்கு விஷயமல்ல. அதைத்தாண்டியும் சில விஷயங்கள் இருந்தன என்பதுதான் முக்கியம் என மனவேதனையுடன் எழுதியிருந்தார் ஷேன் வார்ன்.

வெஸ்ட் இண்டீஸுக்கு எதிரான அந்த குறிப்பிட்ட டெஸ்ட்டில் ஷேன் வார்னை ஸ்டீவ் வாக் ஓரங்கட்டியதுதான், ஸ்டீவ் வாக் மீதான ஷேன் வார்னின் வெறுப்பிற்கு காரணம்.