Boxing Day Test: முதல் நாளில் சாய்ந்த 20 விக்கெட்டுகள்! ஆஸி., இங்கிலாந்து பௌலர்கள் வெறித்தனம்

கிறிஸ்துமஸுக்கு மறுநாள் நடைபெறும் பாக்சிங் டே டெஸ்டில், டாஸ் வென்ற இங்கிலாந்து அணி ஆஸ்திரேலியாவை பேட்டிங் செய்ய அழைத்தது. முதல் நாள் ஆட்டத்தில் மொத்தமாக 20 விக்கெட்டுகளை வீழ்த்தி இரு அணி பௌலர்களும் அசத்தி உள்ளனர்.

ஆஷஸ் தொடரின் பாக்சிங் டே டெஸ்டில், மெல்போர்னில் விக்கெட்டுகள் மளமளவென சரிந்தன. முதல் நாளில் 20 விக்கெட்டுகள் வீழ்ந்த இந்த ஆட்டத்தில், முதல் இன்னிங்ஸில் ஆஸ்திரேலியா 152 ரன்களுக்கு ஆல் அவுட் ஆனது. இங்கிலாந்தின் முதல் இன்னிங்ஸ் 110 ரன்களில் முடிவுக்கு வந்தது. முதல் நாளே தனது இரண்டாவது இன்னிங்ஸைத் தொடங்கிய ஆஸ்திரேலியா ஒரு ஓவர் பேட் செய்தது. முதல் நாள் ஆட்ட நேர முடிவில், ஆஸ்திரேலியா தனது இரண்டாவது இன்னிங்ஸில் விக்கெட் இழப்பின்றி நான்கு ரன்கள் எடுத்துள்ளது. நைட் வாட்ச்மேன் ஸ்காட் போலண்ட் நான்கு ரன்களுடனும், டிராவிஸ் ஹெட் ரன் ஏதும் எடுக்காமலும் களத்தில் உள்ளனர். முதல் இன்னிங்ஸில் 42 ரன்கள் என்ற முக்கிய முன்னிலையைப் பெற்ற ஆஸ்திரேலியா, தற்போது 10 விக்கெட்டுகள் கைவசம் இருக்க 46 ரன்கள் முன்னிலையில் உள்ளது.

கிறிஸ்துமஸுக்கு மறுநாள் நடைபெறும் பாக்சிங் டே டெஸ்டில், டாஸ் வென்ற இங்கிலாந்து அணி ஆஸ்திரேலியாவை பேட்டிங் செய்ய அழைத்தது. தொடக்க ஆட்டக்காரர்கள் 27 ரன்கள் எடுத்து நல்ல தொடக்கத்தை அளித்தாலும், பின்னர் ஆஸ்திரேலியா சரிவை சந்தித்தது. 12 ரன்கள் எடுத்த டிராவிஸ் ஹெட் முதலில் ஆட்டமிழந்தார், 10 ரன்கள் எடுத்த ஜேக் வெதரால்ட் அவரைத் தொடர்ந்து வெளியேறினார். மார்னஸ் லபுஷேன் (6), கேப்டன் ஸ்டீவ் ஸ்மித் (9) ஆகியோரும் நீண்ட நேரம் நிலைக்கவில்லை. இருவரையும் ஜோஷ் டங் ஆட்டமிழக்கச் செய்தார். உஸ்மான் கவாஜா (29) மற்றும் அலெக்ஸ் கேரி (20) ஆகியோர் அணியை சரிவிலிருந்து மீட்க முயன்றாலும், அவர்களது முயற்சி நீண்ட நேரம் நீடிக்கவில்லை. 91-6 என சரிந்த ஆஸ்திரேலியாவை, கேமரூன் கிரீன் மற்றும் மைக்கேல் நேசர் (35) ஜோடி 143 ரன்களுக்கு கொண்டு சென்றது. ஆனால் இருவரும் ஆட்டமிழந்ததும், ஆஸ்திரேலியா 152 ரன்களுக்கு சுருண்டது. இங்கிலாந்து சார்பில் ஜோஷ் டங் ஐந்து விக்கெட்டுகளையும், கஸ் அட்கின்சன் இரண்டு விக்கெட்டுகளையும் வீழ்த்தினர்.

ஆஸ்திரேலியாவை குறைந்த ஸ்கோரில் சுருட்டிய உற்சாகத்துடன் களமிறங்கிய இங்கிலாந்துக்கும் தொடக்கத்திலேயே அடி சறுக்கியது. தொடக்க ஆட்டக்காரர் சாக் கிராலி (5) மூன்றாவது ஓவரில் ஸ்டார்க் பந்துவீச்சில் ஆட்டமிழந்தார். ஜேக்கப் பெத்தேலை (1) மைக்கேல் நேசர் வெளியேற்றினார். பென் டக்கட்டை (2) ஸ்டார்க் தனது அடுத்த ஓவரில் வீழ்த்தினார். 15 பந்துகளைச் சந்தித்தும் ரன் கணக்கைத் தொடங்காத ஜோ ரூட்டும் (0) ஆட்டமிழந்தார். ஹாரி புரூக் (34 பந்துகளில் 41) அதிரடியாக ஆடினாலும், பென் ஸ்டோக்ஸ் (16), கஸ் அட்கின்சன் (28) ஆகியோர் மட்டுமே இங்கிலாந்து அணியில் இரட்டை இலக்க ரன்களை எட்டினர். 83-8, 91-9 என அடுத்தடுத்து விக்கெட்டுகளை இழந்த இங்கிலாந்தை, அட்கின்சனின் தடுப்பு ஆட்டம் 100 ரன்களைக் கடக்க வைத்தது. 42 ரன்கள் முக்கிய முதல் இன்னிங்ஸ் முன்னிலையைப் பெற்ற ஆஸ்திரேலியாவுக்காக, மைக்கேல் நேசர் நான்கு விக்கெட்டுகளையும், ஸ்காட் போலண்ட் மூன்று விக்கெட்டுகளையும், மிட்செல் ஸ்டார்க் இரண்டு விக்கெட்டுகளையும் வீழ்த்தினர்.