Vastu Temple: சொந்த வீடு, சொத்து, மனை தொடர்பான பிரச்சனைகளா? இந்த ஒரு கோவிலுக்கு மட்டும் போங்க.!

சொந்த வீடு கட்ட வேண்டும் என்பது பலரின் ஆசையாக உள்ளது. சொந்த வீடு கட்ட வேண்டும் என்று நினைப்பவர்கள், இந்த ஆலயத்திற்கு சென்று வழிபட்டால் உடனடியாக நினைத்தது நிறைவேறும். அந்த ஆலயம் என்ன? எங்கு அமைந்துள்ளது? என்பது குறித்து இந்த பதிவில் பார்க்கலாம். 

Bhoomi Natha Swamy Temple, Mannachanallur

நம் அனைவருக்குமே சொந்த வீடு கட்ட வேண்டும் என்பது கனவாக இருக்கிறது. ஆனால் சொந்த வீடு கட்டுவது என்பது சாதாரண விஷயம் அல்ல. சிலருக்கு வீடு கட்டுவதற்கு முன்னரே பல பிரச்சினைகள் ஏற்படும். சிலருக்கு வீடை கட்டத் தொடங்கியவுடன் தடங்கல்கள் ஏற்படலாம். சிலருக்கு நிலத்தை வாங்கி வைத்து பின்னர் பல்வேறு காரணங்களால் வீடு கட்ட முடியாமல் போய்விடுகிறது. இந்தத் தடைகளை விலக்கி, சொந்த வீடு கட்டவும், வீடு கட்டுவதில் உள்ள பிரச்சனைகளை தீர்க்கவும் ஒரு பிரசித்தி பெற்ற தலமாக திருச்சி மண்ணச்சநல்லூர் பூமிநாதர் ஆலயம் விளங்கி வருகிறது. இந்த ஆலயம் குறித்தும், அதன் சிறப்புகள் குறித்தும் இந்த பதிவில் விரிவாகப் பார்க்கலாம்.

2000 ஆண்டுகள் பழமையான ஆலயம்

தமிழ்நாட்டின் மையப் பகுதியான திருச்சிராப்பள்ளி மாவட்டத்தில் மண்ணச்சநல்லூர் என்ற ஊரில் அமைந்துள்ளது பூமிநாதர் ஆலயம். இது 2000 ஆண்டுகள் பழமையான ஆலயம் என்று கூறப்படுகிறது. இந்த ஆலயம் பூமி தொடர்பான தோஷங்களை நீக்கி, பக்தர்களுக்கு அருள் பாலிக்கும் பரிகாரத்தலமாக விளங்கி வருகிறது. இறைவன் பூமிநாத சுவாமியாகவும், அம்மன் அறம் வளர்த்த நாயகியாகவும் (தரம்சம்வர்த்தினி) வணங்கப்படுகின்றனர். இந்த கோயில் திருச்சியில் இருந்து சுமார் 15 கிலோமீட்டர் தொலைவில் திருச்சி துறையூர் சாலையில் அமைந்துள்ளது. இந்த ஊர் அரிசி அரவை ஆலைகளுக்கு மட்டுமல்லாமல், கொள்ளிடம் ஆற்றின் அருகே அமைந்துள்ளதால் வளமான விவசாய பகுதிகளுக்கும் பெயர் பெற்றதாக அமைந்துள்ளது. ஆலயம் சாலையோரத்தில் அமைந்திருப்பதால் பயணிகளுக்கு எளிதில் அணுகக் கூடியதாக உள்ளது.

16 வகையான தோஷங்களை நீக்கும் இறைவன்

இந்தக் கோயில் 18ம் நூற்றாண்டை சேர்ந்ததாக கருதப்படுகிறது. சில ஆதாரங்கள் இதன் பழமையை 2000 ஆண்டுகளுக்கு முற்பட்டதாக குறிப்பிடப்படுகின்றன. கொள்ளிடம் ஆற்றில் ஏற்பட்ட வெள்ளத்தை தடுக்க மண்ணை அணைத்து உருவாக்கப்பட்டதால் ‘மண் அணைத்த நல்லூர்’ என்று வந்ததாகவும், காலப்போக்கில் அது மண்ணச்சநல்லூர் என்று மருவியதாகவும் கூறப்படுகிறது. அகத்திய மாமுனிவர் தனது நூலில் இத்தல இறைவன் 16 வகையான தோஷங்களை நீக்கி பக்தர்களுக்கு அருள் பாலிப்பார் என்று குறிப்பிட்டுள்ளார். இந்த ஆலயம் கீழ்திசை (கிழக்கு) நோக்கி அமைந்துள்ளது. இது பல சிவாலயங்களுக்கு மாறான ஒரு அமைப்பாகும். மூன்று நிலைகளைக் கொண்ட ராஜகோபுரத்தை தாண்டி உள்ளே சென்றால் கொடிமரம், விநாயகர், நந்தி ஆகியோர் அமைந்துள்ளனர். கொடிமரம், பலிபீடம், நவக்கிரக சன்னதிகள் மகா மண்டபத்தில் அமைந்துள்ளன. நவக்கிரகங்கள் சூரியனை மையமாகக் கொண்டு அமைந்திருப்பது இத்திருத்தலத்தின் தனித்தன்மையாகும்.

கோயிலில் செய்யப்படும் பரிகாரம்

கருவறையில் இறைவன் பூமிநாத சுவாமி லிங்க வடிவில் கீழ்த்திசை நோக்கி காட்சி தருகிறார். அவருக்கு அருகில் தனி சன்னதியில் அன்னை தர்மசம்வர்த்தினி தெற்கு நோக்கி நின்ற காலத்தில் காட்சி வருகிறார். இவரது சன்னிதியில் மகாமேரு பிரதிஷ்டை செய்யப்பட்டுள்ளது. இது ஆன்மீக முக்கியத்துவம் வாய்ந்ததாக கருதப்படுகிறது. உப சன்னதிகளில் முருகன், தட்சிணாமூர்த்தி, துர்க்கை ஆகியோர் அருள்பாலிக்கின்றனர். கோயிலின் தல விருச்சங்களாக வில்வமரமும், வன்னி மரமும் உள்ளன. இவை பூமி தோஷங்களை நீக்குவதற்கு முக்கிய பங்கு வகிக்கின்றன. இந்த ஆலயம் வாஸ்து மற்றும் பூமி தொடர்பான தோஷங்களை நீக்குவதற்கு பிரசித்தி பெற்றது. பக்தர்கள் தங்கள் வீடு அல்லது மனையின் வடகிழக்கு மூலையில் மூன்று பிடி மண்ணை எடுத்து மஞ்சள் துணியில் கட்டி ஆலயத்திற்கு கொண்டு வருகின்றனர். இந்த மண்ணை பூக்கள், பழங்கள், மாலையுடன் அர்ச்சனை தட்டில் வைத்து இறைவனுக்கு அர்பணிக்கின்றனர். பின்னர் பக்தர்கள் கோயிலை மூன்று முறை வலம் வருகின்றனர்.

கோயில் திறந்திருக்கும் நேரம்

முதல் சுற்றில் மண்ணின் ஒரு பிடியை வில்வ மரத்தடியிலும், இரண்டாவது சுற்றில் மற்றொரு பிடி மண்ணை வன்னி மரத்தடியிலும் இடுகின்றனர். மேலும் மகா ருத்ர யாக சாம்பலை ஒருபிடி எடுத்து மீதமுள்ள மண்ணுடன் சேர்க்கின்றனர். மூன்றாவது சுற்றில் நவகிரகங்களை வழிபட்டு மண், சாம்பல் கலந்த கலவையை வீட்டின் பூஜையறையில் வைக்கின்றனர். இந்த வழிபாட்டை பின்பற்றுவதால் வாஸ்து தோஷங்கள், பித்ரு தோஷங்கள் மற்றும் சொத்து தொடர்பான பிரச்சனைகள் தீர்வதாக நம்பப்படுகிறது. மேலும் இந்த வழிபாடு செய்த மூன்று மாதங்களுக்குள் பலன் தருவதாக பக்தர்கள் கூறுகின்றனர். இந்த கோயில் தினமும் காலை 6:00 மணி முதல் பகல் 12:00 மணி வரையும், மாலை 5:00 மணி முதல் இரவு 8:00 மணி வரையும் திறந்திருக்கும். இந்த நேரங்களில் பக்தர்கள் தரிசனம் செய்யலாம்.

கோயிலுக்கு எப்படி செல்வது?

பூமிநாத சுவாமி ஆலயம் பஞ்ச பூதங்களில் ஒன்றான மண்ணுடன் தொடர்புடையது. இந்த ஆலயம் சொந்த வீடு, சொத்து, மனை தொடர்பான பிரச்சனைகளை தீர்க்க உதவுவதாக நம்பப்படுகிறது. இங்கு வழிபடுவதால் வாஸ்து குறைபாடுகள், பித்ரு தோஷங்கள், கிரக தோஷங்கள் நீங்குவதாக நம்பப்படுகிறது. இதன் காரணமாக இந்த ஆலயத்திற்கு தமிழ்நாடு மட்டுமல்லாமல் பிற மாநிலங்களிலும் இருந்து வரும் பக்தர்கள் வருகை தருகின்றனர். திருச்சி சத்திரம் பேருந்து நிலையத்திலிருந்து துறையூர், ஆத்தூர், உப்பிலியபுரம் ஆகிய ஊர்களுக்குச் செல்லும் பேருந்துகள் மூலமாக இந்த ஆலயத்திற்கு செல்லலாம் மேலும் மண்ணச்சநல்லூர் வழியாக செல்லும் நகரப் பேருந்துகளும் உள்ளன. திருச்சி ரயில் நிலையம் மற்றும் விமான நிலையத்திலிருந்து மண்ணச்சநல்லூருக்கு போக்குவரத்து வசதிகள் செய்யப்பட்டுள்ளன.

ஒருமுறையாவது வழிபட்டு வாருங்கள்

மண்ணச்சநல்லூர் பூமிநாத சுவாமி ஆலயம் ஆன்மீக முக்கியத்துவம் மற்றும் நிலம் தொடர்பான தோஷங்களை நீக்கும் திருத்தலமாகும். இதன் தனித்துவமான வழிபாட்டு முறைகள், பழமையான வரலாறு மற்றும் எளிதில் அணுகக்கூடிய அமைவிடம் இத்திருத்தலத்தை ஆன்மீக முக்கியத்துவம் வாய்ந்த இடமாக மாற்றி உள்ளன. இங்கு வழிபடுபவர்கள் மனதில் அமைதியும், வாழ்வில் நலன்களும் பெறுவார்கள் என்பது மக்களின் உறுதியான நம்பிக்கை. சொந்த வீடு கட்ட வேண்டும் அல்லது வீடு கட்டுவதில் தடங்கல் இருப்பவர்கள் ஒரு முறையாவது இந்த கோவிலுக்கு சென்று இறைவனை வழிபட்டு வாருங்கள்.