அரசு தலைமை வழக்கறிஞர் பொறுப்பிலிருந்து முத்துகுமாரசாமி ராஜினாமா செய்ததையடுத்து அந்த பதவியில் மூத்த வழக்கறிஞர் விஜய நாராயணனை நியமனம் செய்து தமிழக அரசு உத்தரவிட்டுள்ளது. தமிழக அரசு தலைமை வழக்கறிஞராக இருந்த திரு. ஏ.எல். சோமையாஜி, பதவி விலகியதைத் தொடர்ந்து, மூத்த வழக்கறிஞர் திரு. ஆர். முத்துகுமாரசாமி கடந்த ஆண்டு ஆகஸ்ட் மாதம் 26 ஆம் தேதி தமிழ்நாடு அரசு தலைமை வழக்கறிஞராக நியமிக்கப்பட்டார். மூத்த வழக்கறிஞர் முத்துகுமாரசாமி 1994 ஆம் ஆண்டு தமிழக அரசின் சிறப்பு வழக்கறிஞராக செயல்பட்டு வந்தார். அதை தொடர்ந்து 2001 ஆம் ஆண்டு முதல் 2006 வரை தமிழக அரசின் கூடுதல் வழக்கறிஞராக செயல்பட்டு வந்தார். தமிழக அரசுக்கு எதிராக உள்ள பல வழக்குகளை இவர் கையாண்டு வாதாடியுள்ளார். பேரறிவாளன் பரோலுக்கு இவர் அளித்த பரிந்துரையே ஒரு முக்கிய காரணம் எனவும் கூறலாம். இந்நிலையில் உடல் நிலை சரியில்லாத காரணத்தால் பதவியில் தொடர்ந்து நீடிக்க முடியாது என கூறி தமிழக அரசுக்கு தனது ராஜினாமா கடித்தத்தை முத்துகுமாரசாமி அனுப்பினார். இவரை தொடர்ந்து அடுத்த படியாக இந்த பதவிக்கு மூத்த வழக்கறிஞர் விஜயநாராயணன் நியமிக்கப்படலாம் என தகவல் வெளியாகியது. அதன்படி இன்று அரசு தலைமை வழக்கறிஞராக விஜய நாராயணனை நியமித்து தமிழக அரசு உத்தரவிட்டுள்ளது.
