திமுகவுக்கு மாற்றும் எதிர்க்கட்சியும் பாமகதான்.. பாஜக வளர்ந்து வரும் ஒரு கட்சி.. டாப் கியர் போடும் அன்புமணி.!

தமிழக பாஜக தலைவர் அண்ணாமலை கர்நாடகாவுக்குச் சென்று மேகேதாட்டு அணை கட்டும் திட்டம் கொண்டு வர மாட்டோம் என்று சொல்வாரா என்று பாமக தலைவர் அன்புமணி ராமதாஸ் கேள்வி எழுப்பியுள்ளார்.

சேலத்தில் அன்புமணி ராமதாஸ் இன்று செய்தியாளர்களைச் சந்தித்தார். அப்போது அவர் கூறுகையில், “பாமக 2.0 என்ற புதிய செயல் திட்டத்தை செயல்படுத்த உள்ளேன். இதன் மூலம் கல்வி, மேலாண்மை, சுற்றுச்சூழல், மது ஒழிப்பு, நேர்மையான நிர்வாகம் ஆகியவற்றை முன்னிறுத்தி கட்சியை வழி நடத்துவேன். சேலத்தில் முக்கியமான பிரச்னைகள் உள்ளன. கடந்த 20 ஆண்டுகளாக மேட்டூர் உபரி நீர் திட்டத்தை செயல்படுத்த வேண்டும். ஆண்டுதோறும் 40 டிஎம்சி முதல் 120 டிஎம்சி தண்ணீர் கடலில் கலக்கிறது. கடந்த ஆட்சியில் சிறிய அளவில் செயல்படுத்தப்பட்ட காவிரி உபரிநீர் திட்டத்தை முழுமையாக நிறைவேற்ற வேண்டும்.

தமிழகத்தில் மது, போதைப் பொருட்கள், ஆன்லைன் மோசடி என மும்முனைத் தாக்குதல்கள் நடைபெற்று வருகின்றன. கடந்த 9 மாதங்களில் மட்டும் 50 பேர் தற்கொலை செய்திருக்கிறார்கள். அதைத் தடுக்க தமிழக அரசு உடனடி நடவடிக்கை தேவை. தமிழகத்தில் தேர்தலுக்கு முன்பு மதுக்கடைகள் படிப்படியாக மூடப்படும் என அறிவித்தார்கள். அடுத்த தலைமுறையைக் காப்பாற்ற வேண்டுமென்றால், மதுக்கடைகளை உடனே மூட வேண்டும். நீட் தேர்வின் நோக்கமே கல்வி வியாபாரமாகக் கூடாது என்பதுதான். ஆனால், இந்தியா முழுவதும் ரூ.1 லட்சம் கோடிக்கு மேல் பயிற்சி நிறுவனங்களால் மோசடி நடைபெறுகிறது. மருத்துவக் கல்லூரிகளில் கல்விக் கட்டணம் கல்வி வணிகமாக்கப்பட்டது. நீட் தேர்வு வந்த பிறகும் தகுதியற்ற நபர்கள் மருத்துவம் படிக்கும் அவலம் நிலவி வருகிறது.

கடந்த 50 ஆண்டுகளாக திராவிட கட்சிகள் தமிழகத்தில் கல்வி கட்டமைப்பையே உருவாக்கவில்லை. அதனால், சிறிது காலம் தமிழகத்துக்கு நீட் தேர்விலிருந்து விலக்கு அளிக்க வேண்டும். இதேபோல கல்வியைப் பொதுப் பட்டியலில் இருந்து மாநில பட்டியலுக்கு மாற்ற வேண்டும். ஆளுநருக்கும் முதல்வருக்கும் சுமுகமான உறவு இருக்க வேண்டும். அப்படி இருந்தால்தான் நிர்வாகம் சீராக இருக்கும். எனவே இதில் இருவருமே அரசியல் செய்யக் கூடாது. தமிழக மக்களின் உணர்வுகளை மதித்து ஆளுநர் செயல்பட வேண்டும். முதல்கட்டமாக பாமகவை மறுசீரமைப்பு செய்து வருகிறேன். எங்களின் இலக்கே 2026ஆம் ஆண்டு தமிழகத்தில் பாமக ஆட்சியை அமைப்பதுதான்.

இந்தியாவில் பெரிய கட்சி பாஜக. ஆனால், தமிழகத்தைப் பொறுத்தவரை பாஜக வளர்ந்து வரும் கட்சிதான். தமிழகத்துக்கு சாபக்கேடாக அமைந்துள்ள மேகேதாட்டு அணையை எக்காரணம் கொண்டும் நாங்கள் கட்டவிட மாட்டோம். மத்தியிலும் கர்நாடகாவிலும் பாஜக ஆட்சிதான் நடைபெறுகிறது. எனவே, தமிழக பாஜக தலைவர் அண்ணாமலை கர்நாடகாவுக்குச் சென்று மேகேதாட்டு அணை கட்டும் திட்டம் கொண்டு வர விடமாட்டோம் என்று சொல்வாரா? அணையைக் கட்டவிடாமல் தடுத்து நிறுத்துவாரா? தமிழகத்தில் திமுகவுக்கு மாற்று பாமகதான். பாஜக கிடையாது. திமுகவுக்கு பாஜக எதிர்கட்சி கிடையாது. உண்மையான எதிர்க்கட்சி பாமகதான்.” என்று அன்புமணி ராமதாஸ் தெரிவித்துள்ளார்.