சும்மா பூச்சாண்டி காட்டக்கூடாது... பாகிஸ்தானின் பழைய வேஷம்..! இந்தியா கடும் எச்சரிக்கை..!

‘‘பாகிஸ்தான் தனது பேச்சுக்களைக் கட்டுப்படுத்துமாறு நாங்கள் எச்சரிக்கிறோம். எந்தவொரு நடவடிக்கைக்கும் அதற்கு பெரும் விலை கொடுக்க நேரிடும்''

பாகிஸ்தானின் தொடர்ச்சியான போர் அச்சுறுத்தல்களுக்கு இந்தியா தகுந்த பதிலடி கொடுத்துள்ளது.''இது பாகிஸ்தானின் பழைய நாடகம். இது நமக்கு நன்கு தெரிந்ததே. பாகிஸ்தான் ஏதேனும் தவறு செய்தால், விளைவுகள் மிகவும் வேதனையாக இருக்கும்'' என்று வெளியுறவு அமைச்சகம் எச்சரித்துள்ளது.

இது குறித்து வெளியுறவு அமைச்சக செய்தித் தொடர்பாளர் ரந்தீர் ஜெய்ஸ்வால் கூறுகையில், ‘‘ பாகிஸ்தான் தலைவர்களின் தொடர்ச்சியான அபத்தமான, போர் வெறி, வெறுப்புணர்வை ஏற்படுத்தும் கருத்துக்களை நாங்கள் கண்டிருக்கிறோம். இது பாகிஸ்தானின் பழைய, நன்கு தெரிந்த முறை. பொதுமக்களின் கவனத்தை அதன் தோல்விகளில் இருந்து திசைதிருப்ப இந்தியாவுக்கு எதிராக மீண்டும் மீண்டும் மிரட்டல்களை வெளியிடுகிறது. இது ஒரு பழைய நாடகம்’’ எனத் தெரிவித்துள்ளார்.

பஹல்காம் பயங்கரவாத தாக்குதலுக்குப் பிறகு சிந்து நதி நீர் ஒப்பந்தத்தை இடைநிறுத்த இந்தியா எடுத்த முடிவு குறித்து பாகிஸ்தான் பிரதமர் ஷாபாஸ் ஷெரீப் உட்பட பல முக்கிய தலைவர்கள் கோபமடைந்து இந்தியாவை மிரட்டி வருகின்றனர். இஸ்லாமாபாத்தில் நடந்த ஒரு நிகழ்ச்சியில், ஷெரீப், "எங்கள் தண்ணீரை நிறுத்த நீங்கள் முயற்சித்தால், உங்கள் காதுகளைப் பிடித்துக் கொள்ளும் அளவுக்கு ஒரு பாடம் உங்களுக்குக் கிடைக்கும்" என்று கூறியிருந்தார். இதற்கு ஒரு நாள் முன்பு, பாகிஸ்தானின் முன்னாள் வெளியுறவு அமைச்சர் பிலாவல் பூட்டோ சர்தாரி, ‘‘சிந்து நீர் ஒப்பந்தத்தை நிறுத்தி வைப்பது சிந்து சமவெளி நாகரிகத்தின் மீதான தாக்குதல். போருக்கு எங்களைத் தள்ளினால், நாங்கள் பின்வாங்க மாட்டோம்’’ என்று அவர் மிரட்டினார்.

பாகிஸ்தான் இராணுவத் தலைவர் ஜெனரல் அசிம் முனீர், ‘‘இந்தியா தண்ணீரை நிறுத்தினால், பாகிஸ்தான் அந்த அணையை அதை வெடிக்கச் செய்யும்’’ எனத் தெரிவித்து இருந்தார். மேலும் அவர், ‘‘இந்தியா ஒரு அணை கட்டும் வரை நாங்கள் காத்திருப்போம். பின்னர் அதை அழிப்போம். சிந்து நதி இந்தியர்களின் மூதாதையர் சொத்து அல்ல. இந்தியாவின் சதித்திட்டத்தை முறியடிக்க எங்களிடம் அனைத்து வளங்களும் உள்ளன. அமெரிக்க பயணத்தின்போது புளோரிடாவில் நடந்த ஒரு நிகழ்ச்சியில் முனீர் அணு ஆயுதப் போரை அச்சுறுத்தினார். நமது இருப்புக்கு அச்சுறுத்தல் ஏற்பட்டால், இந்தியாவை அணு ஆயுதப் போருக்குள் தள்ளுவோம், அதன் விளைவு உலகின் கிட்டத்தட்ட பாதியில் உணரப்படும் என்று அவர் கூறினார்.

ஏப்ரல் 22 அன்று பஹல்காம் பயங்கரவாத தாக்குதலுக்குப் பிறகு இந்தியா-பாகிஸ்தான் உறவுகள் வேகமாக மோசமடைந்தன. இந்தத் தாக்குதலில் பல அப்பாவி பொதுமக்கள் கொல்லப்பட்டனர். இதற்கான பொறுப்பு பாகிஸ்தானில் உள்ள பயங்கரவாதிகள் மீது நேரடியாக சுமத்தப்பட்டது. இதன் பின்னர், இந்தியா பல கடுமையான நடவடிக்கைகளை எடுத்தது. முதலாவதாக, சிந்து நீர் ஒப்பந்தம் இடைநிறுத்தப்பட்டது. இஸ்லாமாபாத்தில் உள்ள இந்திய தூதரகத்தில் இருந்து நமது தூதர்கள் திரும்ப அழைக்கப்பட்டனர்.

பஹல்காம் தாக்குதலுக்குப் பிறகு, எல்லையைத் தாண்டிய பயங்கரவாத முகாம்களுக்கு எதிராக இந்தியா ஆபரேஷன் சிந்தூர் நடவடிக்கையைத் தொடங்கியது. நான்கு நாட்களுக்கு, இந்தியாவிற்கும் பாகிஸ்தானுக்கும் இடையே கடுமையான எல்லை தாண்டிய துப்பாக்கிச் சூடு மற்றும் ஏவுகணை-ட்ரோன் தாக்குதல்கள் நடந்தன. பாகிஸ்தானின் பல விமானப்படை தளங்கள் மீது இந்திய விமானப்படை துல்லியமான தாக்குதல்களை நடத்தியது. பாகிஸ்தான் ராணுவத்தின் பல திறன்கள் பலத்த சேதத்தை சந்தித்தன. பாகிஸ்தானின் ஏவுகணை மற்றும் ட்ரோன் தாக்குதலை இந்தியா வெற்றிகரமாக முறியடித்தது.

வெளியுறவு அமைச்சக செய்தித் தொடர்பாளர் ரந்தீர் ஜெய்ஸ்வால் கூறுகையில், ‘‘பாகிஸ்தான் தனது பேச்சுக்களைக் கட்டுப்படுத்துமாறு நாங்கள் எச்சரிக்கிறோம். எந்தவொரு நடவடிக்கைக்கும் அதற்கு பெரும் விலை கொடுக்க நேரிடும். பாகிஸ்தானின் வரலாறு இதுபோன்ற வெற்று பேச்சுகளால் நிறைந்துள்ளது. உள்நாட்டு தோல்விகளை மறைப்பதே அதன் நோக்கம் என்பதை உலகம் அறிந்திருக்கிறது’’ என்று அவர் மீண்டும் எச்சரித்துள்ளார்.