நடுவானில் விமானம்.. திடீரென இறந்த இந்திய விமானி.. 2 நாட்களில் 2 இந்திய விமானிகள் மரணம் - என்ன நடந்தது?

இரண்டு நாட்களில் இரண்டு இந்திய விமானிகள் இறந்துள்ள சம்பவம் பெரும் சோகத்தை ஏற்படுத்தியுள்ளது. நேற்று ஆகஸ்ட் 17ம் மாலை நாக்பூரில் உள்ள விமானநிலைய போர்டிங் கேட்டின் அருகே இண்டிகோ விமான கேப்டன் ஒருவர் மயங்கி விழுந்து இறந்த நிலையில், கத்தார் ஏர்வேஸ் விமானிக்கு நேற்று விமான பயணத்தின்போதே மாரடைப்பு ஏற்பட்டுள்ளது.

இண்டிகோ விமான கேப்டனான அந்த இந்தியர், நாக்பூரிலிருந்து புனேவுக்கு விமானத்தை இயக்கவிருந்த நிலையில், அவர் போர்டிங் கேட்டை அடைந்த நிலையில் சுயநினைவை இழந்து கீழே விழுந்துள்ளார். உடனே அவர் மருத்துவமனைக்கு கொண்டு செல்லப்பட்ட நிலையில் அவர் ஏற்கனவே இறந்துவிட்டதாக அறிவிக்கப்பட்டது.

நேற்றுமுன்தினம் அதிகாலை 3 மணி முதல் 7 மணி வரை திருவனந்தபுரத்தில் இருந்து நாக்பூர் வழியாக புனே வரை அண்ட் பைலட் இரண்டு விமானங்களை இயக்கியதாக ஆதாரங்கள் தெரிவிக்கின்றன. அதன் பிறகு 27 மணி நேரம் ஓய்வில் இருந்த அவர் நேற்று தனது அடுத்த பயணத்திற்கு ஆயத்தமாகி வந்தார். இந்த சூழலில் தான் மதியம் 1 மணிக்குத் திட்டமிடப்பட்டிருந்த அன்றைய முதல் பயணத்திற்காக அவர் புறப்பட்டபோது மயங்கி விழுந்து இறந்துள்ளார் என்று தகவல்கள் தெரிவிக்கின்றது.

இண்டிகோ நிறுவனம் நேற்று வெளியிட்டுள்ள அறிக்கையில், "இன்று அதிகாலை நாக்பூரில் எங்கள் விமானி ஒருவர் உயிரிழந்தது வருத்தமளிக்கிறது. அவர் நாக்பூர் விமான நிலையத்தில் உடல்நிலை சரியில்லாமல் மருத்துவமனைக்கு கொண்டு செல்லப்பட்டார், அங்கு அவர் துரதிர்ஷ்டவசமாக இறந்தார். எங்கள் எண்ணங்களும் பிரார்த்தனைகளும் அவரது குடும்பத்தினருடன் உள்ளன" என்று கூறியுள்ளது.

அதேபோல கத்தார் ஏர்வேஸ் விமானியான அந்த இந்திய விமானி நேற்று முன்தினம் டெல்லி-தோஹா விமானத்தின் பயணிகள் அறையில் கூடுதல் பணியாளராகப் பயணம் செய்து கொண்டிருந்தபோது மாரடைப்பு ஏற்பட்டு உயிரிழந்தார். அவர் இதற்கு முன்பு ஸ்பைஸ்ஜெட், அலையன்ஸ் ஏர் மற்றும் சஹாரா நிறுவனங்களில் பணிபுரிந்துள்ளார் என்பது குறிப்பிடத்தக்கது.

சிவில் விமான போக்குவரத்து இயக்குனரகம் இந்த இரு இறப்புகளை உறுதி செய்துள்ளது. கடந்த வாரம் மியாமியில் இருந்து சிலிக்கு 271 பயணிகளுடன் சென்ற வணிக விமானத்தின் குளியலறையில் விமானி ஒருவர் மயங்கி விழுந்தது குறிப்பிடத்தக்கது.