மாநிலங்கள் இணைந்து செயல்பட வேண்டும்: பிரதமர் மோடி வலியுறுத்தல்

வளர்ச்சியடைந்த இந்தியா@2047 இலக்கை அடைய, மாநிலங்கள் இணைந்து செயல்பட வேண்டும் என பிரதமர் மோடி வலியுறுத்தியுள்ளார். மாநிலங்களின் வளர்ச்சிதான் நாட்டின் ஒட்டுமொத்த வளர்ச்சிக்கு அடிப்படையாக அமையும் என்றும் அவர் குறிப்பிட்டார்.

இந்தியாவின் எதிர்கால வளர்ச்சிக் கனவான 'விக்சித் பாரத்@2047' (வளர்ச்சியடைந்த இந்தியா@2047) இலக்கை அடைய, மாநிலங்கள் இணைந்து செயல்பட வேண்டும் என பிரதமர் மோடி வலியுறுத்தியுள்ளார். நிதி ஆயோக் அமைப்பின் 10வது ஆட்சிமன்றக் குழுக் கூட்டத்திற்குத் தலைமை தாங்கிப் பேசிய பிரதமர், மாநிலங்களின் வளர்ச்சிதான் நாட்டின் ஒட்டுமொத்த வளர்ச்சிக்கு அடிப்படையாக அமையும் என்று குறிப்பிட்டார்.

டெல்லி பாரத் மண்டபத்தில் நடைபெற்ற இந்த உயர்மட்டக் கூட்டத்தில், 24 மாநிலங்களின் முதலமைச்சர்கள் மற்றும் 7 யூனியன் பிரதேசங்களின் துணைநிலை ஆளுநர்கள் பங்கேற்றனர். மாநிலங்களின் வளர்ச்சியே நாட்டின் வளர்ச்சி என்ற கருப்பொருளில் இந்தக் கூட்டம் நடந்தது. கூட்டத்தின் தொடக்கத்தில், பஹல்காம் பயங்கரவாதத் தாக்குதலில் உயிரிழந்தவர்களுக்கு ஒரு நிமிடம் மௌன அஞ்சலி செலுத்தப்பட்டது.

இந்தக் கூட்டத்தில் பேசிய பிரதமர் மோடி கூறியதாவது:

தேசிய கனவு:

"இந்தியா ஒரு வளர்ச்சியடைந்த பாரதமாக மாற வேண்டும் என்பது ஒவ்வொரு இந்தியனின் கனவாகும். இது எந்த ஒரு கட்சியின் செயல்திட்டம் அல்ல, மாறாக 140 கோடி இந்தியர்களின் விருப்பமாகும். இந்த இலக்கை நோக்கி அனைத்து மாநிலங்களும் இணைந்து செயல்பட்டால், நாம் மகத்தான முன்னேற்றத்தைக் காண்போம். ஒவ்வொரு மாநிலமும், ஒவ்வொரு நகரமும், ஒவ்வொரு கிராமமும் வளர்ச்சியடையும் என நாம் உறுதிபூண்டால், 2047-க்கு முன்பே வளர்ச்சியடைந்த இந்தியாவை அடைந்துவிடுவோம்."

பொருளாதார வளர்ச்சி மற்றும் வறுமை ஒழிப்பு:

"இந்தியா உலகின் முதல் ஐந்து பொருளாதார நாடுகளில் ஒன்றாக உருவெடுத்துள்ளது. மேலும் 25 கோடி மக்கள் வறுமையிலிருந்து மீட்கப்பட்டுள்ளனர். இந்த மாற்றத்தின் வேகத்தை நாம் அதிகரிக்க வேண்டும்."

உற்பத்தித் துறைக்கு ஊக்கம்: 

"மாநிலங்கள் தங்கள் உற்பத்தித் திறனைப் பயன்படுத்திக் கொள்ள வேண்டும். மத்திய அரசு உற்பத்தி இயக்கத்தை (Manufacturing Mission) அறிவித்துள்ளது."

சர்வதேச முதலீடுகள்: 

"உலகளாவிய முதலீட்டாளர்கள் இந்தியாவில் மிகுந்த ஆர்வம் காட்டி வருகின்றனர். மாநிலங்கள் இந்த வாய்ப்பைப் பயன்படுத்திக் கொண்டு முதலீடுகளுக்கு ஏற்ற சூழலை உருவாக்க வேண்டும். ஐக்கிய அரபு அமீரகம், இங்கிலாந்து மற்றும் ஆஸ்திரேலியாவுடனான சமீபத்திய வர்த்தக ஒப்பந்தங்களை மாநிலங்கள் முழுமையாகப் பயன்படுத்திக் கொள்ள வேண்டும்."

திறன் மேம்பாடு: 

"புதிய கல்விக் கொள்கை கல்வி மற்றும் திறன் மேம்பாட்டிற்கு முக்கியத்துவம் அளிக்கிறது. செயற்கை நுண்ணறிவு (AI), செமிகண்டக்டர், 3D பிரிண்டிங் போன்ற நவீன தொழில்நுட்பங்களுக்கு ஏற்ற பல்வேறு திறன்களுக்காக மாநிலங்கள் திட்டமிட வேண்டும். நமது மக்கள்தொகை ஈவுத்தொகை (demographic dividend) காரணமாக நாம் உலகின் திறன் தலைநகராக மாற முடியும். திறன் மேம்பாட்டிற்காக மத்திய அரசு ரூ.60,000 கோடி திட்டத்தை ஒப்புதல் அளித்துள்ளது. நவீன பயிற்சி உள்கட்டமைப்பு மற்றும் கிராமப்புற பயிற்சி மையங்களில் மாநிலங்கள் கவனம் செலுத்த வேண்டும்."

சைபர் பாதுகாப்பு மற்றும் பசுமை எரிசக்தி:

சைபர் பாதுகாப்பை ஒரு சவாலாகவும், வாய்ப்பாகவும் பிரதமர் குறிப்பிட்டார். ஹைட்ரஜன் மற்றும் பசுமை ஆற்றல் துறைகளில் மகத்தான ஆற்றலும் வாய்ப்புகளும் உள்ளதாக அவர் வலியுறுத்தினார்.

சுற்றுலா வளர்ச்சி:

ஜி20 உச்சி மாநாடு இந்தியாவை ஒரு உலகளாவிய சுற்றுலா தலமாக அங்கீகரிக்க உதவியது. மாநிலங்கள் இந்த வாய்ப்பைப் பயன்படுத்திக் கொள்ள வேண்டும். உலகத் தரம் வாய்ந்த ஒரு சுற்றுலாத் தலத்தையாவது ஒவ்வொரு மாநிலமும் உருவாக்க வேண்டும் என்று அவர் கேட்டுக்கொண்டார். இந்தியாவில் 25-30 இத்தகைய சுற்றுலாத் தலங்களை உருவாக்க முடியும் என்றார்.

நகர்ப்புற வளர்ச்சி:

"இந்தியா வேகமாக நகரமயமாக்கி வருகிறது. நகரங்களை நிலைத்தன்மை மற்றும் வளர்ச்சியின் எஞ்சின்களாக மாற்ற மாநிலங்களைக் கேட்டுக்கொண்டார். அடுக்கு 2 மற்றும் அடுக்கு 3 நகரங்களில் கவனம் செலுத்த வலியுறுத்தினார். விதை நிதியாக ரூ.1 லட்சம் கோடி நகர்ப்புற சவால்கள் நிதி உருவாக்கப்பட்டு வருவதாகவும் அவர் குறிப்பிட்டார்.

பெண்கள் சக்தி:

இந்தியாவின் பெண்கள் சக்தியின் மகத்தான வலிமையை பிரதமர் வலியுறுத்தினார். பெண்கள் வளர்ச்சியின் பாதையில் இணைய உதவும் வகையில் சட்டங்களை மாற்றும்படி அவர் வலியுறுத்தினார். பணிபுரியும் பெண்களின் எளிதான பணிச்சூழலுக்கு முக்கியத்துவம் அளித்து பொது மற்றும் தனியார் துறைகளில் சீர்திருத்தங்கள் இருக்க வேண்டும் என்றும் அவர் குறிப்பிட்டார்.

நதி இணைப்பு மற்றும் வேளாண்மை:

நீர் பற்றாக்குறை மற்றும் வெள்ளத்தைத் தடுப்பதற்கும், மாநிலங்களுக்குள் நதிகளை இணைக்க மாநிலங்களை பிரதமர் ஊக்குவித்தார். கோசி-மோச்சி இணைப்புத் திட்டத்தைத் தொடங்கிவைத்த பீகார் மாநிலத்தைப் பாராட்டினார்.