ஆபரேஷன் சிந்தூர் எதிரொலி இந்தியாவில் 10 விமான நிலையங்கள் மூடல்; பள்ளிகளுக்கு விடுமுறை!

பஹல்காம் தீவிரவாதத் தாக்குதலுக்கு பதிலடியாக இந்திய ராணுவம் பாகிஸ்தானில் நடத்திய சர்ஜிக்கல் ஸ்ட்ரைக் காரணமாக ஜம்மு காஷ்மீரில் பாதுகாப்பு பலப்படுத்தப்பட்டு, பள்ளிகள் மற்றும் கல்லூரிகள் உட்பட பல கல்வி நிறுவனங்களுக்கு விடுமுறை அறிவிக்கப்பட்டுள்ளது. பல விமான நிலையங்கள் மூடப்பட்டுள்ளன.

10 Airports Closed After Operation Sindoor : பஹல்காம் தீவிரவாதத் தாக்குதலுக்கு பதிலடியாக இந்திய ராணுவம் பாகிஸ்தானில் நடத்திய சர்ஜிக்கல் ஸ்ட்ரைக் காரணமாக நாடு முழுவதும் உஷார் நிலையில் உள்ளது. ஜம்மு காஷ்மீரில் பாதுகாப்பு பலப்படுத்தப்பட்டுள்ளது. தலைநகர் டெல்லியிலும் கூடுதல் துணை ராணுவப் படையினர் குவிக்கப்பட்டுள்ளனர். டெல்லி லால் சதுக்கத்திலும் பாதுகாப்பு பலப்படுத்தப்பட்டுள்ளது.

மூடப்பட்ட 10 விமான நிலையங்கள் என்னென்ன?

ஜம்மு காஷ்மீர் உட்பட பத்து விமான நிலையங்கள் பாதுகாப்பு காரணங்களுக்காக மூடப்பட்டுள்ளன. ஸ்ரீநகர், ஜம்மு, தரம்சாலா, அமிர்தசரஸ், லே, ஜோத்பூர், புஜ், ஜாம்நகர், சண்டிகர், ராஜ்கோட் ஆகிய விமான நிலையங்கள் மூடப்பட்டுள்ளன. இந்த விமான நிலையங்களுக்கான ஏர் இந்தியா, இண்டிகோ, ஸ்பைஸ்ஜெட் விமான சேவைகள் ரத்து செய்யப்பட்டுள்ளன. ஸ்ரீநகர் விமான நிலையத்தை பாகிஸ்தான் ராணுவம் குறிவைத்ததாக வெளியான தகவல்கள் ஆதாரமற்றவை என்று மத்திய அரசு தெரிவித்துள்ளது. பாகிஸ்தானில் ஒன்பது இடங்களில் தீவிரவாத முகாம்களை இந்தியா தாக்கியுள்ளது.

ஜம்மு காஷ்மீர் பகுதியில் பள்ளிகளுக்கு விடுமுறை

பாதுகாப்புக் கருதி ஜம்மு காஷ்மீர் பகுதியில் உள்ள கல்வி நிறுவனங்களுக்கு விடுமுறை அறிவிக்கப்பட்டுள்ளது. ஜம்மு, சாம்பா, கத்வா, ராஜோரி, பூஞ்ச் ஆகிய பகுதிகளில் உள்ள அனைத்து கல்வி நிறுவனங்களுக்கும் விடுமுறை அறிவிக்கப்பட்டுள்ளது. பள்ளிகள் மற்றும் கல்லூரிகள் உட்பட அனைத்து கல்வி நிறுவனங்களுக்கும் விடுமுறை அறிவிக்கப்பட்டுள்ளது. காஷ்மீர் பகுதியில் குப்வாரா, பாரமுல்லா, குரேஸ் உட்பட பல பகுதிகளில் உள்ள கல்வி நிறுவனங்களுக்கும் விடுமுறை அறிவிக்கப்பட்டுள்ளது. எல்லைக் கட்டுப்பாட்டுக் கோட்டில் மோதல் தொடர்கிறது. பாதுகாப்பு முன்னெச்சரிக்கை நடவடிக்கையாக சிறப்பு அமைச்சரவைக் கூட்டம் நடைபெறும்.