6,250 பேருக்கு வேலைவாய்ப்பு... ரூ.3,201 கோடி முதலீடு ஒப்பந்தம்... ஜெர்மனியில் அசத்தும் முதல்வர்!

முதலமைச்சர் மு.க.ஸ்டாலினின் ஐரோப்பிய முதலீட்டுப் பயணத்தின் முதல் நாளில், ஜெர்மனியின் முன்னணி நிறுவனங்களுடன் ரூ. 3,201 கோடி மதிப்பிலான முதலீட்டு ஒப்பந்தங்கள் கையெழுத்தாகியுள்ளன. இதன் மூலம் தமிழகத்தில் 6,250 புதிய வேலைவாய்ப்புகள் உருவாகும்.

தமிழக முதலமைச்சர் மு.க. ஸ்டாலின், தனது ஐரோப்பிய முதலீட்டுப் பயணத்தின் முதல் நாளில், ஜெர்மனியின் முன்னணி நிறுவனங்களுடன் ரூ. 3,201 கோடி மதிப்பிலான முதலீட்டு ஒப்பந்தங்களில் கையெழுத்திட்டார். இதன் மூலம் தமிழகத்தில் சுமார் 6,250 புதிய வேலைவாய்ப்புகள் உருவாகும் என்று எதிர்பார்க்கப்படுகிறது.

இது குறித்து தனது எக்ஸ் பக்கத்தில் பதிவிட்டுள்ள தொழில்துறை அமைச்சர் டி.ஆர்.பி. ராஜா கூறியிருப்பதாவது:

"நார்டெக்ஸ் குழுமம் (Nordex Group) என்ற காற்றாலை விசையாழி உற்பத்தி நிறுவனம் தமிழகத்தில் ரூ. 1,000 கோடி முதலீடு செய்து, 2,500 பேருக்கு வேலைவாய்ப்பு அளிக்கும். இந்த முதலீடு, புதுப்பிக்கத்தக்க எரிசக்தி உற்பத்தியில் தமிழகத்தின் தலைமைத்துவத்தை மேலும் வலுப்படுத்தும்.

அதேபோல், ரயில்வே பாதுகாப்பு மற்றும் பிரேக்கிங் அமைப்புகளின் உலகளாவிய முன்னணி நிறுவனமான க்னோர்-பிரெம்ஸ் (Knorr-Bremse), தனது முதல் பெரிய உற்பத்தி ஆலையை தமிழகத்தில் அமைக்க ரூ. 2,000 கோடி முதலீடு செய்ய உள்ளது. இதன் மூலம் 3,500 புதிய வேலைவாய்ப்புகள் உருவாகும். இது ரயில்வே கதவுகள் மற்றும் பிரேக்கிங் அமைப்புகளுக்கான அதிநவீன ஆலையாக அமையும்.

மேலும், ஆற்றல் திறன் கொண்ட மோட்டார்கள் தயாரிப்பில் உலகத் தலைவரான இபிஎம்-பாப்ஸ்ட் (ebm-papst), தனது ஜி.சி.சி. மற்றும் உற்பத்தி தளத்தை தமிழகத்தில் விரிவாக்கம் செய்ய ரூ. 201 கோடி முதலீடு செய்யும். இந்த முதலீடு அடுத்த ஐந்து ஆண்டுகளில் 250 புதிய வேலைவாய்ப்புகளை உருவாக்கும்.

இந்த முதலீட்டு ஒப்பந்தங்களைத் தவிர, முதலமைச்சர் மு.க. ஸ்டாலின் பி.எம்.டபிள்யூ குழுமத்தின் மூத்த தலைவர்களையும் சந்தித்தார். தமிழகத்தில் ஏற்கனவே உள்ள வலுவான மின்சார வாகனங்கள் மற்றும் வாகன உற்பத்தி சூழலை சுட்டிக்காட்டி, அவர்களின் எதிர்கால விரிவாக்கங்களை தமிழகத்திலேயே மேற்கொள்ளுமாறு அவர் வலியுறுத்தினார். அதற்கு பி.எம்.டபிள்யூ. நிறுவனமும் தங்கள் உறுதிப்பாட்டை மீண்டும் உறுதிப்படுத்தியது.

இந்த முதலீடுகள், உலகளாவிய வர்த்தக மாற்றங்களுக்கு மத்தியில், தமிழக அரசின் கொள்கைகள், மனிதவளம் மற்றும் எதிர்கால வளர்ச்சித் திறனில் உள்ள நம்பிக்கையை பிரதிபலிக்கின்றன. தமிழக முதலமைச்சர் மு.க. ஸ்டாலின் தலைமையின் கீழ், தமிழகம் சவால்களை எதிர்கொண்டு முன்னேறி வருவதை இது காட்டுகிறது."

இவ்வாறு அமைச்சர் டி.ஆர்.பி. ராஜா கூறியுள்ளார்.