வாயை கொடுத்து மீசையை இழந்த LDF தொண்டர்.. இப்படி ஒரு சவால் தேவை தானா..?

Pathanamthitta: கேரளாவின் பத்தனம்திட்டா மாவட்டத்தில் LDF கட்சி தோல்வி அடைந்ததால் அக்கட்சியின் தொண்டர் ஒருவர் தனது மீசையை இழந்த சம்பவம் இணையத்தில் வைரலாகி வருகிறது.

கேரளா மாநிலத்தில் உள்ளாட்சி தேர்தல் முடிவுகள் சனிக்கிழமை வெளியாகி அதிரடி மாற்றங்களை ஏற்படுத்தி உள்ளது. அந்த வகையில் பத்தனம்திட்டா மாவட்டத்தில் நீண்டகால அரசியல் முறையை மீறி, ஐக்கிய ஜனநாயக முன்னணி (UDF), பத்தனம்திட்டாவில் ஒரு தீர்க்கமான திருப்புமுனையை அடைந்துள்ளது, இடது ஜனநாயக முன்னணியிடமிருந்து (LDF) மாவட்ட பஞ்சாயத்து மற்றும் பெரும்பாலான உள்ளாட்சி அமைப்புகளின் கட்டுப்பாட்டைக் கைப்பற்றியுள்ளது.

மீசை போச்சே..

முன்னதாக பத்தனம்திட்டா மாவட்டத்தில் LDF வெற்றிபெறவில்லை என்றால் எனது மீசையை வழித்துக் கொள்வேன் என அக்கட்சி தொண்டரான பாபு வர்கீஸ் சவால் விடுத்திருந்தார். ஆனால் அவரது ஆசையை பொய்யாக்கும் வகையில் மாவட்டத்தில் UDF வெற்றி பெற்றது. இந்த நிலையில் பாபு வர்கீஸ் தனது சவாலை நிறைவேற்றும் விதமாக தனது மீசையை முழுவதுமாக வழித்துக் கொண்டார். இந்த வீடியோ இணையத்தில் தற்போது வைரலாகி வருகிறது.

பட்டாம்பி நகராட்சியில் எல்.டி.எஃப் சுயேட்சை வேட்பாளர் பூஜ்ஜியம் வாக்குகள் பெற்றுள்ளார். மோதிரம் சின்னத்தில் போட்டியிட்ட 12-வது வார்டு வேட்பாளர் அப்துல் கரீமுக்கு ஒரு வாக்கு கூட கிடைக்கவில்லை. வெல்ஃபேர் கட்சி ஆதரவு பெற்ற சுயேட்சை வேட்பாளர் சாஜித் கே.பி-க்கு எல்.டி.எஃப் வாக்களித்ததாகக் குற்றச்சாட்டு எழுந்துள்ளது. இங்கு யு.டி.எஃப்-ன் முஸ்லிம் லீக் வேட்பாளர் டி.பி. உஸ்மான் வெற்றி பெற்றார். வாக்குப்பதிவு நாளன்று லீக் - வெல்ஃபேர் கட்சி தொண்டர்களிடையே வாக்குவாதம் ஏற்பட்டது. இதற்கிடையில், கடந்த முறை எல்.டி.எஃப் வென்ற பட்டாம்பி நகராட்சி ஆட்சியை இந்த முறை யு.டி.எஃப் கைப்பற்றியுள்ளது. யு.டி.எஃப் 17 இடங்களையும், எல்.டி.எஃப் 6 இடங்களையும் வென்றன. என்.டி.ஏ ஒரு இடத்தைக் கைப்பற்றியது.

மன்னார்க்காட்டில் ஒரு வாக்கு

அதே சமயம், மன்னார்க்காடு நகராட்சியில் எல்.டி.எஃப் வேட்பாளர் ஒரு வாக்கு மட்டும் பெற்றது விவாதப் பொருளாகியுள்ளது. டிவி சின்னத்தில் ஒன்றாம் வார்டு குந்திப்புழாவில் போட்டியிட்ட எல்.டி.எஃப் சுயேட்சை வேட்பாளர் ஃபிரோஸ்கானுக்கு ஒரே ஒரு வாக்கு மட்டுமே கிடைத்தது. யு.டி.எஃப்-ன் முஸ்லிம் லீக் வேட்பாளர் கே.சி. அப்துல் ரஹ்மான் 301 வாக்குகள் பெற்று வார்டில் வெற்றி பெற்றார். வார்டில் வெல்ஃபேர் கட்சி சுயேட்சை வேட்பாளர் சித்திக் குந்திப்புழா 179 வாக்குகளும், மற்றொரு சுயேட்சை 65 வாக்குகளும், பாஜக 8 வாக்குகளும் பெற்றன. வார்டில் எல்.டி.எஃப் - வெல்ஃபேர் கட்சி இடையே உடன்பாடு இருந்ததாகக் குற்றச்சாட்டு எழுந்தது. இதன் பின்னணியில், கடைசி கட்டத்தில்தான் எல்.டி.எஃப் வேட்பாளர் நிறுத்தப்பட்டார். இங்கும் கட்சியினரே காலை வாரிவிட்டதாகக் குற்றச்சாட்டு எழுந்துள்ளது.