மனித மேம்பாட்டு குறியீட்டில் இந்தியா 130வது இடத்துக்கு முன்னேற்றம்
சுருக்கம்
இந்தியா மனித மேம்பாட்டு குறியீட்டு தரவரிசை 2023ல் 130வது இடத்திற்கு உயர்ந்துள்ளது. மக்களின் ஆயுட்காலம், கல்வி மற்றும் வருமானத்தில் ஏற்பட்ட முன்னேற்றங்களால் இது சாத்தியமாகியுள்ளது.
ஐக்கிய நாடுகள் சபையின் மேம்பாட்டுத் திட்டத்தால் வெளியிடப்பட்ட 2025 மனித மேம்பாட்டு அறிக்கையில் (HDR) இந்தியா 193 நாடுகளில் 130வது இடத்தைப் பிடித்துள்ளது. 2022ல் 0.676 ஆக இருந்த மனித மேம்பாட்டு குறியீட்டு மதிப்பு 2023ல் 0.685 ஆக உயர்ந்துள்ளது. இதன் மூலம் இந்தியா நடுத்தர மனித மேம்பாட்டுப் பிரிவில் தொடர்ந்து முன்னேறி வருகிறது. உயர் மனித மேம்பாட்டுக்கான (HDI >= 0.700) வரம்பையும் நெருங்கி வருகிறது.
"AI யுகத்தில் மக்களும் சாத்தியங்களும்" என்ற தலைப்பில் வெளியிடப்பட்டுள்ள 2025 HDR அறிக்கை, குறிப்பாக இந்தியா போன்ற வேகமாக வளரும் பொருளாதாரங்களில் மனித மேம்பாட்டின் அடுத்த அத்தியாயத்தை வடிவமைப்பதில் செயற்கை நுண்ணறிவின் முக்கிய பங்கை எடுத்துக்காட்டுகிறது.
குறிப்பிடத்தக்க முன்னேற்றம்:
"மனித மேம்பாட்டு குறியீட்டில் இந்தியா குறிப்பிடத்தக்க முன்னேற்றம் அடைந்துள்ளதற்கு நாங்கள் வாழ்த்துகிறோம். 2022ல் 133வது இடத்தில் இருந்து 2023ல் 130வது இடத்திற்கு உயர்ந்துள்ளது. சராசரி பள்ளிப்படிப்பு ஆண்டுகள் மற்றும் தனிநபர் தேசிய வருமானம் போன்ற முக்கிய பரிமாணங்களில் நிலையான முன்னேற்றங்களை இந்த முன்னேற்றம் பிரதிபலிக்கிறது. குறியீடு தொடங்கப்பட்டதிலிருந்து இந்தியாவின் ஆயுட்காலம் அதன் உயர்ந்த நிலையை எட்டியுள்ளது. இது தொற்றுநோயிலிருந்து நாட்டின் வலுவான மீட்சிக்கும், நீண்டகால மனித நல்வாழ்வுக்கான அதன் முதலீடுகள் மற்றும் அர்ப்பணிப்புக்கும் சான்றாகும். பெண்கள் தலைமையிலான மேம்பாடு, அனைவருக்கும் தரமான கல்வி மற்றும் சுகாதாரம் ஆகியவற்றில் புதுப்பிக்கப்பட்ட கவனம் செலுத்துவதன் மூலம், உள்ளடக்கிய வளர்ச்சியையும் மனித மேம்பாட்டில் தொடர்ச்சியான முன்னேற்றத்தையும் அடைய இந்தியா நல்ல நிலையில் உள்ளது," என்று UNDP க்கான இந்தியாவின் பிரதிநிதி ஏஞ்சலா லூசிஜி கூறினார்.
1990 முதல் இந்தியாவின் HDI மதிப்பு 53 சதவீதத்திற்கும் அதிகமாக அதிகரித்துள்ளது. இது உலக மற்றும் தெற்காசிய சராசரிகளை விட வேகமாக வளர்ந்துள்ளது. பொருளாதார வளர்ச்சி மற்றும் இலக்கு சமூகப் பாதுகாப்பு மற்றும் நலத்திட்டங்களால் இந்த முன்னேற்றம் ஏற்பட்டுள்ளது.
ஆயுள்காலம் உயர்வு:
1990ல் 58.6 ஆண்டுகளாக இருந்த ஆயுட்காலம் 2023ல் 72 ஆண்டுகளாக உயர்ந்துள்ளது. இது குறியீடு தொடங்கப்பட்டதிலிருந்து பதிவு செய்யப்பட்ட மிக உயர்ந்த அளவாகும். தேசிய ஊரக சுகாதார இயக்கம், ஆயுஷ்மான் பாரத், ஜனனி சுரக்ஷா யோஜனா மற்றும் போஷன் அபியான் போன்ற தொடர்ச்சியான அரசாங்கங்களின் தேசிய சுகாதாரத் திட்டங்கள் இந்த சாதனைக்கு குறிப்பிடத்தக்க பங்களிப்பைச் செய்துள்ளன.
இன்று குழந்தைகள் சராசரியாக 13 ஆண்டுகள் பள்ளியில் படிக்க வேண்டும் என்று எதிர்பார்க்கப்படுகிறது. இது 1990ல் 8.2 ஆண்டுகளாக இருந்தது. கல்வி உரிமைச் சட்டம், சமக்ரா சிக்ஷா அபியான், தேசிய கல்விக் கொள்கை 2020 போன்ற முயற்சிகள் விளைவுகளை மேம்படுத்தியுள்ளன. இருப்பினும், தரம் மற்றும் கற்றல் விளைவுகள் தொடர்ந்து கவனம் செலுத்த வேண்டிய பகுதிகளாகவே உள்ளன.
பொருளாதார முன்னணியில், இந்தியாவின் தனிநபர் மொத்த தேசிய வருமானம் நான்கு மடங்குக்கு மேல் உயர்ந்துள்ளது. 1990ல் 2167.22 அமெரிக்க டாலராக இருந்தது 2023ல் 9046.76 அமெரிக்க டாலராக உயர்ந்துள்ளது. பல ஆண்டுகளாக, மகாத்மா காந்தி தேசிய ஊரக வேலை உறுதித் திட்டம், ஜன் தன் யோஜனா மற்றும் டிஜிட்டல் உள்ளடக்கம் போன்ற திட்டங்களில் இந்தியாவின் பொருளாதார வளர்ச்சி மற்றும் முதலீடுகள் வறுமை ஒழிப்புக்கு பங்களித்துள்ளன. குறிப்பாக, 2015-16 மற்றும் 2019-21க்கு இடையில் 13.5 கோடி இந்தியர்கள் பல பரிமாண வறுமையிலிருந்து விடுபட்டுள்ளனர்.