DRDO: போர் விமானம் விபத்துக்குள்ளானாலும் விமானி சேஃப்.. சாதித்து காட்டிய இந்தியா

போர் விமானங்களுக்கான 'உள்நாட்டு எஸ்கேப் சிஸ்டத்தை' DRDO வெற்றிகரமாக சோதித்துள்ளது. சண்டிகரில் மணிக்கு 800 கி.மீ வேகத்தில் நடந்த சோதனையில், மாதிரி விமானி பாதுகாப்பாக வெளியேற்றப்பட்டார். இந்த அமைப்பு மோசமான சூழலிலும் நம்பகமானது.

பாதுகாப்புத் துறையில் இந்தியா மேலும் ஒரு புதிய சாதனையை படைத்துள்ளது. போர் விமான விபத்தின் போது விமானியின் உயிரைக் காப்பாற்றும் 'உள்நாட்டு எஸ்கேப் சிஸ்டத்தை' டிஆர்டிஓ வெற்றிகரமாக சோதித்துள்ளது. சோதனையின் போது, இந்த அமைப்பு மாதிரி விமானியை விமானத்தில் இருந்து பாதுகாப்பாக வெளியேற்றும் பணியை நிறைவு செய்தது.

மணிக்கு 800 கி.மீ வேகத்தில் சோதனை

பாதுகாப்பு ஆராய்ச்சி மற்றும் மேம்பாட்டு அமைப்பு (DRDO) போர் விமான எஸ்கேப் சிஸ்டத்தின் அதிவேக ராக்கெட்-ஸ்லெட் சோதனையை வெற்றிகரமாக நடத்தியதாக பாதுகாப்பு அமைச்சகம் செவ்வாய்க்கிழமை தெரிவித்தது. இந்த சோதனை, விமானி வெளியேற்றும் அமைப்பு மிகவும் மோசமான சூழ்நிலைகளிலும் துல்லியமாகவும் பாதுகாப்பாகவும் செயல்படுவதை நிரூபித்துள்ளது. சண்டிகரில் உள்ள டெர்மினல் பாலிஸ்டிக்ஸ் ஆராய்ச்சி ஆய்வகத்தின் (TBRL) ரயில் டிராக் ராக்கெட் ஸ்லெட் (RTRS) வசதியில், மணிக்கு 800 கி.மீ வேகத்தில் இந்த சோதனை நடத்தப்பட்டதாக அமைச்சகம் ஒரு வீடியோவுடன் சமூக ஊடக பதிவில் கூறியுள்ளது.

விமானியை இந்த அமைப்பு எப்படி பாதுகாப்பாக வெளியேற்றும்?

பாதுகாப்பு அமைச்சகம் பகிர்ந்த வீடியோ கிளிப்பில், ஒரு மாதிரி விமானியை காக்பிட்டிலிருந்து வெளியேற்றி, பாராசூட் மூலம் பாதுகாப்பாக தரையிறக்கும் சோதனை காட்டப்பட்டுள்ளது. ஒரு போர் விமானம் ஆபத்தான நிலையில் இருக்கும்போது, இந்த அமைப்பு எப்படி பாதுகாப்பான வெளியேற்றத்தை உறுதி செய்யும் என்பதை வீடியோ காட்டுகிறது. பாதுகாப்பு அமைச்சகத்தின்படி, இந்த சோதனை நவீன எஸ்கேப் அமைப்பின் மூன்று முக்கிய பகுதிகளான கேனோபி செவரன்ஸ், வெளியேற்ற வரிசைமுறை மற்றும் முழுமையான விமானி மீட்பு ஆகியவற்றை வெற்றிகரமாக செய்து காட்டியது.

பாதுகாப்பு அமைச்சர் ராஜ்நாத் சிங் பாராட்டு

இந்த வெற்றிக்கு பாதுகாப்பு அமைச்சர் ராஜ்நாத் சிங், டிஆர்டிஓ, இந்திய விமானப்படை, ஏடிஏ, எச்ஏஎல் மற்றும் தொழில் கூட்டாளிகளுக்கு வாழ்த்து தெரிவித்துள்ளார். மேலும், இது இந்தியாவின் உள்நாட்டு பாதுகாப்பு திறன்களை வலுப்படுத்தும் ஒரு முக்கிய மைல்கல் என்று அவர் குறிப்பிட்டார். இது பாதுகாப்பு தொழில்நுட்பத்தில் இந்தியாவின் வளர்ந்து வரும் தற்சார்புக்கு ஒரு எடுத்துக்காட்டாகும்.