3வது தமிழர்: நாட்டின் 15வது குடியரசு துணைத்தலைவராக இன்று பொறுப்பேற்கிறார் சி.பி.ராதாகிருஷ்ணன்
சுருக்கம்
நாட்டின் 15வது குடியரசு துணைத்தலைவராக சி.பி.ராதாகிருஷ்ணன் இன்று பதவியேற்கிறார். குடியரசு தலைவர் திரௌபதி முர்மு அவருக்கு பதவிப்பிரமாணம் செய்து வைக்கிறார்.
இந்தியாவின் புதிய குடியரசு துணைத் தலைவராக தேர்ந்தெடுக்கப்பட்ட சி.பி. ராதாகிருஷ்ணன் இன்று (ஆகஸ்ட் 12) காலை 10 மணிக்கு பதவியேற்றுக் கொள்கிறார். குடியரசு தலைவர் திரௌபதி முர்மு அவருக்கு பதவிப் பிரமாணம் செய்து வைக்கிறார். இந்த விழா, குடியரசு தலைவர் மாளிகையில் நடைபெற உள்ளது. முன்னாள் மகாராஷ்டிரா ஆளுநரான சி.பி. ராதாகிருஷ்ணன், செப்டம்பர் 9 ஆம் தேதி குடியரசு துணைத்தலைவராக தேர்ந்தெடுக்கப்பட்டார். எதிர்க்கட்சி வேட்பாளர் பி. சுதர்சன் ரெட்டியைத் தோற்கடித்து ஸ்ரீஇந்தப் பதவியைப் பெற்றார். முன்னாள் குடியரசு துணைத்தலைவர் ஜகதீப் தன்கர் ஜூலை 21 ஆம் தேதி திடீரென ராஜினாமா செய்ததைத் தொடர்ந்து இந்தத் தேர்தல் நடத்தப்பட்டது.
15வது குடியரசு துணைத்தலைவராகும் சி.பி. ராதாகிருஷ்ணன்
சி.பி. ராதாகிருஷ்ணன் இந்தியாவின் 15வது குடியரசு துணைத்தலைவராவார். செவ்வாய்க்கிழமை நடைபெற்ற தேர்தலில், மொத்தம் 781 எம்.பி.க்களில் 767 பேர் வாக்களித்தனர். அதாவது 98.2 சதவீத வாக்குகள் பதிவாகின. ராஜ்யசபா பொதுச் செயலாளரும் தேர்தல் அதிகாரியுமான பி.சி. மோடி இதனை அறிவித்தார். ராதாகிருஷ்ணனுக்கு 452 வாக்குகளும், எதிர்க்கட்சி வேட்பாளர் பி. சுதர்சன் ரெட்டிக்கு 300 வாக்குகளும் கிடைத்தன. தேர்தல் முடிவுகள் வெளியான பிறகு, பிரதமர் நரேந்திர மோடி, சி.பி. ராதாகிருஷ்ணனுக்கு வாழ்த்து தெரிவித்தார்.
ஜார்க்கண்ட் மற்றும் மகாராஷ்டிரா ஆளுநர்
சி.பி. ராதாகிருஷ்ணன் தமிழ்நாட்டின் திருப்பூர் மாவட்டத்தில் பிறந்தார். 17 வயதிலிருந்தே ஆர்.எஸ்.எஸ். உடன் தொடர்பு கொண்டிருந்தார். அவரது அரசியல் வாழ்க்கை 1998 இல் தொடங்கியது. அப்போது அவர் கோயம்புத்தூரில் இருந்து பா.ஜ.க. எம்.பி.யாகத் தேர்ந்தெடுக்கப்பட்டார். அடல் பிஹாரி வாஜ்பாய் அரசாங்கத்தில், அவர் தொடர்ந்து இரண்டு முறை லோக் சபாவுக்குச் சென்றார். பின்னர், அவர் தமிழ்நாடு பா.ஜ.க. தலைவராகவும், கட்சியின் தேசிய செயற்குழு உறுப்பினராகவும் இருந்தார். 2016 முதல் 2020 வரை கோயர் வாரியத் தலைவராக இருந்த ராதாகிருஷ்ணன், பலமுறை லோக் சபா தேர்தலில் போட்டியிட்டார். 2023 இல் ஜார்க்கண்ட் ஆளுநராக நியமிக்கப்பட்ட அவர், பழங்குடி சமூகங்களின் மேம்பாட்டிற்காகப் பணியாற்றினார். பின்னர், 2024 இல் மகாராஷ்டிராவின் 24வது ஆளுநரானார். அவரது நட்புறவு மற்றும் எதிர்க்கட்சிகளுடனான நல்லுறவுக்காக அவர் அறியப்படுகிறார்.