சத்தீஸ்கர் ரயில் விபத்துக்கு தகுதியற்ற ஓட்டுநர் தான் காரணம்.. விசாரணை அறிக்கையில் அதிர்ச்சி தகவல்!

சத்தீஸ்கரில் நடந்த ரயில் விபத்துக்கு, தகுதியற்ற லோகோ பைலட்டே காரணம் என விசாரணை அறிக்கை கூறுகிறது. பாதுகாப்பு விதிகள் அறியாமலும், தகுதித் தேர்வில் தோல்வியடைந்தும் ரயிலை இயக்கியதால், சிவப்பு சிக்னலை மீறி சரக்கு ரயில் மீது மோதி விபத்து ஏற்பட்டுள்ளது.

சத்தீஸ்கரில் கடந்த மாதம் விபத்துக்குள்ளான ரயிலின் ஓட்டுநர் (லோகோ பைலட்) பயணிகளின் அடிப்படைப் பாதுகாப்பு விதிகள் பற்றித் துளியும் அறியாதவராக இருந்ததால் விபத்து நடந்துள்ளது என விசாரணை அறிக்கை மூலம் தெரியவந்துள்ளது. அந்த ஓட்டுநர் ரயிலை இயக்கத் தகுதியற்றவர் என்றும் அந்த அறிக்கையில் கூறப்பட்டுள்ளது.

இந்த அறிக்கை டிசம்பர் 8ஆம் தேதி ரயில்வே வாரியத்திற்கு அனுப்பப்பட்டது.

கடந்த நவம்பர் 4ஆம் தேதி, MEMU ரயில் சிவப்பு விளக்கு சிக்னலை மீறி வேகமாகச் சென்று, நின்றுகொண்டிருந்த சரக்கு ரயில் மீது மோதியது. இந்தக் கோர விபத்தில் லோகோ பைலட் உட்பட 12 பேர் பலியாகினர்; 19 பேர் காயமடைந்தனர்.

தகுதித் தேர்வில் தோல்வி

தென்கிழக்கு மத்திய ரயில்வேயின் பிலாஸ்பூர் பிரிவில் நடந்த இந்த விபத்து குறித்து விசாரணை நடத்திய ரயில்வே பாதுகாப்பு ஆணையர் பிரிஜேஷ் குமார் மிஸ்ரா, லோகோ பைலட்டிடம் MEMU ரயிலை இயக்குவதற்கான தகுதிகள் இல்லை என்று தனது அறிக்கையில் குறிப்பிட்டுள்ளார். அவர் MEMU ரயிலில் பணியாற்றத் தகுதியற்றவர் என்று திட்டவட்டமாக அவர் கூறியுள்ளார்.

லோகோ பைலட் இந்த ஆண்டு ஜூன் 9 அன்று நடந்த ஒரு 'திறனறி தேர்வில்' (Aptitude Test) தோல்வி அடைந்ததாக மிஸ்ரா தெரிவித்துள்ளார். மேலும், கடந்த ஆண்டு நவம்பர் 22ஆம் தேதி நடத்தப்பட்ட செயல்திறன் மதிப்பீட்டில், 'பாதுகாப்பு அறிவு' பிரிவில் அவர் 7-க்கு வெறும் 2 மதிப்பெண்கள் மட்டுமே பெற்றிருந்தார்.

ரயில் ஓடிக்கொண்டிருந்தபோது அவர் தலைமை லோகோ ஆய்வாளரை (Chief Loco Inspector) இரண்டு முறை தொலைபேசியில் தொடர்புகொண்டு மிகச் சிறிய சந்தேகங்களைக்கூடக் கேட்டுள்ளார். இது அவரது அறிவின்மையைக் காட்டுவதாக அறிக்கை கூறியுள்ளது.

சிக்னல் விதிமீறல்

லோகோ பைலட் சிக்னல் விதிகளையும் மீறியுள்ளார். ஒரு சிக்னல் 'மஞ்சள்' நிலையில் இருக்கும்போது, ஓட்டுநர் சரியான வேகத்தில் சென்றுள்ளார். அடுத்த சிக்னலில் நிற்கத் தயாராக இருந்திருக்க வேண்டும். ஆனால், அவர் அடுத்து சிவப்பு சிக்னல் வந்ததும் நிற்காமல் சென்றுள்ளார்.

மேலும், அதிக வேகத்தில் சென்றபோது, உடனடியாக அவசரகால பிரேக்குகளைப் பயன்படுத்த உதவி லோகோ பைலட்டுக்கு அதிகாரம் உள்ளது. ஆனால், அவரும் அதைச் செய்யவில்லை. இது, லோகோ பைலட் அல்லது உதவி லோகோ பைலட் என இருவருமே ரயிலைக் கட்டுப்படுத்த சரியான நேரத்தில் நடவடிக்கை எடுக்கவில்லை என்பதைக் காட்டுகிறது.

இதனால்தான் ரயில் வேகமாகச் சென்று சரக்கு ரயிலுடன் மோதியது என்று விசாரணை அதிகாரி மிஸ்ரா தனது அறிக்கையில் குறிப்பிட்டுள்ளார்.

லோகோ பைலட் மது அருந்தியனாரா?

இறந்த லோகோ பைலட்டின் உடலை மருத்துவர்களோ ரயில் பாதுகாப்பு அதிகாரிகளோ பார்வையிடவில்லை. ஆனால் அதற்குள் உடல் பிரேதப் பரிசோதனைக்கு உட்படுத்தப்படாமலே அப்புறப்படுத்தப்பட்டுள்ளது. இதனால் அவர் மது அருந்தியிருந்தாரா என்பதைக் கண்டறிய முடியவில்லை.

உதவி லோகோ பைலட்டின் இரத்த ஆல்கஹால் அளவு மருத்துவ கையேட்டில் அனுமதிக்கப்பட்டுள்ள அளவைவிட அதிகமாக இருந்தது மருத்துவ சோதனையில் தெரிந்துள்ளது. இருப்பினும், பல வளர்சிதை மாற்ற காரணங்களால் இரத்தத்தில் ஆல்கஹால் அளவு உயரக்கூடும் என்றும் மருத்துவர்கள் தெரிவித்துள்ளனர்.