2028ல் விண்ணில் பாயும் சந்திரயான்-4! மிகவும் சவாலான பயணமாக இருக்கும் என இஸ்ரோ தகவல்!

இஸ்ரோ தலைவர் வி. நாராயணன், 2028-ல் சந்திரயான்-4 திட்டம் மற்றும் 2035-க்குள் இந்திய விண்வெளி நிலையம் அமைப்பது போன்ற முக்கிய திட்டங்களை அறிவித்துள்ளார். ககன்யான் திட்டம் 2027-ல் செயல்படுத்தப்படும் என்றும் அவர் உறுதிப்படுத்தியுள்ளார்.

இந்திய விண்வெளி ஆய்வு நிறுவனம் (ISRO) நடப்பு நிதியாண்டில் மேலும் ஏழு திட்டங்களைச் செயல்படுத்தத் திட்டமிடப்பட்டுள்ளதாகவும், 2028ஆம் ஆண்டில் சந்திரயான்-4 விண்ணில் செலுத்தப்படும் என்றும் இஸ்ரோ தலைவர் வி. நாராயணன் கூறியுள்ளார். மனிதனை விண்வெளிக்கு அனுப்பும் ககன்யான் திட்டம், இந்திய விண்வெளி நிலையம் குறித்தும் முக்கிய அறிவிப்புகளை வெளியிட்டுள்ளார்.

நிலவில் இருந்து மாதிரிகள் திரட்டும் இஸ்ரோ

இந்தியாவின் மிகச் சவாலான நிலவுப் பயணமாக கருதப்படும் சந்திரயான்-4 திட்டத்திற்கு மத்திய அரசு ஒப்புதல் அளித்துள்ளதை இஸ்ரோ தலைவர் உறுதிப்படுத்தியுள்ளார். இது நிலவின் மாதிரிகளை பூமிக்குத் திரும்பக் கொண்டுவரும் பயணமாகும் (Lunar Sample-Return Mission).

"சந்திரயான்-4-ஐ 2028-ஆம் ஆண்டுக்குள் ஏவ இலக்கு வைத்துள்ளோம்," என்று வி. நாராயணன் தெரிவித்தார். இதுவரை அமெரிக்கா, ரஷ்யா மற்றும் சீனா ஆகிய நாடுகள் மட்டுமே நிலவில் இருந்து மாதிரிகளைத் திரும்பக் கொண்டுவந்துள்ளன. இந்தப் பட்டியலில் இந்தியாவும் இணையும்.

இந்திய விண்வெளி நிலையம்

இஸ்ரோ தற்போது இந்திய விண்வெளி நிலையத்தை உருவாக்கும் பணியைத் தொடங்கியுள்ளது. இது 2035-ஆம் ஆண்டுக்குள் நிறைவடையும் என்று எதிர்பார்க்கப்படுகிறது. இந்த விண்வெளி நிலையத்தின் ஐந்து தொகுதிகளில், முதல் தொகுதி 2028-ஆம் ஆண்டுக்குள் சுற்றுப்பாதையில் நிலைநிறுத்தப்படும்.

இந்த லட்சியத் திட்டத்தின் மூலம், அமெரிக்கா மற்றும் சீனாவுக்குப் பிறகு சொந்த விண்வெளி நிலையத்தை இயக்கும் மூன்றாவது பெரிய நாடாக இந்தியா உருவெடுக்கும்.

ககன்யான் திட்டம்

இந்தியாவின் முதல் மனித விண்வெளிப் பயணமான ககன்யான் குறித்து பேசிய இஸ்ரோ தலைவர், ஆளில்லா சோதனைப் பயணங்களின் அட்டவணை மட்டுமே மாற்றப்பட்டுள்ளதாகத் தெளிவுபடுத்தினார்.

"ககன்யான் பயணம் 2025-ஆம் ஆண்டில் செயல்படுத்தும் திட்டம் இருந்தது. ஆனால், இப்போது 2027-ஆம் ஆண்டிற்கு திட்டமிடப்பட்டது, அந்த இலக்கை நோக்கிப் பணியாற்றுகிறோம்," என்று அவர் கூறினார். இந்திய விண்வெளி வீரர்களை ஏற்றிச் செல்லும் முதல் பயணத்திற்கு முன் மூன்று ஆளில்லா சோதனைப் பயணங்கள் நடைபெறும் என்றும் அவர் குறிப்பிட்டார்.

முதல் தனியார் PSLV ராக்கெட்

நடப்பு நிதியாண்டின் இறுதிக்குள் திட்டமிடப்பட்டுள்ள ஏழு ஏவுதல்களில், இந்தியத் தொழில்துறையால் முழுமையாக உருவாக்கப்பட்ட முதல் PSLV ராக்கெட் முக்கிய மைல்கல்லாக இருக்கும்.

இந்த ஏவுதல்களில் வணிகத் தகவல் தொடர்பு செயற்கைக்கோள் மற்றும் பல PSLV, GSLV திட்டங்களும் அடங்கும்.

விண்வெளிப் பயணங்களுக்கான அதிகரித்து வரும் தேவையைப் பூர்த்தி செய்ய, இஸ்ரோ அடுத்த மூன்று ஆண்டுகளில் அதன் வருடாந்திர விண்கல உற்பத்தியை மூன்று மடங்காக அதிகரிக்க இலக்கு வைத்துள்ளது.

மோடியின் 2040 இலக்கு

பிரதமர் நரேந்திர மோடி, 2040-ஆம் ஆண்டுக்குள் இந்திய விண்வெளி வீரர்களை நிலவுக்கு வெற்றிகரமாக அனுப்பி, அவர்களைப் பாதுகாப்பாகத் திரும்பக் கொண்டுவருவதற்கான நீண்ட காலத் திட்டத்தை உருவாக்க இஸ்ரோவுக்கு அறிவுறுத்தியுள்ளார்.