ரொட்டி கருகாமல் ஓட்டு போடுங்க.. என் மகன் தேஜஸ்வி முதல்வராகணும்.. லாலு விருப்பம்!

பீகார் சட்டமன்றத் தேர்தலின் முதல் கட்டத்தில் வாக்களித்த லாலு பிரசாத் யாதவ், அரசியலை 'ரொட்டி' சுடுவதோடு ஒப்பிட்டுப் பேசினார். இருபது ஆண்டுகள் போதும் என்றும், தனது மகன் தேஜஸ்வி யாதவ் தலைமையில் பீகாருக்கு மாற்றம் தேவை என்றும் அவர் வலியுறுத்தினார்.

பீகார் சட்டமன்றத் தேர்தலின் முதல் கட்ட வாக்குப்பதிவில் வாக்களித்த பிறகு, ராஷ்டிரிய ஜனதா தளம் (RJD) கட்சியின் மூத்த தலைவர் லாலு பிரசாத் யாதவ் அரசியலையும், மக்களாட்சியையும் 'ரொட்டி' சுடுவதற்கு ஒப்பிட்டுப் பேசியுள்ளார்.

மாநிலத்தில் மாற்றம் தேவை என்று வலியுறுத்திய அவர், தனது மகன் தேஜஸ்வி யாதவுக்கு ஆதரவாகக் குரல் கொடுத்துள்ளார்.

பாட்னாவில் உள்ள வாக்குச் சாவடியில் தனது மகனும் எதிர்க்கட்சித் தலைவருமான தேஜஸ்வி யாதவ், மனைவியும் முன்னாள் முதல்வருமான ராப்ரி தேவி ஆகியோருடன் சென்று வாக்களித்தார்.

ரொட்டி கருகிவிடும்

வாக்களித்த பின்னர் பேசிய லாலு பிரசாத் யாதவ், "சூடான தவாவில் ரொட்டியைப் போடும்போது, அதைத் தொடர்ந்து திருப்பிப் போட்டுக்கொண்டே இருக்க வேண்டும், இல்லையெனில் அது கருகிவிடும். இருபது ஆண்டுகள் போதும். தேஜஸ்வி (யாதவ்) தலைமையிலான அரசாங்கம் ஒரு புதிய பீகாருக்கு மிகவும் முக்கியம்," என்று அவர் வலியுறுத்தினார்.

லாலு பிரசாத் யாதவ் தலைமையிலான ராஷ்டிரிய ஜனதா தளத்தை வீழ்த்தி, நிதிஷ் குமார் தலைமையிலான ஐக்கிய ஜனதா தளம் (JDU) 2005 ஆம் ஆண்டு பீகாரில் ஆட்சிக்கு வந்தது குறிப்பிடத்தக்கது.

நிதிஷ் குமாரின் வேண்டுகோள்

லாலு யாதவின் தீவிர அரசியல் எதிரியும், முதலமைச்சருமான நிதிஷ் குமார், பக்டியார்பூரில் தனது வாக்கைப் பதிவு செய்தார்.

"மக்களாட்சியில் வாக்களிப்பது நமது உரிமை மட்டுமல்ல, நமது பொறுப்பும் ஆகும். இன்று பீகாரில் முதல் கட்டத் தேர்தல் நடைபெறுகிறது. அனைவரும் வாக்களிக்க வேண்டும் என்று கேட்டுக்கொள்கிறேன். நீங்கள் வாக்களித்து மற்றவர்களுக்கும் ஊக்கமளியுங்கள்," என்று அவர் வேண்டுகோள் விடுத்தார்.

முதல் கட்டத் தேர்தல் விவரங்கள்

பீகார் சட்டமன்றத் தேர்தலின் முதல் கட்ட வாக்குப்பதிவு இன்று (நவம்பர் 6) 18 மாவட்டங்களில் உள்ள மொத்தமுள்ள 121 சட்டமன்றத் தொகுதிகளில் நடைபெறுகிறது. எஞ்சிய 122 தொகுதிகளுக்கான இரண்டாம் கட்ட வாக்குப்பதிவு நவம்பர் 11 அன்றும், வாக்கு எண்ணிக்கை நவம்பர் 14 அன்றும் நடைபெறும்.

தேசிய ஜனநாயகக் கூட்டணியில் ஆளும் ஐக்கிய ஜனதா தளம் (JDU), பாரதிய ஜனதா கட்சி (BJP), சிராக் பஸ்வானின் லோக் ஜனசக்தி கட்சி, மற்றும் ஜிதன் ராம் மாஞ்சியின் இந்துஸ்தானி அவாம் மோர்ச்சா (செக்யூலர்) ஆகிய கட்சிகள் அங்கம் வகிக்கின்றன.

எதிர்க்கட்சிகளின் மகாகத்பந்தன் கூட்டணியில் ராஷ்டிரிய ஜனதா தளம் (RJD), காங்கிரஸ், இடதுசாரி கட்சிகள், மற்றும் முகேஷ் சஹானியின் விகாஷீல் இன்சான் கட்சி ஆகியவை இடம்பெற்றுள்ளன.