வங்கதேசத்தின் அடுத்த பிரதமராகும் ‘இருண்ட இளவரசர்’..? யார் இந்த ‘டேஞ்சரஸ்’ தாரிக் ரஹ்மான்..?
வங்கதேச தேசியவாதக் கட்சி ஆட்சிக்கு வந்தால் தாரிக் பிரதமராக வருவது உறுதி என்று கருதப்படுகிறது. இது நடந்தால், அவரது தந்தை, தாய்க்குப் பிறகு அவரது குடும்பத்தில் மூன்றாவது அரச தலைவராக இருப்பார் தாரிக்.
முன்னாள் வங்கதேச பிரதமர் கலீதா ஜியாவின் மூத்த மகன் தாரிக் ரஹ்மான் கிட்டத்தட்ட 17 ஆண்டுகளுக்குப் பிறகு தனது நாட்டிற்குத் திரும்பினார். வங்கதேச தேசியவாதக் கட்சி தலைவர் தாரிக் ரஹ்மான் இன்று தனது மகள், மனைவியுடன் டாக்கா விமான நிலையத்தில் தரையிறங்கினார். 2008 முதல் லண்டனில் வசித்து வரும் ரஹ்மான், பிப்ரவரி தேர்தல்களில் வங்கதேசத்தின் மிகவும் செல்வாக்கு மிக்க அரசியல் பிரமுகர்களில் ஒருவராகவும், அடுத்த பிரதமருக்கான சாத்தியமான வேட்பாளராகவும் பார்க்கப்படுகிறார். இருப்பினும், அவரது தாயார் ஆட்சியில் இருந்த காலத்தில், ரஹ்மான் பல கடுமையான குற்றச்சாட்டுகளால் சூழப்பட்டார். வங்கதேசத்தின் ‘இருண்ட இளவரசர்’ என்றும் அழைக்கப்பட்டார்.
60 வயதான தாரிக் ரஹ்மான், முன்னாள் வங்கதேச பிரதமர் கலீதா ஜியா- முன்னாள் ஜனாதிபதி ஜெனரல் ஜியாவுர் ரஹ்மானின் மூத்த மகன். 2007 ஆம் ஆண்டு இராணுவ ஆதரவு இடைக்கால அரசு ஆட்சியில் இருந்தபோது ஊழல் எதிர்ப்பு பிரச்சாரத்தின் போது ரஹ்மான் கைது செய்யப்பட்டார். 2008 ஆம் ஆண்டு, நீதிமன்றம் அவருக்கு ஜாமீன் வழங்கியது. சிகிச்சைக்காக லண்டனுக்குச் செல்ல அனுமதித்தது. டாக்காவுக்குத் திரும்பினால் வழக்குத் தொடரப்படும், தண்டனைக்கு உள்ளாவோம் என்பதால், அன்றிலிருந்து அவர் லண்டனில் வசித்து வருகிறார்.