WhatsApp வாட்ஸ்அப் ஸ்பேம் தொல்லையா? நீங்கள் படிக்காத மெசேஜ்களை ஒரு குறிப்பிட்ட வரம்புக்கு மேல் அனுப்பினால், தானாகத் தடுக்கும் புதிய அம்சத்தைச் சோதிக்கிறது. தேவையற்ற செய்திகளுக்குத் தீர்வு.
பயனர்கள் தொடர்ந்து சந்திக்கும் ஸ்பேம் (Spam) மற்றும் அதிகளவிலான மெசேஜ் தொல்லையைத் தீர்க்கும் நோக்கில், வாட்ஸ்அப் தற்போது ஒரு புதிய அம்சத்தை உருவாக்கி வருகிறது. இந்தச் புதிய அம்சம், நீங்கள் தொடர்புகொள்ளாத நபர்கள் அல்லது வணிகங்களிடமிருந்து பெறும் படிக்கப்படாத மெசேஜ்களின் எண்ணிக்கையைக் கட்டுப்படுத்த வடிவமைக்கப்பட்டுள்ளது. ஒரு குறிப்பிட்ட அனுப்பியவரிடமிருந்து நீங்கள் நிர்ணயிக்கப்பட்ட எண்ணிக்கையிலான மெசேஜ்களைப் பெற்றும், அவற்றை ஒரு குறிப்பிட்ட காலத்திற்குத் திறக்காமல் இருந்தால், வாட்ஸ்அப் அந்த அனுப்பியவர் மேலும் மெசேஜ்களை அனுப்புவதைத் தற்காலிகமாகத் தடுக்கும். நீங்கள் ஏற்கனவே வந்த மெசேஜ்களைப் படித்தவுடன் இந்த மெசேஜ் வரம்பு தானாகவே மீட்டமைக்கப்படும்.
24
ஸ்பேம் மற்றும் வணிக விளம்பரங்களுக்கு முற்றுப்புள்ளி
வாட்ஸ்அப் இந்த நடவடிக்கையை எடுப்பதற்கான முதன்மை நோக்கம், நீண்ட காலமாக நிலவி வரும் ஸ்பேம் மற்றும் அதிக எண்ணிக்கையில் மெசேஜ் அனுப்பும் நபர்களின் தொல்லையைக் கையாள்வதுதான். இந்த மெசேஜ் கட்டுப்பாடு தனிப்பட்ட உரையாடல்கள் மற்றும் வணிகத் தொடர்புகள் என அனைத்து மெசேஜ்களுக்கும் பொருந்தும் என்று கூறப்படுகிறது. சராசரிப் பயனர் இந்த வரம்பை அடைய வாய்ப்பில்லை என்று நிறுவனத்தின் செய்தித் தொடர்பாளர் ஒருவர் தெரிவித்துள்ளார். வாட்ஸ்அப் தற்போது பல்வேறு வரம்பு எண்களைச் சோதித்து வருகிறது, இது வழக்கமாக அதிகளவில் மெசேஜ்களை அனுப்பும் நபர்கள் மற்றும் ஸ்பேமர்களை மட்டுமே பாதிக்கும் ஒரு வரம்பை அமைக்க இலக்கு கொண்டுள்ளது.
34
பயனர்களின் பாதுகாப்பில் வாட்ஸ்அப்
ஸ்பேம் மற்றும் அதிகளவிலான மெசேஜ் பிரச்சனைகள் வாட்ஸ்அப் தளத்திற்கு ஒரு சவாலாகவே இருந்து வருகிறது. பயனர்கள் வணிகங்களின் மார்க்கெட்டிங் மெசேஜ்களில் இருந்து 'Unsubscribe' செய்யும் வசதியை நிறுவனம் முன்னர் சேர்த்திருந்தாலும், இந்தப் பிரச்சனைக்கு அது முழுமையான தீர்வை வழங்கவில்லை. தொடர்ச்சியான கொள்கை மீறல்கள் காரணமாக, வாட்ஸ்அப் ஒவ்வொரு மாதமும் மில்லியன் கணக்கான கணக்குகளை ஏற்கனவேத் தடை செய்கிறது. 2025-ஆம் ஆண்டின் முதல் பாதியில் மட்டும் மோசடி மையங்களுடன் தொடர்புடைய 6.8 மில்லியனுக்கும் அதிகமான கணக்குகளைத் தடை செய்துள்ளதாக நிறுவனம் கூறியுள்ளது. இந்தக் புதிய சோதனை வரும் வாரங்களில் பல்வேறு நாடுகளில் அறிமுகப்படுத்தப்பட உள்ளது.
இதற்கிடையில், பயனர் ஈடுபாட்டை அதிகரிக்கும் பொருட்டு, இன்ஸ்டாகிராமில் வெற்றி பெற்ற 'Question sticker' போலவே, ஆண்ட்ராய்டு பயனர்களுக்காக ஒரு 'ஊடாடும் ஸ்டேட்டஸ் கேள்விகள்' (interactive Status Questions) அம்சத்தை வாட்ஸ்அப் உருவாக்கி வருவதாகவும் கூறப்படுகிறது. இது, பயனர்கள் தங்கள் ஸ்டேட்டஸில் கேள்விகளை இட்டு, பதில்களைப் பெறும் வாய்ப்பை வழங்கும்.
