WhatsApp Rs 79: இனி வாட்ஸ்அப்புக்கும் மாத கட்டணம்.. ரூ.79 செலுத்தினால் கிடைக்கும் புதிய வசதிகள் என்ன?

WhatsApp Rs 79: வாட்ஸ்அப் இந்தியாவில் விருப்பத் தேர்வாக 'வாட்ஸ்அப் பிளஸ்' சந்தா திட்டத்தை அறிமுகப்படுத்தியுள்ளது. மாதம் ரூ.79 செலுத்தும் பயனர்களுக்கு என்னவெல்லாம் கிடைக்கும் என்பதை பார்க்கலாம்.

வாட்ஸ்அப்புக்கு இனி மாத கட்டணம்

பல ஆண்டுகளாக இலவச தகவல் பரிமாற்ற செயலியாக இருந்து வந்த வாட்ஸ்அப், இந்தியாவில் 'வாட்ஸ்அப் பிளஸ்' என்ற விருப்பத்தேர்வு சந்தா திட்டத்தை படிப்படியாக அறிமுகப்படுத்தியுள்ளது. இந்த திட்டத்தின் மாதக் கட்டணம் ரூ.79. புதிய பயனர்களுக்கு முதல் மாதம் இலவச சோதனை வசதியும் வழங்கப்படுகிறது. இருப்பினும், வழக்கமான தகவல் பரிமாற்றம், குரல் அழைப்பு, காணொலி அழைப்பு மற்றும் முழுமையான குறியாக்க பாதுகாப்பு உள்ளிட்ட அடிப்படை சேவைகள் அனைவருக்கும் இலவசமாகவே தொடரும்.

வாட்ஸ்அப் பிளஸ் திட்டம்

வாட்ஸ்அப் பிளஸ் திட்டத்தின் முக்கிய நோக்கம் செயலியை தனிப்பயனாக்கும் வசதிகளை வழங்குவதாகும். இதில் பல புதிய வண்ணத் தோற்றங்கள், மாற்று செயலி குறியீடுகள், பிரத்யேக ஒலி அறிவிப்புகள், புதிய ஓட்டுப்படத் தொகுப்புகள் மற்றும் ஒரே நேரத்தில் 20 உரையாடல்களை மேலே நிலைநிறுத்தும் வசதி ஆகியவை இடம்பெற்றுள்ளன. மேலும் உரையாடல் பட்டியலை விருப்பத்திற்கு ஏற்ப ஒழுங்குபடுத்தும் கூடுதல் கட்டுப்பாடுகளும் வழங்கப்படுகின்றன.

யாருக்கு இந்த திட்டம் பயனுள்ளதாக இருக்கும்?

செயலியின் தோற்றத்தை மாற்றி பயன்படுத்த விரும்புபவர்கள், கூடுதல் தனிப்பயன் வசதிகளை எதிர்பார்ப்பவர்கள் மற்றும் புதிய அம்சங்களை முதலில் அனுபவிக்க விரும்பும் பயனர்களுக்கு இந்த சந்தா திட்டம் பொருத்தமாக இருக்கும். அதே நேரத்தில், தகவல் அனுப்புவது, அழைப்புகள் செய்வது போன்ற வழக்கமான பயன்பாட்டிற்காக மட்டும் வாட்ஸ்அப்பை பயன்படுத்துபவர்களுக்கு இந்த திட்டம் அவசியமில்லை. சந்தா பெற விரும்புவோர், செயலியின் அமைப்புகள் பகுதியில் உள்ள சந்தாக்கள் பிரிவில் இந்த விருப்பம் கிடைக்கிறதா என்பதைப் பார்க்கலாம். தற்போது இது அனைத்து பயனர்களுக்கும் ஒரே நேரத்தில் வழங்கப்படாமல், கட்டங்களாக வெளியிடப்பட்டு வருகிறது.