எல்லாம் 24 மணி நேரம் தான்.. அந்த வீடியோக்களை நீக்குங்க! சமூக வலைதளங்களுக்கு மத்திய அரசு 'கடுமையான' வார்னிங்!

Social Media ஆபாச உள்ளடக்கத்தை நீக்காவிட்டால் கடும் சட்ட நடவடிக்கை! சமூக வலைதளங்களுக்கு மத்திய அரசு இறுதி எச்சரிக்கை விடுத்துள்ளது.

Social Media சமூக வலைதளங்களுக்கு மத்திய அரசு அதிரடி எச்சரிக்கை

சமூக வலைதளங்களில் ஆபாசமான, சட்டவிரோதமான மற்றும் குழந்தைகளுக்குத் தீங்கு விளைவிக்கக்கூடிய உள்ளடக்கங்கள் பரவுவதைத் தடுக்கத் தவறியதற்காக, ஆன்லைன் தளங்களுக்கு மத்திய அரசு கடுமையான எச்சரிக்கையை விடுத்துள்ளது. டிசம்பர் 29, 2025 தேதியிட்ட மத்திய எலக்ட்ரானிக்ஸ் மற்றும் ஐடி அமைச்சகத்தின் (MeitY) அறிவுறுத்தலின்படி, சமூக வலைதள நிறுவனங்கள் தங்கள் தளங்களில் உள்ள இத்தகைய பதிவுகளை உடனடியாக நீக்க வேண்டும். இல்லையெனில், சட்டரீதியான விளைவுகளையும், வழக்கு விசாரணைகளையும் சந்திக்க நேரிடும் என்று தெரிவிக்கப்பட்டுள்ளது.

சட்டப் பாதுகாப்பு ரத்தாகும் அபாயம்

தகவல் தொழில்நுட்பச் சட்டம் பிரிவு 79-ன் படி, சமூக வலைதள நிறுவனங்கள் மூன்றாம் தரப்பு தகவல்களுக்குப் பொறுப்பேற்கத் தேவையில்லை என்ற விலக்கு (Exemption from liability) உள்ளது. ஆனால், இந்த விதிவிலக்கைப் பெற வேண்டுமானால், நிறுவனங்கள் உரிய விதிமுறைகளைக் கண்டிப்பாகப் பின்பற்ற வேண்டும். "விதிமுறைகளை மீறும் பட்சத்தில், ஐடி சட்டம் மற்றும் பாரதிய நியாய சமிதா (BNS) உள்ளிட்ட குற்றவியல் சட்டங்களின் கீழ் நிறுவனங்கள் மற்றும் பயனர்கள் மீது கடும் நடவடிக்கை எடுக்கப்படும்" என்று அமைச்சகம் தெளிவாகக் கூறியுள்ளது.

அரசு நடவடிக்கை எடுக்கக் காரணம் என்ன?

சமூக வலைதளங்களில் ஆபாசமான மற்றும் சட்டவிரோதமான பதிவுகளைக் கட்டுப்படுத்துவதில் நிறுவனங்கள் சீரற்ற தன்மையுடன் செயல்படுவதாக அரசு கவனித்துள்ளது. குறிப்பாக, ஆபாசமான, வக்கிரமான மற்றும் குழந்தைகளுக்கு எதிரான உள்ளடக்கங்களைக் கண்டறிந்து நீக்குவதில் போதுமான வேகம் இல்லை. இந்த மெத்தனப்போக்கை சுட்டிக்காட்டியுள்ள மத்திய அரசு, இனி இத்தகைய தவறுகளை அனுமதிக்க முடியாது என்று கண்டிப்புடன் தெரிவித்துள்ளது.

24 மணி நேரத்தில் நடவடிக்கை அவசியம்

புதிய ஐடி விதிகள் 2021-ன் படி, தனிநபர் ஒருவரின் பாலியல் சார்ந்த சித்தரிப்புகள் அல்லது மார்பிங் செய்யப்பட்ட படங்கள் குறித்த புகார்கள் வந்தால், அதை 24 மணி நேரத்திற்குள் நீக்க வேண்டும் என்பது கட்டாயமாகும். நீதிமன்ற உத்தரவு அல்லது அரசு ஏஜென்சியிடமிருந்து தகவல் கிடைத்தவுடன், குறிப்பிட்ட காலக்கெடுவுக்குள் அந்தச் சட்டவிரோதப் பதிவுகளை முடக்க வேண்டும் என்று அமைச்சகம் அறிவுறுத்தியுள்ளது.

நிறுவனங்கள் செய்ய வேண்டியது என்ன?

இந்த எச்சரிக்கையைத் தொடர்ந்து, அனைத்து சமூக வலைதள நிறுவனங்களும் தங்கள் 'உள்ளடக்கத் தணிக்கை' (Content Moderation) முறைகளை உடனடியாக மறுஆய்வு செய்ய வேண்டும் என்று அரசு உத்தரவிட்டுள்ளது. பயனர்கள் பதிவிடும் கருத்துக்கள் மற்றும் வீடியோக்களைக் கண்காணிக்கும் வழிமுறைகளை இன்னும் கடுமையாக்க வேண்டும் என்றும், ஐடி சட்டத்திற்கு முழுமையாகக் கட்டுப்பட்டு நடக்க வேண்டும் என்றும் அறிவுறுத்தப்பட்டுள்ளது.