108 தொகுதிகளில் வெற்றி பெற்று தனிப்பெரும் கட்சியாக உருவெடுத்துள்ள தமிழக வெற்றி கழகத்தின் தலைவர் விஜய் ஆட்சி அமைக்க அழைப்பு விடுக்குமாறு ஆளுநருக்கு கடிதம் எழுதினார்.
தமிழகம் உட்பட 5 மாநில சட்டப்பேரவை தேர்தல்களில் பதிவான வாக்குகள் நேற்று எண்ணப்பட்டன. இதில் தமிழகத்தில் விஜய் தலைமையிலான தமிழக வெற்றி கழகம் 108 தொகுதிகளில் வெற்றி பெற்று அனைவருக்கும் அதிர்ச்சி அளித்துள்ளது. இந்த தேர்தலில் முதல்வர் உட்பட 16 அமைச்சர்கள் தோல்வியைத் தழுவி உள்ளனர்.
24
ஆட்சி அமைக்க தேவையான இடங்கள்
தவெகவைத் தொடர்ந்து திமுக கூட்டணி 73 இடங்களிலும், அதிமுக கூட்டணி 53 இடங்களிலும் வெற்றி பெற்றுள்ளன. தமிழக சட்டமன்றத்தின் பலம் 234 என்ற நிலையில் ஒரு கட்சி ஆட்சி அமைக்க 118 உறுப்பினர்களின் ஆதரவு தேவை. ஆனால் தவெக 108 இடங்களில் மட்டுமே வெற்றி பெற்றுள்ளதால் ஆட்சி அமைப்பதில் சிக்கல் நீடிப்பதாக பார்க்கப்பட்டது.
34
ஆளுநருக்கு விஜய் கடிதம்
ஆனால் கட்சியின் தலைவர் விஜய் ஆளுநருக்கு கடிதம் ஒன்றை அனுப்பி உள்ளார். அந்த கடிதத்தில் தமிழகத்தில் 108 தொகுதிகளில் வெற்றி பெற்று தனிப்பெரும் கட்சியாக உருவெடுத்துள்ள தமிழக வெற்றி கழகத்தை ஆட்சி அமைக்க அழைப்பு விடுக்குமாறு குறிப்பிட்டுள்ளார். மேலும் தனிப்பெரும்பான்மையை நிரூபிக்க 14 நாட்கள் அவகாசம் வழங்குமாறும் கோரிக்கை விடுத்துள்ளார்.
விஜய்யின் கடிதத்தைத் தொடர்ந்து தமிழகத்தின் பொறுப்பு ஆளுநரான ராஜேந்திர விஸ்வநாத் அர்லேகர் இன்று சென்னை திரும்புகிறார். விஜய்யின் கடிதம் தொடர்பாக மூத்த அதிகாரிகள், சட்ட வல்லுநர்களுடன் ஆளுநர் ஆலோசனை மேற்கொள்ள உள்ளதாக சொல்லப்படுகிறது.
தமிழக வெற்றி கழகம் பெரும்பான்மையை நிரூபிக்க கூடுதலாக 10 உறுப்பினர்களின் ஆதரவு தேவை. இந்த நிலையில் திமுக கூட்டணியில் இடம் பெற்று 5 தொகுதிகளில் வெற்றி பெற்றுள்ள காங்கிரஸ், அதிமுக கூட்டணியில் இடம் பெற்று 4 தொகுதிகளில் வெற்றி பெற்ற பாமக, 2 தொகுதிகளில் வெற்றி பெற்ற இந்திய யூனியன் முஸ்லிம் லீக், கம்யூனிஸ்ட் பார்ட்டி உள்ளிட்ட கட்சிகள் ஆதரவு அளிக்கும் பட்சத்தில் விஜய் வெற்றிகரமாக 5 ஆண்டுகள் வெற்றியை நிறைவு செய்ய முடியும். முன்னதாக விஜய், ஆட்சி அதிகாரத்தில் பங்கு வழங்கப்படுமென சொன்னதால் தவெக கூட்டணிக்கு பலரும் ஆதரவு வழங்கலாமென சொல்லப்படுகிறது.
மாற்று வழியாக 47 தொகுதிகளில் வெற்றி பெற்றுள்ள அதிமுகவில் 3ல் 1 பங்கு உறுப்பினர்களின் ஆதரவை விஜய் பெறும் பட்சத்தில் தவெக எந்தவித சிக்கலும் இன்றி 5 ஆண்டுகள் ஆட்சியை சிறப்பாக நடத்த முடியும்.
