Tamil Nadu Weather: சென்னைக்கு மழை.. ஆனால் இந்த மாவட்டங்களில் வெப்பம் அதிகரிக்கும்! முழு அப்டேட் இதோ

Tamil Nadu Weather: தமிழகத்தில் ஜூலை 18 அன்று மழையும் வெயிலும் மாறி மாறி காணப்படும் என இந்திய வானிலை ஆய்வு மையம் (IMD) தெரிவித்துள்ளது. இதன் முழுமையான விவரங்களை பார்க்கலாம்.

வானிலை மையம் அறிவிப்பு

வானிலை ஆய்வு மையத்தின்படி, தென்மேற்கு வங்கக்கடல் முதல் வடக்கு லட்சத்தீவு பகுதி வரை ஒரு வளிமண்டல கீழடுக்கு சுழற்சி நிலவுகிறது. இது வடக்கு தமிழ்நாடு, தெற்கு உள் கர்நாடகா மற்றும் வடக்கு கேரளா வழியாக செல்கிறது. இதுவே மாநிலத்தின் தற்போதைய வானிலைக்கு காரணம்.

வானிலை ஆய்வு மையம்

ஜூலை 18 அன்று, மேற்குத் தொடர்ச்சி மலை மாவட்டங்கள் மற்றும் வட கடலோர தமிழ்நாட்டில் மணிக்கு 30-40 கி.மீ வேகத்தில் காற்று வீசி, இடி மின்னலுடன் மிதமான மழை பெய்யும். தமிழ்நாடு, புதுச்சேரி மற்றும் காரைக்காலின் மற்ற பகுதிகளில் லேசான மழைக்கு வாய்ப்புள்ளது. ஜூலை 19 முதல் 21 வரை இதேபோன்ற வானிலை தொடரும்.

வெப்பநிலையில் மாற்றம்

மாநிலத்தில் ஆங்காங்கே மழை பெய்தாலும், ஜூலை 18 முதல் 21 வரை வெப்பநிலையில் பெரிய மாற்றம் இருக்காது. உள் மாவட்டங்களில் இயல்பை விட 2-3 டிகிரி செல்சியஸ் வெப்பம் அதிகமாக பதிவாகும். கடலோர தமிழ்நாடு, புதுச்சேரி மற்றும் காரைக்காலில் இயல்பான வெப்பநிலையே நீடிக்கும். சென்னையை பொறுத்தவரை, அதிகபட்ச வெப்பநிலை 37-38°C ஆகவும், குறைந்தபட்ச வெப்பநிலை 28-29°C ஆகவும் இருக்கும்.

மீனவர்களுக்கு எச்சரிக்கை

வானிலை ஆய்வு மையம் மீனவர்களுக்கு எச்சரிக்கை விடுத்துள்ளது. ஜூலை 18 அன்று, வடக்கு தமிழ்நாடு கடற்கரை மற்றும் அதை ஒட்டிய தென்மேற்கு வங்கக்கடல் பகுதிகளில் மணிக்கு 40-50 கி.மீ வேகத்திலும், சில சமயங்களில் 60 கி.மீ வேகத்திலும் பலத்த காற்று வீசும்.

காற்றின் வேகம்

ஜூலை 19, 20 தேதிகளில், தென்மேற்கு வங்கக்கடலின் சில பகுதிகளில் காற்றின் வேகம் மணிக்கு 45-55 கி.மீ ஆகவும், சில சமயங்களில் 65 கி.மீ ஆகவும் அதிகரிக்கும். இதேபோல், மத்திய கிழக்கு அரபிக்கடல் பகுதியிலும் ஜூலை 18 முதல் 21 வரை இதே நிலை நீடிக்கும். எனவே, மீனவர்கள் இந்த பகுதிகளுக்கு கடலுக்குச் செல்ல வேண்டாம் என அறிவுறுத்தப்படுகிறார்கள்.