அரசு பள்ளி பெருமையின் அடையாளமா? அப்புறம் எதுக்கு அமைச்சரே உங்க பையன பிரெஞ்ச் படிக்க வைக்கிறீர்கள்? எச்.ராஜா!

புதிய கல்விக் கொள்கையை ஏற்காவிட்டால் 5000 கோடி நிதி இழப்பு ஏற்படும் என மத்திய அமைச்சர் கூறிய கருத்துக்கு தமிழக அரசியல் தலைவர்கள் கண்டனம் தெரிவித்துள்ளனர். அரசு பள்ளிகளில் திமுகவினர் எத்தனை பேர் படிக்கிறார்கள் என எச்.ராஜா கேள்வி எழுப்பியுள்ளார்.

அரசு பள்ளி பெருமையின் அடையாளமா? அப்புறம் எதுக்கு அமைச்சரே உங்க பையன பிரெஞ்ச் படிக்க வைக்கிறீர்கள்? எச்.ராஜா!

புதிய கல்விக் கொள்கையை ஏற்க தமிழ்நாடு அரசு கடும் எதிர்ப்பு தெரிவித்து வருகிறது. இந்நிலையில் புதிய கல்விக் கொள்கையை ஏற்காவிட்டால் 5000 கோடி நிதியை இழக்க நேரிடும் என மத்திய கல்வி அமைச்சர் தர்மேந்திரா பிரதான் தெரிவித்தார். 

முதல்வர் மு.க.ஸ்டாலின் கண்டனம்

மத்திய அமைச்சரின் பேச்சுக்கு முதல்வர் மு.க.ஸ்டாலின் உள்ளிட்ட தமிழக அரசியல் கட்சி தலைவர்கள் கடும் கண்டனம் தெரிவித்து வருகின்றனர். புதிய கல்விக் கொள்கையை ஏற்க மறுக்கும் தமிழ்நாடு முதலமைச்சர் மு.க.ஸ்டாலின் இந்த விவகாரத்தை அரசியலாக்க வேண்டாம் என மத்திய கல்வி அமைச்சர் தர்மேந்திர கடிதம் எழுதியுள்ளார்.

எச்.ராஜா

இந்நிலையில் அரசு பள்ளிகள் பெருமையின் அடையாளம் என்று கூறும் பள்ளி கல்வித்துறை அமைச்சர் மகேஷ் அவர்களே! திமுகவை சேர்ந்த எத்தனை பேர்  தமிழகத்தில் அரசு பள்ளிகளில் பயில்கிறார்கள் என்கிற பட்டியலை தமிழக சட்டமன்றத்தில் வெள்ளை அறிக்கையாக தாக்கல் செய்ய தயாரா? என எச்.ராஜா கேள்வி எழுப்பியுள்ளார். இதுதொடர்பாக தமிழக பாஜக மூத்த தலைவரான எச்.ராஜா வெளியிட்டுள்ள எக்ஸ் தளத்தில்: அரசு பள்ளிகள் பெருமையின் அடையாளம் என்று கூறும் பள்ளி கல்வித்துறை அமைச்சர் மகேஷ் அவர்களே! திமுகவை சேர்ந்த எத்தனை அமைச்சர்கள், நாடாளுமன்ற உறுப்பினர்கள், சட்டமன்ற உறுப்பினர்களின் பிள்ளைகள், பேரக் குழந்தைகள் தமிழகத்தில் அரசு பள்ளிகளில் பயில்கிறார்கள் என்கிற பட்டியலை தமிழக சட்டமன்றத்தில் வெள்ளை அறிக்கையாக தாக்கல் செய்ய தயாரா?

அமைச்சர் அன்பில் மகேஷ் பொய்யாமொழி

தமிழக பள்ளி கல்வித்துறை அமைச்சர் பொறுப்பில் இருக்கும் நீங்கள் ஏன் உங்களுடைய நிர்வாகத்தின் கீழ் இயங்கும் இருமொழி கற்பிக்கும் பெருமைமிக்க அரசு பள்ளியில் உங்கள் மகன் கவின் பொய்யாமொழி அவர்களை சேர்க்காமல் பன்மொழி கற்பிக்கும் ஆழ்வார்பேட்டை International Curriculum Schoolல் சேர்த்து பிரெஞ்ச் படிக்க வைக்கிறீர்கள்? 

ஆசிரியர்கள் பணி நியமனம்

அரசு பள்ளிகளை பெருமையின் அடையாளம் என்று கூறும் அன்பில் மகேஷ் பொய்யாமொழி அவர்களே பிறகு ஏன் திமுக தலைவர்கள் பெருமைமிக்க அரசு பள்ளிகளை போல் சமச்சீர் வழி பள்ளிகளாக தாங்கள் நடத்தும் கல்வி நிறுவனங்களை உருவாக்காமல் CBSE பள்ளிகளை உருவாக்கினார்கள்? பெருமைமிக்க தமிழக அரசு ஆரம்ப மற்றும் நடுநிலை பள்ளிகளில் 3192  பட்டதாரி ஆசிரியர்கள் பணியிடங்கள், 2600 முதுநிலை ஆசிரியர் பணியிடங்கள், 3058 தலைமையாசிரியர் பணியிடங்கள் காலியாக இருந்தும் அவ்விடங்களுக்கு தகுதியான ஆசிரியர்களை பணி நியமனம் செய்யாமல் காலதாமதம் செய்து வருகிறீர்கள்? 

திராவிட மாடல் அரசியல்

பெருமைமிக்க தமிழக அரசு பள்ளிகளில் மாணவர்கள் வருகை பதிவு எண்ணிக்கை குறைவாகவும், மாணவர்கள் கல்வி இடைநிற்றல் எண்ணிக்கை அதிகமாகவும் இருக்கிறதே அதை தவிர்க்க, குறைக்க, நிவர்த்தி செய்ய இதுவரையிலும் நீங்கள் எந்த முயற்சியும், நடவடிக்கையும் எடுக்காதது ஏன்? உண்மையிலேயே அரசு பள்ளிகள் பெருமையின் அடையாளமாகத்தான் இருந்தன தமிழகத்தில் திமுக ஆட்சிக்கு வரும் வரை திராவிட மாடல் கல்விக்கொள்கை தமிழக பள்ளி பாடத்திட்டத்தில் அச்சேறும் வரை அரை நூற்றாண்டு கால திராவிட மாடல் அரசியலால் அழிவின் விளிம்பில் இருப்பது தமிழக அரசு பள்ளிகள் மட்டுமல்ல! அறிவில் சிறந்த தமிழினத்தின் வளர்ச்சியும், எதிர்காலமும் தான் என கூறியுள்ளார்.