திருப்பதி லட்டுகளில் அதிகளவு ‘விலங்குக் கொழுப்பு’ இருப்பது கண்டறியப்பட்டது நாடு முழுவதும் அதிர்வலைகளை ஏற்படுத்தி உள்ள நிலையில், லட்டு மூலம் திருப்பதி கோயிலுக்கு எவ்வளவு வருமானம் கிடைக்கிறது என்பது குறித்து இந்த பதிவில் பார்க்கலாம்.
நாட்டின் பிரசித்தி பெற்ற கோயில்களில் ஒன்றாக திருப்பதி ஏழுமலையான் கோயில் திகழ்கிறது. இந்த கோயிலில் தினமும் லட்சக்கணக்கான பக்தர்கள் சாமி தரிசனம் செய்கின்றனர். இந்த நிலையில் திருப்பதியில் பிரசாதமாக வழங்கப்படும் லட்டு தற்போது தலைப்பு செய்தியாக மாறியுள்ளது. திருப்பதி லட்டுகளில் அதிகளவு ‘விலங்குக் கொழுப்பு’ இருப்பது கண்டறியப்பட்டதே இதற்கு காரணம்.
இதற்கு முன்பு ஆந்திராவில் ஆட்சியில் இருந்த ஜெகன் மோகன் தலைமையிலான ஒய்.எஸ்.ஆர். காங்கிரஸ் அரசு புனிதமான திருப்பதி லட்டுவில் கலப்படம் செய்ததாக அம்மாநில முதல்வர் சந்திரபாபு நாயுடு கடந்த புதன்கிழமை குற்றம் சாட்டி இருந்தார். அப்போது முதல் திருப்பதி லட்டு சர்ச்சை தொடங்கியது. திருப்பதி லட்டுவில் சுத்தமான நெய்க்குப் பதிலாக விலங்குகளின் கொழுப்பு பயன்படுத்தப்படுவதாக நாயுடு நாடு முழுவதும் பெரும் அதிர்ச்சியை கிளப்பியது.
ஆனால் சந்திரபாபு நாயுடுவின் குற்றச்சாட்டுகளுக்கு ஒய்.எஸ்.ஆர் காங்கிரஸ் கட்சியின் தலைவர் ஜெகன் மோகன் ரெட்டி பதிலடி கொடுத்தார். இதுகுறித்து தனது எக்ஸ் பக்கத்தில் பதிவிட்ட அவர் “ சந்திரபாபு நாயுடு புனிதமான கோவிலான திருமலையின் புனிதத்தையும் நூறு கோடி இந்துக்களின் நம்பிக்கையையும் கெடுத்ததன் மூலம் பெரும் பாவம் செய்துள்ளார்” என்று குறிப்பிட்டிருந்தார்.
ஆனால் நெய்யில் 'விலங்குகளின் கொழுப்பு' இருப்பதை ஆய்வக சோதனையின் மூலம் தெரியவந்தது. குஜராத்தைச் சேர்ந்த தேசிய பால் பண்ணை வாரியம், திருப்பதி லட்டுகளை தயாரிப்பதில் பயன்படுத்தப்படும் நெய்யை சோதனை செய்ததில், அதில் விலங்குகளின் கொழுப்பு இருந்தது கண்டறியப்பட்டதாக திருப்பதி தேவஸ்தான வாரியம். கடந்த வியாழக்கிழமை உறுதி செய்தது.
மேலும் அந்த நெய் மாதிரியில் "மாட்டிறைச்சி கொழுப்பு, பன்றி கொழுப்பு மற்றும் மீன் எண்ணெய்" இருப்பதும் கண்டறியப்பட்டது.. திருப்பதி பிரசாதத்தில் கலப்படம் செய்வது தொடர்பாக தெலுங்கு தேசம் கட்சிக்கும், ஒய்எஸ்ஆர்சிபிக்கும் இடையே வார்த்தைப் போர் நடந்து வரும் நிலையில் இந்த லட்டு கலப்பட விவகாரம் தேசிய அளவில் கவனம் ஈர்த்துள்ளது.
சரி, லட்டின் மூலம் மட்டும் திருப்பதி கோயிலும் ஒவ்வொரு ஆண்டும் எவ்வளவு வருமானம் கிடைக்கிறது தெரியுமா? ஒவ்வொரு நாளும், திருமலை தேவஸ்தான் திருப்பதியில் சுமார் 3 லட்சம் லட்டுகளைத் தயாரித்து விநியோகம் செய்கிறது. இந்த லட்டு மூலம் ஆண்டுக்கு 500 கோடி ரூபாய் சம்பாதிப்பதாக தகவல்கள் தெரிவிக்கின்றன. .
திருப்பதி கோயில் வளாகத்திலும், வெளியில் அமைக்கப்பட்ட கவுண்டர்களிலும் லட்டுகள் விற்பனை செய்ய செய்யப்பட்டு வருகின்றன. திருப்பதி பாலாஜி லட்டுகள் முறையே 40 கிராம், 175 கிராம் மற்றும் 750 கிராம் எடையுள்ள சிறிய, நடுத்தர மற்றும் பெரிய மூன்று அளவுகளில் கிடைக்கின்றன.
திருப்பதி ஏழுமலையான் கோவிலில் வழங்கப்படும் சிறிய லட்டுகள் அனைத்து பக்தர்களுக்கும் இலவசமாக கொடுக்கப்படுகிறது.. நடுத்தர லட்டுகள் ரூ.50 என்ற விலையிலும், பெரிய லட்டுகள் ரூ. 200 என்ற விலைக்கும் விற்பனை செய்யப்படுகிறது.
லட்டு எப்போது திருப்பதி பிரசாதமானது?
300 ஆண்டுகளுக்கு முன்பு வெங்கடேசப் பெருமானின் நைவேத்தியத்தில் லட்டு முதன்முதலில் நுழைந்ததாக கூறப்படுகிறது. 1715 ஆம் ஆண்டு முதல் திருப்பதி கோயிலில் பெருமாளுக்கு லட்டு நைவேத்யமாக படைக்கப்பட்டு, பின்னர் பக்தர்களுக்கு பிரசாதமாக வழங்கப்பட்டு வருகிறது.
லட்டுக்கான பொருட்கள் மற்றும் விலை
ஒவ்வொரு ஆறு மாதங்களுக்கும், பிரபலமான லட்டு பிரசாதத்தை தயாரிக்க திருப்பதி தேவஸ்தான் 1,400 டன் நெய்யை இ-டெண்டர் மூலம் கொள்முதல் செய்கிறது. நெய், கடலை மாவு, சர்க்கரை, சிறிய சர்க்கரை க்யூப்ஸ், முந்திரி, ஏலக்காய், கற்பூரம் மற்றும் திராட்சை ஆகியவற்றால் திருப்பதி லட்டுகள் தயாரிக்கப்படுகின்றன.
திருப்பதியில் லட்டு உள்ளிட்ட பிரசாதங்களை தயாரிக்க தினமும் குறைந்தது 400-500 கிலோ நெய், 750 கிலோ முந்திரி, 500 கிலோ திராட்சை, 200 கிலோ ஏலக்காய் பயன்படுத்தப்படுகிறது. நெய்யின் தரம் ஈரப்பதம், நறுமணம், கொழுப்பு இல்லாத அமிலங்கள், கனிம எண்ணெய், நிறங்கள், உருகும் இடம் உள்ளிட்ட பல அளவுருக்கள் மூலம் சோதிக்கப்படுகிறது.
திருப்பதி லட்டு எப்படி தயாரிக்கப்படுகிறது?
இந்த லட்டுகள் திருப்பதி கோவில் சமையலறையில் தயாரிக்கப்படுகின்றன, மேலும் அந்த பகுதிக்கு லட்டு போடு என்று அழைக்கப்படுகிறது. சமையல்காரர்கள் சமையலறையில் இருக்கும்போது தலையை மொட்டையடித்து, சுத்தமான துணியை அணிய வேண்டும். லட்டு தயாரிக்க 600க்கும் மேற்பட்ட சமையல்காரர்கள் நியமிக்கப்பட்டுள்ளனர். ஒவ்வொரு தொகுதியின் முதல் லட்டு இறைவனுக்குப் படைக்கப்படுகிறது. அதன் பிறகு, மீதமுள்ள தயாரிப்பில் கலந்து பக்தர்களுக்கு விநியோகிக்கப்படுகிறது.
மூன்று வகையான லட்டுகள்
திருப்பதி கோயிலில் ஆஸ்தானம், கல்யாணோத்ஸவம் மற்றும் ப்ரோக்தம் என 3 வகை லட்டுகள் தயாரிக்கப்படுகின்றன.. குங்குமப்பூ இழைகள், முந்திரி மற்றும் பாதாம் ஆகியவற்றால் செய்யப்பட்ட ஆஸ்தான லட்டுகள் ஆகும். இந்த வகை லட்டுகள் பண்டிகைகள் போன்ற விசேஷ சந்தர்ப்பங்களில் மட்டுமே தயாரிக்கப்படுகின்றன. கல்யாணோத்ஸவம் லட்டுகள் பெரிய அளவில் தயாரிக்கப்படுகின்றன. கல்யாணோத்ஸவம் சேவையில் பங்கேற்பவர்களுக்கு மட்டுமே இந்த லட்டுகள் வழங்கப்படும். ப்ரோக்தம் லட்டுகள் பக்தர்களுக்கு எப்போதுமே விநியோகிக்கப்படும் பிரசாதமாகும்.
திருப்பதி ஏழுமலையான கோயிலில் னமும் சராசரியாக 3.5 லட்சம் லட்டுகள் வரை தயார் செய்யப்படுகிறது. சிறப்பு சந்தர்ப்பங்கள் அல்லது பண்டிகைகளில் 4 லட்சம் வரை தயார் செய்யப்படுகிறது என்பது குறிப்பிடத்தக்கது.