Vinayagar Chaturthi: விநாயகருக்கு பிடித்தமான பொருட்கள் என்னென்ன? பூஜையில் இதை சேர்க்க மறக்காதீங்க

Vinayagar Chaturthi: விநாயகர் சதுர்த்தி பூஜையில் விநாயகருக்கு பாரம்பரியமாக உகந்ததாகக் கருதப்படும் அருகம்புல், எருக்கம்பூ, கொழுக்கட்டை, மோதகம், தேங்காய், பழங்கள், வெற்றில, பாக்கு உள்ளிட்ட பொருட்களை வைத்து பூஜை செய்வது வழக்கம்.

விநாயகர் சதுர்த்தி

ஆவணி மாதம் வளர்பிறை சதிர்த்தி நாளில் விநாயகர் அவதரித்ததாக கூறப்படுகிறது. ஆண்டுதோறும் இந்நாளையே விநாயகர் சதுர்த்தி திருவிழாவாக நாடு முழுவதும் சிறப்பாக கொண்டாடி வருகிறோம். அந்த வகையில், இந்த ஆண்டு விநாயகர் சதுர்த்தி வருகிற செப்டம்பர் 14-ம் தேதி திங்கட்கிழமை கொண்டாடப்பட உள்ளது.

விநாயகர் சதுர்த்தி பூஜைக்கு உகந்த நேரம்

சதுர்த்தி திதி செப்டம்பர் 14 காலை 7.06 மணிக்கு தொடங்கி, செப்டம்பர் 15 காலை 7.44 மணிக்கு முடிகிறது. விநாயகர் சதுர்த்தி பூஜைக்கு உகந்த நேரம் காலை 10.51 மணி முதல் மதியம் 1.18 மணி வரை என பஞ்சாங்கக் கணக்குகள் தெரிவிக்கின்றன. இந்த நேரத்தில் விநாயகரை பிரதிஷ்டை செய்து, அபிஷேகம், அலங்காரம், அர்ச்சனை, நைவேத்தியம் மற்றும் ஆரத்தி உள்ளிட்ட வழிபாடுகளை செய்யலாம்.

விநாயகருக்கு பிடித்தமான பொருட்கள் என்னென்ன?

அருகம்புல்

விநாயகர் வழிபாட்டில் அருகம்புல்லுக்கு தனி முக்கியத்துவம் உண்டு. பொதுவாக 3, 5, 7, 21 என்ற எண்ணிக்கையில் அருகம்புல்லைத் தொகுத்து விநாயகருக்கு அர்ப்பணிக்கும் வழக்கமும் உள்ளது. அருகம்புல் கிடைத்தால் அதை சுத்தம் செய்து, தண்ணீரில் கழுவி, விநாயகரின் மீது மாலையாக தொடுத்து வழிபடலாம்.

கொழுக்கட்டை

விநாயகரின் பிரசாதம் என்றாலே முதலில் நினைவுக்கு வருவது கொழுக்கட்டைதான். தேங்காய், வெல்லம் சேர்த்து தயாரிக்கப்படும் இனிப்பு கொழுக்கட்டை பாரம்பரியமாக விநாயகருக்கு நைவேத்தியமாகப் படைக்கப்படுகிறது. சில இடங்களில் பலவகை கொழுக்கட்டைகளையும் படைக்கும் வழக்கமும் உள்ளது.

எருக்கம்பூ

விநாயகர் வழிபாட்டுடன் எருக்கம்பூவும் பாரம்பரியமாக தொடர்புடையது. எருக்கம்பூவை மாலையாக கட்டி அல்லது ஊசியால் கோர்த்து விநாயகருக்கு சமர்ப்பிக்கலாம்.

தேங்காய்

விநாயகர் பூஜையில் தேங்காய் முக்கிய நைவேத்தியப் பொருளாக கருதப்படுகிறது. வெற்றிலை, பாக்கு, தேங்காய் போன்றவை பாரம்பரிய பூஜைத் தட்டில் இடம்பெறும் பொருட்களாகும். தேங்காய் உடைப்பது அகங்காரம் மற்றும் எதிர்மறை எண்ணங்களை விட்டுவிட்டு இறைவனை சரணடைவதன் அடையாளமாகக் கருதப்படும் ஒரு பாரம்பரிய விளக்கமும் உள்ளது.

பழ வகைகள் மற்றும் இனிப்புகள்

வாழைப்பழம், கொய்யா, மாதுளை, ஆப்பிள் போன்ற பழங்களை நைவேத்தியமாக வைக்கலாம். குறிப்பிட்ட ஒரு பழம் மட்டுமே கட்டாயம் என்றில்லை; பக்தியுடன் சுத்தமாக சமர்ப்பிப்பதே முக்கியம்.

அவல், பொரி மற்றும் இனிப்புகள்

சில பகுதிகளில் அவல், பொரி, சர்க்கரை அல்லது வெல்லம், இனிப்பு வகைகள் போன்றவற்றையும் விநாயகருக்கு படைக்கும் வழக்கம் உள்ளது.

இதுமட்டுமின்றி, மஞ்சள், குங்குமம், சந்தனம், தீபம், தூபம், கற்பூரம், பூக்கள் போன்ற பூஜைப் பொருட்களையும் வைத்துக்கொள்ள வேண்டும்.மேலும், விநாயகருக்கு உரிய 21 வகையான இலைகளைக் கொண்டு 'ஏகவிம்சதி பத்ர பூஜை' வழிபாடும் சில இடங்களில் சிறப்பாகக் கடைப்பிடிப்பதும் வழக்கம்.

நாம் முழு மனதோடும், தூய்மையான பக்தியோடும் செய்யும் எளிய வழிபாட்டைக் கூட விநாயகப் பெருமான் மகிழ்ச்சியோடு ஏற்றுக்கொள்வார். அனைவரும் விநாயகர் சதுர்த்தி நல்வாழ்த்துகள்.