தளபதி என்றால் தலைவிதியா..? தவெக மாநாட்டில் சீமானுக்கு எதிராக தெறிக்க விடும் தொண்டர்கள்..!

அண்மையில் தவெகவை கடுமையாக விமர்சித்திருந்தார் நாதக ஒருங்கிணைப்பாளர் சீமான். அதனை கண்டிக்கும் வகையில் தவெகவினர் சீமானுக்கு எதிராக கோஷங்களை எழுப்பி வருகின்றனர். 

சீமானும், விஜய்யும் ஆரம்பத்தில் நட்பு பாராட்டினாலும், அரசியல் கொள்கைகளில் ஏற்பட்ட முரண்பாடுகள் காரணமாக, தற்போது இருவருக்கும் இடையே வார்த்தைப் போர் உருவாகியுள்ளது. சீமானின் தமிழ் தேசியக் கொள்கைகளும், விஜய்யின் திராவிடம்-தமிழ் தேசியம் கலந்த அரசியல் நிலைப்பாடும் மோதலை ஏற்படுத்தியுள்ளன.

விஜய் அரசியலில் நுழைந்தபோது, சீமான் அவரை ‘தம்பி’ என அழைத்து ஆதரவு தெரிவித்தார். 2024-ல் தவெக-வின் முதல் மாநாட்டிற்கு வாழ்த்து தெரிவித்து, விஜய்யின் நம்பிக்கையும், நல்நோக்கமும் வெற்றி பெற வாழ்த்தினார். ஆனால், விஜய்யின் "திராவிடமும், தமிழ் தேசியம் இரு கண்கள்" என்ற பேச்சு, சீமானின் தமிழ் தேசியக் கொள்கைகளுக்கு எதிராக இருப்பதாகக்கூறி, சீமான் கடுமையாக விமர்சித்தார். "ஒரு பக்கம் நில், நடுவில் நின்று லாரியில் அடிபடாதே" என விஜய்யை கடுமையாக விமர்சித்தார்.

சீமானின் நாம் தமிழர் கட்சிக்கு இளைஞர்கள் மத்தியில் பெரும் ஆதரவு உள்ளது. விஜய்யின் தவெக கட்சியும் இளைஞர்களை ஈர்க்க முயல்வதால், சீமான், தவெக-வை போட்டியாகக் கருதுவதாக அரசியல் விமர்சகர்கள் கூறுகின்றனர்.

2025 ஆகஸ்ட் 17 அன்று விழுப்புரம் மாவட்டம், செஞ்சியில் நடந்த நாம் தமிழர் கட்சியின் பொதுக்கூட்டத்தில், சீமான் த.வெ.கவின் கொள்கைகளை கேள்வி எழுப்பி, அவர்களது ஆதரவாளர்கள் "தளபதி, தளபதி" என்று கோஷமிடுவதை "தலைவிதி, தலைவிதி" என்று தனக்கு கேட்பதாகவும், "TVK, TVK" என்ற கோஷத்தை "டீ விற்க, டீ விற்க" என்று கேட்பதாகவும் கிண்டலாகக் கூறினார். த.வெ.கவை "புலி வேட்டைக்கு குறுக்கே வரும் அணில் குஞ்சுகள்" என்று விமர்சித்தார். இந்தப் பேச்சு பெரும் விவாதத்தை ஏற்படுத்தியது.

இந்நிலையில் மதுரை பாரப்பத்தியில் நடைபெறும் தவெக மாநில மாநாட்டில் குவிந்துள்ள தொண்டர்கள், சீமானை கண்டிக்கும் வகையில் ‘சீமான் ஒழிக’ என தொண்டர்கள் கடும் கோஷம் எழுப்பி வருகின்றனர். தளபதி என தவெகவினர் கத்துவது தலைவிதி என கேட்பதாக, அண்மையில் தவெகவை கடுமையாக விமர்சித்திருந்தார் நாதக ஒருங்கிணைப்பாளர் சீமான். அதனை கண்டிக்கும் வகையில் தவெகவினர் சீமானுக்கு எதிராக கோஷங்களை எழுப்பி வருகின்றனர்.