பெரும்பாலான வாட்ச் விளம்பரங்களில் நேரம் 10:10 என்று செட் செய்யப்பட்டிருப்பதை கவனித்திருக்கிறீர்களா? இது எதேச்சையாக நடப்பதில்லை, இதன் பின்னால் ஒரு பெரிய மார்க்கெட்டிங் தந்திரமே இருக்கிறது.
நீங்க எப்போதாவது வாட்ச், ஸ்மார்ட்வாட்ச் அல்லது சுவர் கடிகார விளம்பரத்தை உன்னிப்பாக கவனிச்சிருக்கீங்களா? அதில் நேரம் 10:10 என்று இருப்பதை பார்த்திருப்பீர்கள். இது எதேச்சையானது அல்ல, பல தசாப்தங்களாகப் பின்பற்றப்படும் ஒரு மார்க்கெட்டிங் உத்தி. இன்றும் பெரும்பாலான நிறுவனங்கள் தங்கள் விளம்பரங்களில் 10:10 நேரத்தையே காட்டுகின்றன. இதன் பின்னால் டிசைன் மட்டுமல்ல, உளவியலும் பிராண்டிங்கும் முக்கியப் பங்கு வகிக்கிறது.
27
10:10-க்கு என்ன ஸ்பெஷல்?
10:10 மணியளவில், கடிகாரத்தின் இரண்டு முட்களும் ஆங்கில 'V' எழுத்து போன்ற வடிவத்தை உருவாக்குகின்றன. இது டயலை சமச்சீராகவும், நேர்த்தியாகவும், கவர்ச்சியாகவும் காட்டுகிறது. முட்கள் ஒன்றையொன்று மறைக்காது, அதனால் முழு கடிகாரமும் தெளிவாகத் தெரியும். பெரும்பாலான வாட்ச் நிறுவனங்கள் தங்கள் லோகோவை 12 மணிக்குக் கீழே வைத்திருப்பார்கள். 10:10 நேரத்தில், முட்கள் லோகோவை மறைக்காமல், அதைச் சுற்றி ஒரு ஃபிரேம் போல அமைகின்றன. மேலும், தேதி, க்ரோனோகிராஃப் போன்ற மற்ற அம்சங்களும் தெளிவாகத் தெரியும். இதனால்தான் வாட்ச் துறை நிபுணர்கள் இதை ஒரு தற்செயல் நிகழ்வாகக் கருதுவதில்லை.
37
நிபுணர்கள் சொல்வது என்ன?
லக்ஸரி வாட்ச் விற்பனையாளரான Tourneau நிறுவனத்தின் முன்னாள் துணைத் தலைவர் ஆண்ட்ரூ பிளாக், '10:10 நேரத்தில் முட்கள் பிராண்ட் லோகோவை இருபுறமும் ஃபிரேம் செய்வதால், டயல் மிகவும் கவர்ச்சியாகத் தெரிகிறது' என்கிறார். சுவிஸ் வாட்ச் நிறுவனமான Ulysse Nardin-ன் முன்னாள் மார்க்கெட்டிங் தலைவர் சுசேன் ஹர்னி, '10:10 அமைப்பு, சிரிக்கும் முகம் (SMILEY FACE) போன்ற தோற்றத்தைத் தருவதால், வாடிக்கையாளர்களிடம் ஒரு பாசிட்டிவ் மனநிலையை ஏற்படுத்துகிறது' என்கிறார். இதனால்தான் உலகின் பெரும்பாலான வாட்ச் நிறுவனங்கள் இந்த நேரத்தைப் பயன்படுத்துகின்றன.
இன்று 10:10 மிகவும் பிரபலமான நேரமாக இருந்தாலும், ஆரம்ப நாட்களில் சில நிறுவனங்கள் 8:20 நேரத்தையும் பயன்படுத்தின. ஆனால், 10:10 அமைப்பு டயலை இன்னும் அழகாகவும், சமச்சீராகவும் காட்டுவதால், அதுவே பின்னர் பரவலாகப் பின்பற்றப்பட்டது.
57
எல்லா நிறுவனங்களும் 10:10-ஐ காட்டுகின்றனவா?
இல்லை. பெரும்பாலான நிறுவனங்கள் 10:10 அல்லது அதற்கு நெருக்கமான நேரத்தைத் தேர்ந்தெடுத்தாலும், சில பிராண்டுகள் இதில் சிறிய மாற்றங்களைச் செய்கின்றன. உதாரணமாக, Apple Watch விளம்பரங்களில் பெரும்பாலும் 10:09 நேரம் காட்டப்படுகிறது. டிசைன் மற்றும் சமச்சீர் தன்மையை (symmetry) மேம்படுத்தவே இப்படிச் செய்வதாக நிபுணர்கள் நம்புகின்றனர். ஆனால், ஆப்பிள் நிறுவனம் இதற்கான அதிகாரப்பூர்வ காரணத்தை வெளியிடவில்லை.
67
இந்த வழக்கம் எவ்வளவு காலமாக உள்ளது?
வாட்ச் துறையில் 10:10 நேரத்தைப் பயன்படுத்தும் வழக்கம் பல தசாப்தங்களாகத் தொடர்கிறது. காலப்போக்கில், இது ஒரு எழுதப்படாத விதியாகவே (industry standard) மாறிவிட்டது. இன்று பத்திரிகைகள், ஆன்லைன் ஷாப்பிங் தளங்கள், விளம்பரப் பலகைகள் மற்றும் கடைகளில் உள்ள பெரும்பாலான வாட்ச்களில் இந்த நேரத்தையே நீங்கள் பார்க்கலாம்.
77
அடுத்த முறை இப்படிப் புரிந்து கொள்ளுங்கள்
ஒரு பொருளின் படத்தில் உள்ள சின்ன விஷயம்கூட எவ்வளவு யோசித்து முடிவு செய்யப்படுகிறது என்பதற்கு இந்த 10:10 நேரமே சிறந்த உதாரணம். முட்களின் இந்த சிறிய அமைப்பு, ஒரு வாட்ச்சை மிகவும் கவர்ச்சியாகவும், பிரீமியமாகவும் காட்ட உதவுகிறது. எனவே, அடுத்த முறை ஒரு வாட்ச் விளம்பரத்தில் 10:10 நேரத்தைப் பார்த்தால், அது தற்செயல் அல்ல, ஒரு கச்சிதமான மார்க்கெட்டிங் உத்தி என்பதைப் புரிந்துகொள்ளுங்கள்.
ஏஷ்யாநெட் தமிழ் நியூஸின் லைஃப்ஸ்டைல் பிரிவு, வாசகர்களுக்கு வாழ்க்கை முறை, உறவுகள் மற்றும் நடைமுறை வாழ்க்கை குறித்து வளமான தகவல்களை வழங்குகிறது. இதில் ஆரோக்கிய ஆலோசனைகள், உணவு மற்றும் ஊட்டச்சத்து குறிப்புகள், ஃபாஷன் டிரெண்ட்ஸ் மற்றும் தினசரி வாழ்க்கையை மேம்படுத்தும் சிந்தனையூட்டும் கருத்துகள் அடங்கும்.
