ஸ்டீல் சிங்க்கில் உப்புக் கறை, எண்ணெய் பிசுக்கா? 2 நிமிடத்தில் விரட்டியடிக்க சூப்பர் கிச்சன் டிப்ஸ்!

சமையலறையில் உள்ள ஸ்டெயின்லெஸ் ஸ்டீல் சிங்க், நாளடைவில் உப்புத் தண்ணீர், எண்ணெய் பிசுக்கு மற்றும் உணவு அமிலங்களால் தனது இயல்பான பளபளப்பை இழந்து மங்கலாகி விடுகிறது.

ஸ்டெயின்லெஸ் ஸ்டீல் சிங்கை புதிதுபோல பளபளக்க டிப்ஸ்!

வீட்டின் சமையலறையில் தினமும் அதிகளவில் பயன்படுத்தப்படும் பொருட்களில் ஸ்டெயின்லெஸ் ஸ்டீல் சிங்கும் (Stainless Steel Sink) முக்கியமான ஒன்றாகும். புதிதாக வாங்கும்போது கண்ணைப் பறிக்கும் பளபளப்புடன் இருக்கும் இந்த ஸ்டீல் சிங்க், நாட்கள் செல்லச் செல்ல அதன் பொலிவை இழந்து விடுகிறது. நீர் தழும்புகள், மங்கலான தோற்றம் மற்றும் விடாப்பிடியான கறைகள் படிந்து பழையது போல காட்சியளிக்கத் தொடங்குகிறது.

உப்புத் தண்ணீர், சமையல் எண்ணெய் பிசுக்கு, சோப்புக் கழிவுகள் மற்றும் எலுமிச்சை, தக்காளி போன்ற அமிலத்தன்மை கொண்ட உணவுப் பொருட்களின் தொடர் தாக்கமே இந்த பளபளப்புக் குறைவுக்கு முக்கியக் காரணங்களாக அமைகின்றன. எனினும், சில எளிய வீட்டுப் பராமரிப்பு முறைகளைக் கையாள்வதன் மூலம் ஸ்டீல் சிங்கை எப்போதும் புத்தம் புதிது போல பளபளப்பாக வைத்திருக்க முடியும் என நிபுணர்கள் தெரிவிக்கின்றனர்.

ஸ்டீல் சிங்க் பளபளப்பை இழக்க முக்கியக் காரணங்கள்

துடைக்காமல் விடுவது:

பாத்திரங்களைக் கழுவி முடித்த பிறகு சிங்கை உலர்ந்த துணியால் துடைக்காமல் ஈரப்பதத்துடன் அப்படியே விட்டுவிடுவதால், தண்ணீரில் உள்ள தாதுக்கள் படிந்து வெள்ளை நிறப் புள்ளிகளாகவும் நீர்க் கறைகளாகவும் மாறுகின்றன.

ஸ்டீல் நார் பயன்பாடு:

ஸ்டீல் நாரைக் கொண்டு கடுமையாகத் தேய்ப்பதோ அல்லது 'Grain' எனப்படும் ஸ்டீலின் இயற்கை வரிகளுக்கு எதிரான திசையில் தேய்ப்பதோ அதன் மேல் நுண்ணிய கீறல்களை உண்டாக்கி, பளபளப்பைப் பறித்துவிடுகிறது.

இரும்புப் பொருட்கள் தேங்குவது:

ஈரமான ஸ்கிரப்பர்கள் அல்லது இரும்புப் பாத்திரங்களை சிங்கிற்குள்ளேயே நீண்ட நேரம் ஊற வைக்கும்போது, அதிலிருக்கும் இரும்புத் துகள்கள் ஒட்டிக் கொண்டு துருப்பிடித்த கறைகளை ஏற்படுத்துகின்றன.

அமிலப் பொருட்களின் தாக்கம்:

உப்புத் தண்ணீர், எலுமிச்சை, தக்காளி மற்றும் ப்ளீச்சிங் சார்ந்த கடுமையான ரசாயனங்கள் ஸ்டெயின்லெஸ் ஸ்டீலின் மேல்புறப் பாதுகாப்பு அடுக்கைப் பாதிக்கின்றன.

சிங்கை மின்ன வைக்கும் எளிய 'பேக்கிங் சோடா - வினிகர்' முறை

தேவையான பொருட்கள்:

பேக்கிங் சோடா – 2 டீஸ்பூன்

வெள்ளை வினிகர் – தேவையான அளவு

மென்மையான ஸ்பாஞ்ச் (Sponge) மற்றும் மைக்ரோஃபைபர் துணி

சிங்கை மின்ன வைக்கும் சுத்தம் செய்யும் முறை

முதலில் சிங்கை லேசாகத் தண்ணீரால் நனைத்துக் கொள்ள வேண்டும். பின்னர் அதன் மேற்பரப்பு முழுவதும் 2 டீஸ்பூன் பேக்கிங் சோடாவை சீராகத் தூவ வேண்டும்.மென்மையான ஸ்பாஞ்சைப் பயன்படுத்தி, சிங்கின் 'Grain' கோடுகளின் திசையிலேயே மெதுவாகத் தேய்க்க வேண்டும்.இதன் மேல் சிறிதளவு வெள்ளை வினிகரைத் தெளித்தால் அது நுரைத்துப் பொங்கி வரும்.

இந்த கலவையை 2 முதல் 3 நிமிடங்கள் வரை அப்படியே ஊறவிட்டு, பின்னர் சுத்தமான நீரால் நன்கு கழுவ வேண்டும்.இறுதியாக, ஒரு காய்ந்த மைக்ரோஃபைபர் துணியால் சிங்கை முழுமையாகத் துடைத்து உலர வைக்க வேண்டும். அதன் மேல் சில துளிகள் ஆலிவ் ஆயில் அல்லது மினரல் ஆயில் தடவினால், தண்ணீர் ஒட்டாமல் சிங்க் எப்போதும் புத்தம் புதிது போலப் பளபளக்கும்.