Kerala Politics: பெண்களுக்கு அரசு பேருந்தில் இலவசம்! சுகாதார ஊழியர்களுக்கு சம்பள உயர்வு! முதல்வர் அதிரடி!

Kerala CM VD Satheesan: கேரளத்தின் புதிய முதல்வராக காங்கிரஸின் வி.டி. சதீசன் பதவியேற்ற நிலையில், பெண்களுக்கு அரசு பேருந்தில் இலவச பயணம் என அறிவிக்கப்பட்டுள்ளது. ஆஷா பணியாளர்களுக்கு சம்பள உயர்வு அறிவிக்கப்பட்டுள்ளது.

கேரளத்தின் புதிய முதல்வர் V.D. சதீசன்

கேரளம் சட்டப்பேரவை 2026 தேர்தலில் காங்கிரஸ் தலைமையிலான ஐக்கிய ஜனநாயக முன்னணி (UDF) 102 இடங்களைப் பிடித்து சாதனை படைத்துது. காங்கிரஸ் 63 இடங்களிலும், இந்திய யூனியன் முஸ்லிம் லீக் 22 இடங்களிலும் வெற்றி பெற்றது. கேரளம் காங்கிரஸ் (Joseph)7 இடங்களில் வெற்றி பெற்றது. கேரளாவில் புதிய முதலமைச்சராக காங்கிரஸ் மூத்த தலைவர் V.D. சதீசன் இன்று பதவியேற்றுக் கொண்டார். அவருடன் 20 அமைச்சர்களும் பதவியேற்றுக் கொண்டனர்.

பெண்களுக்கு பேருந்தில் இலவச பயணம்

பதவியேற்றவுடன் UDF அரசின் இரண்டு முக்கிய வாக்குறுதிகள் உடனடியாக நிறைவேற்றப்படும் என கேரள முதல்வர் V.D. சதீசன் அறிவித்துள்ளார். அதாவது ஜூன் 15 முதல், கேரள அரசுப் போக்குவரத்துக் கழகமான KSRTC பேருந்துகளில் பெண்கள் இலவசமாக பயணிக்கலாம் என்று அவர் தனது முதல் செய்தியாளர்கள் சந்திப்பில் திட்டவட்டமாக தெரிவித்தார். முதியோர்களுக்காக ஒரு தனித்துறை உருவாக்கப்படும் என்றும் அவர் கூறினார்.

ஆஷா பணியாளர்களுக்கு சம்பள உயர்வு

மேலும், ஆஷா பணியாளர்களின் ஊதியம் 3000 ரூபாய் உயர்த்தப்பட்டுள்ளதாகவும், அங்கன்வாடி ஊழியர்களுக்கு 1000 ரூபாயும், சமையல் தொழிலாளர்களுக்கு 1000 ரூபாயும் உயர்த்தப்பட்டுள்ளதாகவும் முதல்வர் தெரிவித்தார். ப்ரீ-பிரைமரி ஆசிரியர்கள் மற்றும் ஆயாக்களுக்கும் 1000 ரூபாய் ஊதியமும் உயர்த்தப்பட்டுள்ளது. மாநிலத்தின் நிதிநிலைமை மேம்படும்போது மேலும் உதவிகள் வழங்கப்படும் என்று உறுதியளித்த முதல்வர் வி.டி.சதீசன் நிதிநிலை குறித்து வெள்ளை அறிக்கை வெளியிடப்படும் என்று தெரிவித்தார்.

அனைத்து ‍பேருந்துகளும் இலவசமா?

தமிழகத்தில் கடந்த திமுக ஆட்சியில் அரசு நகர பேருந்துகளில் பெண்கள் கட்டணமின்றி இலவசமாக பயணம் மேற்கொண்டனர். இந்த திட்டம் பெரும் வரவேற்பை பெற்ற நிலையில், மற்ற மாநிலங்களும் இதை பின்பற்ற தொடங்கியுள்ளன. அந்த வகையில் தான் கேரளத்திலும் தேர்தலுக்கு முன்பாக ஐக்கிய ஜனநாயக முன்னணி கூட்டணி இந்த வாக்குறுதியை அளித்து இருந்தது. இப்போது பதவியேற்ற முதல் நாளிலேயே இந்த திட்டம் ஜூன் 15ம் தேதி செயல்படுத்தப்படும் என்று முதல்வர் வி.டி.சதீசன் தெரிவித்து பெண்களின் வயிற்றில் பாலை வார்த்துள்ளார்.

தமிழகத்தில் சாதாரண நகரப் பேருந்துகளில் (Ordinary Town Buses) மட்டுமே பெண்களுக்கு இலவசம் வழங்கப்படுகிறது. அதே போன்ற ஒரு நடைமுறைதான் கேரளாவிலும் பின்பற்றப்பட உள்ளதாக கூறப்படுகிறது. அதாவது கேரள அரசு போக்குவரத்துக் கழகத்தின் சாதாரண (Ordinary), சிட்டி/டவுன் (City/Town), மற்றும் சுவிஃப்ட் சாதாரண (KSRTC-SWIFT Ordinary) பேருந்துகளில் மட்டுமே பெண்களுக்கு இலவசப் பயணம் அனுமதிக்கப்படும். விரைவு பேருந்துகள் வகையில் வரும் Fast Passenger, Super Fast, Express, AC Low Floor, SWIFT Hybrid/Sleeper என புறநகர், தொலைதூர பேருந்துகளில் பெண்களுக்கு இலவச பயணம் அனுமதி அளிக்கப்படாது.