தபால் வாக்குகள் எண்ணிக்கையில் மாற்றம்! டிவிஸ்ட் வைத்த தேர்தல் ஆணையம்!

தேர்தல் ஆணையம் தபால் வாக்குகள் எண்ணப்படும் முறையில் புதிய மாற்றத்தை அறிவித்துள்ளது. இதன்படி, மின்னணு வாக்குப்பதிவு இயந்திர வாக்கு எண்ணிக்கையின் இறுதி இரண்டு சுற்றுகளுக்கு முன்பாகவே தபால் வாக்குகளின் முடிவுகள் எண்ணப்பட்டு அறிவிக்கப்பட வேண்டும்.

தபால் வாக்கு எண்ணும் முறையில் மாற்றம்

மக்களவை எதிர்க்கட்சித் தலைவரான ராகுல் காந்தி, வாக்காளர் பட்டியல் சிறப்புத் திருத்தம் மற்றும் வாக்குத் திருட்டு தொடர்பாக அண்மையில் வெளியிட்ட குற்றச்சாட்டுகள் நாடு முழுவதும் பெரும் கவனத்தைப் பெற்றுள்ள நிலையில், தற்போது அஞ்சல் வாக்குகள் (Postal Ballots) எண்ணப்படும் நடைமுறையில் தேர்தல் ஆணையம் (Election Commission of India - ECI) ஒரு புதிய மாற்றத்தை அறிவித்துள்ளது.

குறிப்பாக, வாக்காளர் பட்டியலில் இருந்து முறைகேடாகப் பெயர்கள் நீக்கப்படுவது தொடர்பாக ராகுல் காந்தி முன்வைத்த குற்றச்சாட்டுகள் அதிர்வலைகளை ஏற்படுத்தியபோதும், தேர்தல் ஆணையம் அதனை நிராகரித்தது குறிப்பிடத்தக்கது.

புதிய நடைமுறை என்ன?

அஞ்சல் வாக்குகள் எண்ணும் புதிய நடைமுறை தேர்தலில் அஞ்சல் வாக்குகள் எண்ணப்பட்டு முடிவுகள் அறிவிக்கப்படும் முறையில் தேர்தல் ஆணையம் புதிய நடைமுறையை அறிமுகப்படுத்தியுள்ளது. முன்னதாக, அஞ்சல் வாக்குகள் எண்ணப்பட்டு அதன் முடிவுகள் அறிவிக்கப்படாமல், மின்னணு வாக்குப்பதிவு இயந்திரங்களில் (EVMs) பதிவான வாக்குகளின் அனைத்துச் சுற்றுகளும் எண்ணப்பட்டு, முடிவுகள் அறிவிக்கப்பட்ட பின்னரே அஞ்சல் வாக்குகளின் முடிவுகள் அறிவிக்கப்பட்டு வந்தன.

தபால் வாக்கு எண்ணிக்கை முடிவுகள்

தற்போது அறிவிக்கப்பட்டுள்ள புதிய நடைமுறையின்படி:

வாக்குப்பதிவு இயந்திரத்தின் இறுதிக்கு இரண்டு சுற்றுகளுக்கு முன்பாக, அஞ்சல் வாக்குகளின் முடிவுகள் எண்ணப்பட்டு அறிவிக்கப்பட வேண்டும்.

உதாரணமாக, ஒரு தொகுதியில் 20 சுற்றுகள் வாக்கு எண்ணிக்கை இருந்தால், 18-வது சுற்று முடிவடைந்தவுடன் அஞ்சல் வாக்குகள் எண்ணப்பட்டு முடிவு அறிவிக்கப்பட வேண்டும்.

அஞ்சல் வாக்குகள் எண்ணப்பட்டு, அதன் முடிவுகள் அறிவிக்கப்பட்ட பின்னரே, வாக்குப்பதிவு இயந்திர வாக்குகளின் அடுத்த சுற்று எண்ணிக்கை தொடங்க வேண்டும்.

மேலும், நிராகரிக்கப்பட்ட அஞ்சல் வாக்குகளைக் கட்டாயமாக மறு சரிபார்ப்புக்கு உட்படுத்த வேண்டும் என்றும் தேர்தல் ஆணையம் தனது சுற்றறிக்கையில் குறிப்பிட்டுள்ளது.

தேர்தல் ஆணையம் சுற்றறிக்கை

இந்த புதிய நடைமுறை குறித்து அனைத்து மாநிலத் தலைமைத் தேர்தல் அதிகாரிகளுக்கும் தேர்தல் ஆணையம் சுற்றறிக்கையை அனுப்பியுள்ளது. இந்த மாற்றமானது, ராகுல் காந்தியின் குற்றச்சாட்டுகள் எழுப்பப்பட்ட பின்னணியில், தேர்தல் நடைமுறையில் வெளிப்படைத்தன்மையையும் நம்பகத்தன்மையையும் அதிகரிக்கும் நோக்கில் மேற்கொள்ளப்பட்டதாகக் கருதப்படுகிறது.