மேற்கு வங்கத்தில் பாஜக முதன்முறையாக ஆட்சியை பிடித்து வரலாறு படைத்துள்ளது. 200க்கும் மேற்பட்ட தொகுதிகளை பாஜக வாரிச்சுருட்டியது எப்படி? என்பது குறித்து இந்த செய்தியில் பார்ப்போம்.
மேற்கு வங்க சட்டமன்றத் தேர்தல் வாக்கு எண்ணிக்கையில் பாஜக ஒரு பிரம்மாண்ட வெற்றியை நோக்கி முன்னேறி வருகிறது. இப்போதைய நிலவரப்படி, பாஜக 200 தொகுதிகளில் முன்னிலை வகிக்கிறது. பல்வேறு இடங்களில் வெற்றி பெற்றுள்ளது. சில தொகுதிகளில் பாஜக வேட்பாளர்கள் மிகப்பெரிய வாக்கு வித்தியாசத்தில் வெற்றி பெற்றுள்ளனர். ஆளும் திரிணாமுல் காங்கிரஸ் வரலாறு காணாத அளவுக்கு படுதோல்வியை சந்தித்துள்ளது.
திரிணாமுல் காங்கிரஸ் 82 தொகுதிகளில் மட்டுமே முன்னிலை
திரிணாமுல் காங்கிரஸ் கட்சி 82 தொகுதிகளில் மட்டுமே முன்னிலை வகிக்கிறது மற்றும் 5 இடங்களில் வெற்றி பெற்றதாக உறுதி செய்யப்பட்டுள்ளது. மற்ற கட்சிகள் இந்தத் தேர்தலில் பெரிய தாக்கத்தை ஏற்படுத்தவில்லை. இந்திய தேசிய காங்கிரஸ் (INC) மற்றும் ஆம் ஜனதா உன்னயன் கட்சி (AJUP) தலா 2 இடங்களில் முன்னிலை வகிக்கின்றன. இந்திய கம்யூனிஸ்ட் கட்சி (மார்க்சிஸ்ட்) [CPI(M)] ஒரு தொகுதியில் முன்னிலையில் உள்ளது. இந்தக் கட்சிகள் எதுவும் இதுவரை ஒரு இடத்தில் கூட வெற்றியை உறுதி செய்யவில்லை.
23
திரிணாமுல் கோட்டையில் கெத்து காட்டிய பாஜக
2021 தேர்தலில் பாஜக சுமார் 38% வாக்குகளைப் பெற்றிருந்தது. ஆனால் இந்த 2026 தேர்தலில், பாஜகவின் வாக்கு சதவீதம் சுமார் 45% ஆக உயர்ந்துள்ளது. இது கிட்டத்தட்ட 7% அதிகரிப்பாகும். அதேசமயம், ஆளும் திரிணாமுல் காங்கிரஸின் வாக்கு சதவீதம் 48%-லிருந்து 41%-ஆகச் சரிந்துள்ளது. குறிப்பாக, மம்தா பானர்ஜியின் கோட்டையாகக் கருதப்பட்ட தெற்கு வங்காளத்தின் கிராமப்புறங்களில் பாஜக பெரும் ஊடுருவலை நிகழ்த்தியுள்ளது.
சுவேந்து அதிகாரி முக்கிய காரணம்
நந்திகிராம் மற்றும் பவானிபூர் ஆகிய இரு தொகுதிகளிலும் போட்டியிட்ட எதிர்க்கட்சித் தலைவர் சுவேந்து அதிகாரி, இந்த வெற்றியின் முக்கிய முகமாகப் பார்க்கப்படுகிறார். குறிப்பாக, முதல்வர் மம்தா பானர்ஜியின் சொந்தத் தொகுதியான பவானிபூரில் பாஜக கடும் போட்டியை அளித்து முன்னிலை பெற்றது அரசியல் வட்டாரத்தில் பெரும் அதிர்ச்சியை ஏற்படுத்தியுள்ளது.
33
சிறுபான்மையின வாக்குகளை அள்ளிய பாஜக
மால்டா, முர்ஷிதாபாத் மற்றும் வடக்கு தினாஜ்பூர் போன்ற மாவட்டங்களில் பாரம்பரியமாக திரிணாமுல் காங்கிரஸுக்கே கிடைத்து வந்த சிறுபான்மையின வாக்குகள், இந்த முறை சிதறியுள்ளன. இது பாஜகவின் வெற்றிக்கு மறைமுகமாகப் பெரிதும் உதவியுள்ளது. மேலும், மத்திய அரசு கொண்டு வந்த சில தொழில்மயமாக்கல் வாக்குறுதிகள் இளைஞர்களிடையே பெரும் தாக்கத்தை ஏற்படுத்தியுள்ளன.
2021 மேற்கு வங்க சட்டமன்றத் தேர்தலில், மம்தா பானர்ஜி தலைமையிலான திரிணாமூல் காங்கிரஸ் 294 இடங்களில் 213 இடங்களை வென்று, சுமார் 48% வாக்குகளுடன் தனிப்பெரும்பான்மை பெற்றது. அப்போது பாஜக 77 இடங்களை வென்று, சுமார் 38% வாக்குகளுடன் பிரதான எதிர்க்கட்சியாக உருவெடுத்தது. இடதுசாரி-காங்கிரஸ் கூட்டணி ஒரு இடத்தைக் கூட வெல்லவில்லை என்பது குறிப்பிடத்தக்கது.
