விமானத்தை விட வேகமாக சென்னை டூ பெங்களூரு: 359 கி.மீ தூரத்தை 73 நிமிடங்களில் கடக்கும் புதிய புல்லட் ரயில் திட்டம்!

சென்னை - பெங்களூரு இடையேயான பயண நேரத்தை வெறும் 73 நிமிடங்களாகக் குறைக்கும் அதிவேக புல்லட் ரயில் திட்டத்தை மத்திய ரயில்வே அமைச்சர் அஸ்வினி வைஷ்ணவ் முன்மொழிந்துள்ளார். இதன்மூலம் இவ்விரு பெருநகரங்களும் ஒரே நகரமாக மாறும் எனத் தெரிவிக்கப்பட்டுள்ளது.

பெங்களூரு - சென்னை இடையே வெறும் 73 நிமிடங்களில் புல்லட் ரயில்

பெங்களூரு - சென்னை இடையேயான பயண நேரத்தை வெறும் 73 நிமிடங்களாக (1 மணி நேரம் 13 நிமிடங்கள்) குறைக்கும் புல்லட் ரயில் திட்டம் முன்மொழியப்பட்டுள்ளதாக ரயில்வே அமைச்சர் அஸ்வினி வைஷ்ணவ் தெரிவித்துள்ளார். வந்தே பாரத் ரயிலில் 4 மணி நேரம் 25 நிமிடங்கள் ஆகும் நிலையில், புல்லட் ரயில் மூலம் இந்த இரு நகரங்களும் ஒரே நகரமாக மாறும் என்று அவர் குறிப்பிட்டுள்ளார்.

பெங்களூரு, ஹைதராபாத், அமராவதி, சென்னை ஆகிய நகரங்களை இணைக்கும் தென் இந்திய புல்லட் ரயில் வழித்தடத்திற்கு பிரதமர் நரேந்திர மோடி ஒப்புதல் அளித்துள்ளார். பெங்களூரு - மும்பை வந்தே பாரத் ஸ்லீப்பர் ரயிலை கொடியசைத்துத் தொடங்கி வைத்த பின்னர் பேசிய அமைச்சர் அஸ்வினி வைஷ்ணவ் இந்த முக்கிய தகவலைப் பகிர்ந்தார். தற்போது இயக்கப்படும் பிற ரயில்களுடன் ஒப்பிடுகையில் இந்த புல்லட் ரயில் எவ்வளவு நேரத்தை மிச்சப்படுத்தும் என்பதன் முழு விவரம் பற்றி பார்ப்போம்.

பெங்களூரு - மங்களூரு வந்தே பாரத் ரயில் விரைவில் தொடக்கம்

அடுத்த சில வாரங்களில் பெங்களூரு - மங்களூரு வந்தே பாரத் எக்ஸ்பிரஸ் ரயில் சேவை தொடங்கப்படும் என்றும் அமைச்சர் அஸ்வினி வைஷ்ணவ் தெரிவித்துள்ளார். இந்த வழித்தடத்தில் மின்மயமாக்கல் மற்றும் சோதனை ஓட்டங்கள் முழுமையாக முடிவடைந்துள்ளன. இந்த புதிய ரயில் சேவை மூலம் மங்களூரு, உடுப்பி மற்றும் கார்வார் - கோவா நோக்கிய கடலோரப் பகுதிகள் உலகத்தரம் வாய்ந்த அதிவேக ரயில் இணைப்பைப் பெறும் என்றும் அவர் கூறினார்.

விமானப் பயணத்தை விட புல்லட் ரயில் எப்படி சிறந்தது?

சென்னை - பெங்களூரு இடையே நேரடி விமானப் பயணம் வான்வழியில் சராசரியாக 1 மணி நேரம் 4 நிமிடங்கள் மட்டுமே ஆகிறது. புல்லட் ரயிலின் 73 நிமிடப் பயணமும் ஏறத்தாழ இதற்குச் சமமானதுதான். ஆனால், விமான நிலையத்திற்குச் செல்வது, செக்-இன் மற்றும் பாதுகாப்புச் சோதனைகள் ஆகியவற்றுக்குக் கூடுதல் நேரம் பிடிக்கும். புல்லட் ரயில் நகரின் மையப்பகுதியிலிருந்து மற்றொரு நகரின் மையப்பகுதிக்கு நேரடியாக இணைப்பைத் தருவதால், ஒட்டுமொத்தப் பயண நேரம் விமானத்தை விடவும் மிகக் குறைவாகவே அமையும்.

ரயில் பாதை வழியாக சென்னை மற்றும் பெங்களூரு இடையேயான தூரம் சுமார் 359 கி.மீ ஆகும். இந்த தூரத்தை வெறும் 73 நிமிடங்களில் கடக்க வேண்டுமெனில், புல்லட் ரயில் சராசரியாக மணிக்கு 295 கி.மீ வேகத்தில் செல்ல வேண்டும். தற்போது இயக்கப்படும் வந்தே பாரத் ரயில் சராசரியாக மணிக்கு 81 கி.மீ வேகத்தில் செல்லும் நிலையில், புல்லட் ரயில் அதைவிட 3.6 மடங்கு அதிக வேகத்தில் இயங்க வேண்டியிருக்கும் (புதிய வழித்தடத்தின் தூரம் இப்போதைய தொலைவிற்கு இணையாக இருக்கும்பட்சத்தில் இது சாத்தியம்).

பெங்களூரு - சென்னை: தற்போதைய ரயில்களுடன் ஒரு ஒப்பீடு

சென்னை - மைசூரு வந்தே பாரத் (4 மணி நேரம் 25 நிமிடங்கள்)

தற்போது இந்த வழித்தடத்தில் அதிவேகமாகச் செல்லும் ரயில் சென்னை - மைசூரு வந்தே பாரத் (20607/20608) ஆகும். இது சராசரியாக மணிக்கு 81 கி.மீ வேகத்தில் பயணித்து, சென்னயிலிருந்து பெங்களூரை அடைய 4 மணி நேரம் 25 நிமிடங்கள் எடுத்துக்கொள்கிறது. 73 நிமிட புல்லட் ரயில் பயன்பாட்டுக்கு வந்தால், வந்தே பாரத்தை விட 3 மணி நேரம் 12 நிமிடங்கள் மிச்சமாகும்.

சென்னை - பெங்களூரு சதாப்தி எக்ஸ்பிரஸ் (4 மணி நேரம் 45 நிமிடங்கள்)

மற்றொரு பிரீமியம் ரயிலான சதாப்தி எக்ஸ்பிரஸ் (12027/12028), சராசரியாக மணிக்கு 76 கி.மீ வேகத்தில் சென்று 4 மணி நேரம் 45 நிமிடங்களில் பயணத்தை நிறைவு செய்கிறது. இதனுடன் ஒப்பிடும்போது புல்லட் ரயில் மூலம் 3 மணி நேரம் 32 நிமிடங்கள் சேமிக்கப்படும். இது ஏறக்குறைய அரை நாள் நேரமாகும்.

ஏசி டபுள் டெக்கர் (கிட்டத்தட்ட 6 மணி நேரம்)

பகல் நேரப் பயணிகளுக்குப் பிரபலமான ஏசி டபுள் டெக்கர் எக்ஸ்பிரஸ் (22625/22626), சென்னையிலிருந்து பெங்களூரு செல்ல 5 மணி நேரம் 45 நிமிடங்களும், மறுமார்க்கத்தில் 6 மணி நேரம் 15 நிமிடங்களும் எடுத்துக்கொள்கிறது. புல்லட் ரயில் மூலம் இப்பயணத்தில் 4 மணி நேரம் 32 நிமிடங்கள் முதல் 5 மணி நேரம் வரை குறையும்.

பிருந்தாவன் & லால்பாக் எக்ஸ்பிரஸ் (சுமார் 6 மணி நேரம்)

359 கி.மீ தூரம் கொண்ட இந்த வழித்தடத்தில் பிருந்தாவன் எக்ஸ்பிரஸ் (12639/12640) சராசரியாக 6 மணி நேரம் 10 நிமிடங்களிலும், லால்பாக் எக்ஸ்பிரஸ் (12607/12608) சுமார் 5 மணி நேரம் 55 நிமிடங்களிலும் பயணிக்கின்றன. தினசரிப் பயணிகளுக்கு புல்லட் ரயில் சுமார் 4 மணி நேரம் 40 நிமிடங்களுக்கு மேல் நேரத்தை மிச்சப்படுத்தும்.