செப்டம்பர் 28ம் தேதி முதல் அரசுப் பேருந்துகளில் பயணிகளிடமிருந்து ரூ.2000 நோட்டுகளை நடத்துநர்கள் பெறக்கூடாது என அரசு விரைவுப் போக்குவரத்து கழகம் அறிவுறுத்தியுள்ளது.
நாடு முழுவதும் புழக்கத்தில் உள்ள 2000 ரூபாய் நோட்டுகள் செப்டம்பர் மாதம் 30-ம் தேதிக்கு பிறகு செல்லாது என கடந்த மே மாதம் ரிசர்வ் வங்கி அதிரடி அறிவிப்பை வெளியிட்டது. 2000 ரூபாய் நோட்டுகளை வைத்திருப்பவர்கள் வங்கியில் செலுத்தி மாற்றிக் கொள்ளலாம் என தெரிவிக்கப்பட்டது.
5 மாதம் அவகாசம் கொடுக்கப்பட்ட நிலையில் தற்போது வரை 2000 ரூபாய் நோட்டுகளை வங்கிகளுக்கு சென்று டெபாசிட் செய்தும் மாற்றி வருகின்றனர். இந்த சூழலில் இன்னும் 4 நாட்களில் ரிசர்வ் வங்கி கொடுத்த காலக்கெடு முடிவடைகிறது.
இந்நிலையில் 2,000 ரூபாய் நோட்டுக்களை பயணிகளிடம் இருந்து நாளை (28-ம் தேதி) முதல் வாங்கக்கூடாது என்று கிளை மேலாளர்கள் மற்றும் நடத்துனர்களுக்கு அரசு விரைவு போக்குவரத்து கழகம் உத்தரவிட்டுள்ளது. மேலும் பயணிகளிடமிருந்து ரூ.2000 நோட்டுகளைப் பெற்றால், அதற்கு நடத்துனர்களே பொறுப்பு என்றும் போக்குவரத்து கழகம் தெரிவித்துள்ளது.
சேனலை கிளிக் செய்து பின்தொடரவும்