இந்திய ஸ்மார்ட்போன் தயாரிப்பு நிறுவனமான லாவா, தனது புதிய பட்ஜெட் ஸ்மார்ட்போனான 'லாவா ஸ்மார்ட் 4 ப்ரோ' மாடலை ரூ.11,000 விலையில் அறிமுகப்படுத்தியுள்ளது. இதன் விலை மற்றும் முழு சிறப்பம்சங்களை பற்றி பார்ப்போம்.
நொய்டாவைச் சேர்ந்த ஸ்மார்ட்போன் தயாரிப்பு நிறுவனமான லாவா (Lava), தனது புதிய பட்ஜெட் ஸ்மார்ட்போனான 'லாவா ஸ்மார்ட் 4 ப்ரோ' (Lava Smart 4 Pro) மாடலை இந்தியாவில் அறிமுகப்படுத்தியுள்ளது. ஏற்கெனவே வெளியான லாவா ஸ்மார்ட் 4 மற்றும் லாவா ஸ்மார்ட் 4 பிளஸ் வரிசையில் 3-வது மாடலாக இது இணைந்துள்ளது.
இந்த ஸ்மார்ட்போன் தற்போது நாடு முழுவதும் உள்ள நிறுவனத்தின் ஆஃப்லைன் சில்லறை விற்பனைக் கடைகள் மூலம் 2 தனித்துவமான கலர்களில் விற்பனைக்கு வந்துள்ளது. தட்டையான பின்புற பேனலின் இடது மேல் மூலையில் சதுர வடிவிலான கேமரா மாட்யூலைக் கொண்டுள்ள இந்த போனில், ஒற்றை பின்புற கேமரா அமைப்பு வழங்கப்பட்டுள்ளது. ஆக்டா-கோர் யுனிசாக் (Unisoc) சிப்செட் மற்றும் பிரமாண்டமான 7,000mAh பேட்டரியுடன் இது இயங்குகிறது.
24
விலை & விற்பனை விவரம்
லாவா ஸ்மார்ட் 4 ப்ரோ ஸ்மார்ட்போனின் 4GB ரேம் மற்றும் 64GB ஸ்டோரேஜ் கொண்ட ஒரேயொரு வேரியண்ட்டின் விலை இந்தியாவில் ரூ.11,000 ஆக நிர்ணயிக்கப்பட்டுள்ளது. இந்த ஸ்மார்ட்போன் லாவாவின் ஆஃப்லைன் சில்லறை விற்பனை நிலையங்களில் மட்டுமே பிரத்யேகமாகக் கிடைக்கிறது.
மற்ற லாவா போன்களைப் போலவே, இந்த மாடலுக்கும் இந்தியா முழுவதும் வாடிக்கையாளர்களுக்கு இலவச வீட்டு வாசல் சேவையை (Free doorstep service) நிறுவனம் வழங்குகிறது. லாவா ஸ்மார்ட் 4 ப்ரோ போன் 'கோனார்க் கோல்ட்' (Konark Gold) மற்றும் 'நீலம் ப்ளூ' (Neelam Blue) ஆகிய 2 கலர்களில் கிடைக்கிறது.
34
சிறப்பம்சங்கள் & தொழில்நுட்ப விவரங்கள்
இயங்குதளம் & பாதுகாப்பு - இரட்டை சிம் வசதி கொண்ட இந்த பட்ஜெட் ஸ்மார்ட்போன் ஆண்ட்ராய்டு 16 (Android 16) இயங்குதளத்துடன் வெளிவருகிறது. இதில் தேவையற்ற செயலிகள் (no bloatware) மற்றும் விளம்பரங்கள் (no ads) இருக்காது என நிறுவனம் உறுதியளித்துள்ளது. மேலும், கீழே விழுந்தாலும் மற்றும் அதிர்வுகளைத் தாங்கும் வகையிலும் MIL-STD-810H ராணுவத் தரச் சான்றிதழுடன் இது உருவாக்கப்பட்டுள்ளது.
டிஸ்பிளே - 6.75-இன்ச் HD+ (720 x 1,570 பிக்சல்கள்) எல்சிடி (LCD) தொடுதிரையைக் கொண்டுள்ளது. இது 90Hz வரை ரெஃப்ரெஷ் ரேட் ஆதரவுடன் வருகிறது.
ப்ராசஸர் & ஸ்டோரேஜ் - 12nm தொழில்நுட்பத்தில் உருவாக்கப்பட்ட ஆக்டா-கோர் யுனிசாக் T610 (Unisoc T610) சிப்செட் இதில் பொருத்தப்பட்டுள்ளது. 6 எஃபிசியன்சி கோர்கள் மற்றும் 2 பெர்ஃபார்மன்ஸ் கோர்களைக் கொண்ட இது, அதிகபட்சமாக 1.8GHz வேகத்தில் செயல்படும். 4GB ரேம் உடன் கூடுதலாக 4GB வரை விர்ச்சுவல் ரேம் விரிவாக்க வசதியும் உள்ளது. 64GB இன்டெர்னல் ஸ்டோரேஜ் வழங்கப்பட்டுள்ள நிலையில், மைக்ரோ எஸ்டி கார்டு மூலம் 512GB வரை ஸ்டோரேஜை அதிகரித்துக் கொள்ளலாம்.
கேமரா - போட்டோ எடுப்பதற்குப் பின்புறத்தில் எல்இடி ஃபிளாஷ் உடன் கூடிய 13 மெகாபிக்சல் ஒற்றை கேமரா வழங்கப்பட்டுள்ளது. முன்புறத்தில் வாட்டர் டிராப் நாட்ச் டிசைனுக்குள் ஸ்கிரீன் ஃபிளாஷ் வசதியுடன் கூடிய 5 மெகாபிக்சல் செல்ஃபி கேமரா இடம்பெற்றுள்ளது.
பேட்டரி மற்றும் இதர வசதிகள் - 7,000mAh திறன் கொண்ட பெரிய பேட்டரியுடன் வரும் இந்த போன், யுஎஸ்பி டைப்-சி (USB Type-C) போர்ட் மூலம் 18W வயர்டு ஃபாஸ்ட் சார்ஜிங்கை ஆதரிக்கிறது. பாதுகாப்பிற்காகப் பக்கவாட்டில் பொருத்தப்பட்ட கைரேகை சென்சார் (Side-mounted fingerprint scanner) உள்ளது. இந்த ஸ்மார்ட்போனுக்கு நிறுவனம் 1 வருட வாரண்டி வழங்குகிறது.