HECI Bill யுஜிசி மற்றும் ஏஐசிடிஇ அமைப்புகளுக்கு பதிலாக புதிய இந்திய உயர்கல்வி ஆணையம். நாடாளுமன்ற குளிர்கால கூட்டத்தொடரில் மசோதா தாக்கல். முழு விவரம் உள்ளே.
வரும் டிசம்பர் 1ஆம் தேதி தொடங்கவுள்ள நாடாளுமன்றக் குளிர்கால கூட்டத்தொடரில், இந்தியாவின் உயர்கல்வித் துறையில் மிகப்பெரிய மாற்றத்தை ஏற்படுத்தும் வகையிலான முக்கிய மசோதா ஒன்று அறிமுகப்படுத்தப்பட உள்ளது. மக்களவை வெளியிட்ட அறிவிப்பின்படி, இந்த மசோதாவிற்கு "இந்திய உயர்கல்வி ஆணைய மசோதா" (Higher Education Commission of India Bill) எனப் பெயரிடப்பட்டுள்ளது. இது உயர்கல்வித் துறையின் நீண்டகால ஒழுங்குமுறை அமைப்புகளை மாற்றியமைக்கும் நோக்கம் கொண்டது.
25
யுஜிசி மற்றும் ஏஐசிடிஇ-க்கு மாற்று
தேசிய கல்விக் கொள்கையில் (NEP) பரிந்துரைக்கப்பட்டவாறு, புதிய இந்திய உயர்கல்வி ஆணையம் (HECI) உருவாக்கப்படவுள்ளது. இந்த புதிய அமைப்பு நடைமுறைக்கு வந்தால், தற்போது உயர்கல்வியை நிர்வகித்து வரும் பல்கலைக்கழக மானியக் குழு (UGC), அகில இந்தியத் தொழில்நுட்பக் கல்விக் குழு (AICTE) மற்றும் தேசிய ஆசிரியர் கல்விக்கான கவுன்சில் (NCTE) ஆகிய அமைப்புகள் மாற்றப்படும். அதாவது, கலை மற்றும் அறிவியல், தொழில்நுட்பம், மற்றும் ஆசிரியர் கல்வி ஆகியவற்றைத் தனித்தனியாக நிர்வகிக்கும் முறை முடிவுக்கு வரும்.
35
ஒரே நாடு ஒரே கல்வி ஒழுங்குமுறை
இந்திய உயர்கல்வி ஆணையம் (HECI) ஒரு தனித்துவமான மற்றும் ஒருங்கிணைந்த ஒழுங்குமுறை அமைப்பாகச் செயல்படும். இருப்பினும், மருத்துவக் கல்லூரிகள் மற்றும் சட்டக் கல்லூரிகள் இந்த ஆணையத்தின் அதிகார வரம்பிற்குள் வராது எனத் தெரிவிக்கப்பட்டுள்ளது. இந்த புதிய ஆணையம் முக்கியமாக மூன்று பணிகளைக் கவனிக்கும்: கல்வி நிறுவனங்களை ஒழுங்குபடுத்துதல் (Regulation), அங்கீகாரம் அளித்தல் (Accreditation) மற்றும் தொழில்முறை தரங்களை நிர்ணயித்தல் (Setting Professional Standards).
முக்கியமான விஷயமாக, நிதியுதவி (Funding) வழங்கும் அதிகாரம் இந்த புதிய ஆணையத்திடம் இருக்காது. இது நான்காவது தனிப் பிரிவாகக் கருதப்படுகிறது. கல்வி நிறுவனங்களுக்கான நிதியுதவியை வழங்கும் அதிகாரம், நிர்வாக அமைச்சகத்திடமே தொடர்ந்து இருக்கும் எனத் தெரிவிக்கப்பட்டுள்ளது. கல்வித் தரத்தை உயர்த்துவதே HECI-ன் முதன்மை நோக்கமாக இருக்கும்.
55
தேசிய கல்விக் கொள்கையின் பரிந்துரை
2018-ம் ஆண்டே இதற்கான வரைவு மசோதா விவாதிக்கப்பட்டது. தற்போது மத்திய கல்வி அமைச்சர் தர்மேந்திர பிரதான் தலைமையில் இதற்கான முயற்சிகள் புதுப்பிக்கப்பட்டுள்ளன. தேசிய கல்விக் கொள்கை 2020 ஆவணத்தின்படி, உயர்கல்வித் துறையை முழுமையாக மறுசீரமைக்கவும், அதனைத் துடிப்புடன் செயல்பட வைக்கவும் தற்போதைய ஒழுங்குமுறை அமைப்பை மாற்றியமைக்க வேண்டியது அவசியம் எனக் குறிப்பிடப்பட்டுள்ளது.
