காலேஜ் சேர்றதுக்கு முன்னாடி இதை செக் பண்ணுங்க! மாணவர்களுக்கு CBSE எச்சரிக்கை!

10 மற்றும் 12-ஆம் வகுப்பு மாணவர்கள் கல்லூரிகளில் சேரும் முன், அந்த நிறுவனங்களின் யுஜிசி அங்கீகாரத்தை உறுதி செய்ய வேண்டும் என சிபிஎஸ்இ எச்சரித்துள்ளது. பள்ளிகள் இதுகுறித்து விழிப்புணர்வு ஏற்படுத்த அறிவுறுத்தப்பட்டுள்ளது.

அங்கீகாரம் முக்கியம்

மேற்படிப்பிற்காகக் காத்திருக்கும் 10 மற்றும் 12-ஆம் வகுப்பு மாணவர்கள், கல்லூரிகளில் சேருவதற்கு முன்னதாக அந்த நிறுவனங்களின் அங்கீகாரத்தை உறுதி செய்ய வேண்டும் என்று சிபிஎஸ்இ (CBSE) வாரியம் அவசர அறிவுறுத்தல் ஒன்றை வெளியிட்டுள்ளது.

ஒவ்வொரு ஆண்டும் பல்கலைக்கழக மானியக் குழு (UGC) வெளியிடும் 'போலிப் பல்கலைக்கழகங்கள்' பட்டியலைக் குறிப்பிட்டு இந்த எச்சரிக்கை விடுக்கப்பட்டுள்ளது.

யுஜிசி (UGC) எச்சரிக்கை என்ன?

யுஜிசி தனது அதிகாரப்பூர்வ அறிவிப்பில், "மாணவர்கள் மற்றும் பெற்றோர்களிடையே விழிப்புணர்வை ஏற்படுத்தவே ஆண்டுதோறும் போலிப் பல்கலைக்கழகங்களின் பட்டியலை நாங்கள் வெளியிடுகிறோம். உரிய அங்கீகாரம் இல்லாத கல்வி நிறுவனங்களில் சேருவது மாணவர்களின் எதிர்காலத்தையும், வேலைவாய்ப்பையும் கடுமையாகப் பாதிக்கும்," என்று தெரிவித்துள்ளது.

பள்ளிகளுக்கு அறிவுறுத்தல்கள்

மாணவர்களின் நலன் கருதி சிபிஎஸ்இ பள்ளிகளுக்குக் கீழ்க்கண்ட உத்தரவுகளைப் பிறப்பித்துள்ளது:

• ஆலோசனை வழங்குதல்: 10 மற்றும் 12-ஆம் வகுப்பு மாணவர்கள் மற்றும் அவர்களது பெற்றோருக்கு போலிப் பல்கலைக்கழகங்களால் ஏற்படும் ஆபத்துகள் குறித்துப் பள்ளிகள் போதிய விழிப்புணர்வை வழங்க வேண்டும்.

• அங்கீகாரத்தை சரிபார்த்தல்: உயர்கல்வி நிறுவனங்களில் சேருவதற்கு முன்பு, யுஜிசியின் அதிகாரப்பூர்வ இணையதளமான www.ugc.ac.in-க்குச் சென்று "HEIs" என்ற பகுதியில் அந்த நிறுவனத்தின் அங்கீகாரத்தைச் சரிபார்க்க மாணவர்களுக்கு அறிவுறுத்த வேண்டும்.

• தகவல் பலகை: பள்ளியின் தகவல் பலகைகள், இணையதளம் மற்றும் பெற்றோர்-ஆசிரியர் கூட்டங்களில் (PTM) இது குறித்த தகவல்களைத் தெளிவாகத் தெரியப்படுத்த வேண்டும்.

மாணவர்கள் கவனத்திற்கு

பெயர் பலகைகளையும், விளம்பரங்களையும் மட்டும் நம்பி கல்லூரிகளில் சேர வேண்டாம். முறையான யுஜிசி அங்கீகாரம் பெற்ற கல்லூரிகளில் மட்டுமே விண்ணப்பிக்குமாறு சிபிஎஸ்இ வலியுறுத்தியுள்ளது.