50,000 பேரை வேலையில் இருந்து தூக்கும் கார் நிறுவனம்.. இதுதான் காரணம்!

ஜெர்மனியின் முன்னணி கார் நிறுவனமான ஃபோக்ஸ்வேகன், 2030-க்குள் 50,000 பேரை வேலையில் இருந்து நீக்க முடிவு செய்துள்ளது. இது தொடர்பான முழு விவரங்களை இந்த செய்தியில் பார்க்கலாம்.

ஃபோக்ஸ்வேகன் நிறுவனம்

அமெரிக்கா-இஸ்ரேல்-ஈரான் போர் பதற்றம் உலக சந்தைகளைப் பாதித்துள்ளது. பல நாடுகள் அமெரிக்காவின் வரிகளை எதிர்கொள்கின்றன. இந்தச் சூழலில், முன்னணி ஆட்டோமொபைல் நிறுவனமான ஃபோக்ஸ்வேகன், 2030ம் ஆண்டுக்குள் ஜெர்மனியில் 50,000 பேரை வேலையில் இருந்து நீக்குவதாக அறிவித்துள்ளது.

ஃபோக்ஸ்வேகன் லாபம் குறைந்தது

கடந்த பத்து ஆண்டுகளில் இல்லாத அளவுக்கு நிறுவனத்தின் லாபம் குறைந்துள்ளது. சீன எலெக்ட்ரிக் வாகன (EV) உற்பத்தியாளர்களின் போட்டி, உற்பத்திச் செலவுகள் அதிகரிப்பு, அமெரிக்க வரிகளின் தாக்கம் என பல சவால்களை ஃபோக்ஸ்வேகன் எதிர்கொள்கிறது. இவை அனைத்தும் நிறுவனத்தின் வருவாயைப் பாதித்துள்ளன.

50,000 வேலைகள் குறைக்கப்படும்

ஃபோக்ஸ்வேகன் குழுமம் 2030-க்குள் ஜெர்மனியில் சுமார் 50,000 வேலைகளைக் குறைக்கும் என்று நிறுவனத்தின் சிஇஓ ஆலிவர் ப்ளூம், பங்குதாரர்களுக்கான ஆண்டு அறிக்கையில் தெரிவித்துள்ளார். 

இந்த ஆட்குறைப்பு ஃபோக்ஸ்வேகன் பிராண்டில் மட்டுமல்லாமல், அதன் பிரீமியம் பிராண்டுகளான ஆடி, போர்ஷே மற்றும் மென்பொருள் நிறுவனமான கேரியாட் (Cariad) ஆகியவற்றையும் பாதிக்கும் என சிஇஓ ப்ளூம் கூறியுள்ளார்.

சவால்கள் என்னென்ன?

ஆண்டுக்கு 15 பில்லியன் யூரோக்களை சேமிக்கும் திட்டத்தின் ஒரு பகுதியாக இந்த நடவடிக்கை எடுக்கப்பட்டுள்ளது. இதற்காக, 2024 இறுதிக்குள் தொழிலாளர் சங்கங்களுடன் ஒப்பந்தம் செய்யப்பட்டுள்ளது. 

அமெரிக்க அதிபர் டொனால்ட் டிரம்ப் நிர்வாகம் வெளிநாட்டு கார் தயாரிப்பாளர்களுக்கு வரி விதிப்பதற்கு முன்பே, ஃபோக்ஸ்வேகன் பல சிக்கல்களைச் சந்தித்தது. ஐரோப்பாவில் தேவை குறைவு, எலெக்ட்ரிக் வாகனங்களில் அதிக முதலீடு, சீனாவில் விற்பனை சரிவு போன்றவை முக்கிய சவால்களாக இருந்தன.

விற்பனை பின்தங்கியுள்ளது

உலகின் மிகப்பெரிய கார் சந்தையான சீனாவில், ஃபோக்ஸ்வேகன் ஒரு காலத்தில் கிங். ஆனால் இப்போது BYD, Geely போன்ற உள்ளூர் பிராண்டுகளின் போட்டியால், அதன் விற்பனை பின்தங்கியுள்ளது. உள்நாட்டு விலைப்போட்டியில் இருந்து தப்பிக்க, சீன கார் பிராண்டுகள் ஐரோப்பிய சந்தையைப் பயன்படுத்த திட்டமிட்டுள்ளன. இது ஃபோக்ஸ்வேகன் மீதான அழுத்தத்தை மேலும் அதிகரிக்கும் என சிஇஓ ப்ளூம் ஒரு செய்தியாளர் சந்திப்பில் கூறினார். 'செலவுகளைக் குறைப்பதில் நாங்கள் வேகமாக செயல்பட வேண்டும்' என்றும் அவர் குறிப்பிட்டார்.

விற்பனை வளர்ச்சி கணிப்பு

2025-ல் ஃபோக்ஸ்வேகன் 8.9 பில்லியன் யூரோ ($10.4 பில்லியன்) செயல்பாட்டு லாபம் ஈட்டியது. இது கடந்த ஆண்டை விட 53% அதிகம் என்றாலும், ஆய்வாளர்களின் எதிர்பார்ப்பான 9.4 பில்லியன் யூரோவை விடக் குறைவு. நிறுவனத்தின் 2026-ம் ஆண்டுக்கான விற்பனை வளர்ச்சி கணிப்பும் 0% முதல் 3% வரை மட்டுமே இருக்கும் என மதிப்பிடப்பட்டுள்ளது.