ரூ.5 கோடி கட்டணம்... மாணவர் மில்லியனர் ஆகாவிட்டால் பணம் வாபஸ்: உலகையே அதிரவைக்கும் விசித்திரப் பள்ளி!

நியூயார்க்கில் தொடங்கப்படவுள்ள ‘ஃபவுண்டர்ஸ் ஹை ஸ்கூல்’ (Founders High School), மாணவர்களை மில்லியனர் ஆக்குவதற்காக ₹5 கோடி ($600,000) கல்விக் கட்டணம் வசூலிக்கும் புதிய திட்டத்தை அறிவித்துள்ளது.

ரூ.5 கோடி கட்டணம்... மாணவர் மில்லியனர் ஆகாவிட்டால் பணம் வாபஸ்!

உங்கள் டீனேஜ் பருவப் பிள்ளையை கோடீஸ்வரராக்க (Millionaire) ஒரு பள்ளி ரூ.5 கோடி ($600,000) கட்டணம் வாங்குகிறது என்றால் நம்ப முடிகிறதா? ஆம், அப்படியொரு விசித்திரமான கல்வி முறை தற்போது உலக அரங்கில் பேசுபொருளாகியுள்ளது.

'ஆல்ஃபா ஸ்கூல்' (Alpha School) அமைப்பின் கீழ் தொடங்கப்படவுள்ள இந்த ‘ஃபவுண்டர்ஸ் ஹை ஸ்கூல்’ (Founders High School), வழக்கமான கல்வி நிறுவனங்களிலிருந்து முற்றிலும் மாறுபட்டுச் செயல்படவிருக்கிறது.

ஹார்வர்டை விடக் கடினமான சேர்க்கை!

பணம் இருந்தால் மட்டும் இந்தப் பள்ளியில் இடம் கிடைத்துவிடாது. பிரபலங்களான பெரும் பணக்காரர்கள் அல்லது அரசியல்வாதிகளின் பிள்ளைகளாக இருந்தாலும் சரி, கடுமையான தகுதித் தேர்வுகளைக் கடக்க வேண்டும். உலகம் முழுவதிலுமிருந்து வெறும் 20 மாணவர்கள் மட்டுமே தேர்ந்தெடுக்கப்படுவர். இதனால் ஹார்வர்ட் அல்லது ஸ்டான்போர்டு பல்கலைக் கழகங்களை விட இங்கு அட்மிஷன் பெறுவது பன்மடங்கு கடினம்.

14 வயதுடைய மாணவர்கள், நிஜ முதலீட்டாளர்களின் கடுமையான குறுக்கு விசாரணைகள் உட்பட 5 நிலைகள் கொண்ட உளவியல் சோதனைகளை (Psychological trials) எதிர்கொள்ள வேண்டும். தங்களுக்கு ஒரு நிறுவனத்தின் தலைமை செயல் அதிகாரிக்குரிய (CEO) மனநிலை இருக்கிறது என்பதை நிரூபித்தால் மட்டுமே அனுமதி கிடைக்கும்.

வெறும் 3 மணி நேரத்தில் பள்ளிப் பாடம்!

இந்தப் பள்ளியின் தினசரி அட்டவணையே முற்றிலும் புதுமையானது. பள்ளி காலை 8:15 மணிக்குத் தொடங்குகிறது. அதிநவீன செயற்கை நுண்ணறிவு (AI Model) உதவியுடன், ஒரு நாளுக்கான மொத்த உயர்நிலைப் பள்ளி பாடத்திட்டமும் வெறும் 3 மணி நேரத்தில் (காலை 11:00 மணிக்கெல்லாம்) கற்பித்து முடிக்கப்படுகிறது.

அடுத்த 6 மணி நேரம்: நிஜ தொழில்முனைவோர் பயிற்சி!காலை 11:00 மணிக்கு மேல் மீதமிருக்கும் 6 மணி நேரம் முழுக்க 'பில்ட் பிளாக்ஸ்' (Build Blocks) திட்டத்திற்காக ஒதுக்கப்படுகிறது. இதில் புத்தகப் படிப்பு கிடையாது; மாணவர்கள் உண்மையான தொழில்முனைவோருடன் (Entrepreneurs) கைகோர்த்து நிஜமான நிறுவனங்களை உருவாக்குகிறார்கள்.

மாணவர்களின் வெற்றியை உறுதிசெய்ய, ஒவ்வொருவருக்கும் தலா 3 தனிப்பட்ட வழிகாட்டிகள் (Mentors) நியமிக்கப்படுகின்றனர்: பிசினஸ் மென்டார் (Business Mentor) – தொழிலை வழிநடத்த. மைண்ட்செட் மென்டார் (Mindset Mentor) – மன உறுதியை வளர்க்க. வெல்னஸ் கோச் (Wellness Coach) – உடல் மற்றும் மன நலனைப் பேண.

வால் ஸ்ட்ரீட்டை மிஞ்சும் கடுமையான இலக்குகள்!

இங்கு படிக்கும் மாணவர்கள் படிப்பை முடிக்கும்போது வெறும் மதிப்பெண் சான்றிதழை மட்டும் வாங்க முடியாது; அவர்கள் நிறுவனத்தை லாபகரமாக நடத்தி நிரூபிக்க வேண்டும்.

முதல் வருடம்: மாணவரின் தொழில் குறைந்தது $400,000 வருவாய் ஈட்ட வேண்டும்.

இரண்டாவது வருடம்: தங்களது முதல் அதிகாரப்பூர்வ ஊழியரை (Employee) நிறுவனத்தில் பணியமர்த்த வேண்டும்.

நான்காவது வருடம் (பட்டம் பெறும்போது): மாணவரின் நிறுவனம் குறைந்தது $1 மில்லியன் (சுமார் ₹8+ கோடி) லாபம் ஈட்டியிருக்க வேண்டும்!

100% ரீஃபண்ட் கேரண்டி!

ஒருவேளை 4-வது ஆண்டு முடிவில் மாணவர் அந்த $1 மில்லியன் லாப இலக்கை எட்டத் தவறினால் என்ன நடக்கும்? பள்ளி சட்டப்பூர்வமாகப் பெற்றோரிடம் வாங்கிய மொத்தக் கட்டணமான முழு ₹5 கோடியையும் (₹5,00,00,000) அப்படியே திருப்பித் தந்துவிடும் (Full Refund)!

எப்போது தொடங்குகிறது?

அமெரிக்காவின் நியூயார்க் நகரில் 2026-ஆம் ஆண்டின் ஃபால் (Fall 2026) பருவத்தில் இந்தப் பள்ளி அதிகாரப்பூர்வமாகத் தொடங்கப்பட உள்ளது.