டாடாவின் ட்ரிபிள் ட்ரீட்... 3 EV கார்களை கொத்தாக களமிறக்க திட்டம்..!

இந்திய எலக்ட்ரிக் கார் மார்க்கெட்டில் தனது இடத்தைப் பலப்படுத்த டாடா மோட்டார்ஸ் தயாராகி வருகிறது. இந்த ஆண்டு மூன்று புதிய மாடல்களை அறிமுகப்படுத்த அந்நிறுவனம் திட்டமிட்டுள்ளது. அதைப்பற்றி பார்க்கலாம்.

Tata EV new models

இந்தியாவின் மிகப்பெரிய எலக்ட்ரிக் கார் விற்பனையாளர்களில் டாடா மோட்டார்ஸ் முக்கியமான நிறுவனம். தற்போது, தங்களது எலக்ட்ரிக் கார் மாடல்களின் எண்ணிக்கையை வேகமாக அதிகரித்து வருகிறது. இந்தச் சூழலில், போட்டி நிறுவனங்களிடமிருந்து வரும் சவால்களைச் சமாளிக்க, டாடா தனது திட்டங்களை வேகப்படுத்தியுள்ளது. அதன்படி, மூன்று புதிய எலக்ட்ரிக் கார்களை டாடா களமிறக்க உள்ளது.

டாடா சியரா இவி

டாடா மோட்டார்ஸ், தனது பெரிதும் எதிர்பார்க்கப்படும் சியரா இவி காரை 2026, மே 19 அன்று இந்தியாவில் அறிமுகப்படுத்த உள்ளது. இது அந்த ஆண்டின் மிக முக்கியமான இவி அறிமுகங்களில் ஒன்றாக இருக்கும். எலக்ட்ரிக் சியரா, அதன் பெட்ரோல்/டீசல் (ICE) மாடலைப் போலவே தோற்றமளிக்கும். இதன் ஒட்டுமொத்த டிசைன், பின்பக்க பனோரமிக் கண்ணாடி பகுதி, கிளிஞ்சல் வடிவ டெயில்கேட் போன்ற அம்சங்கள் அப்படியே இருக்கும். ஆனால், இவி மாடல் என்பதால், கிரில், வித்தியாசமான முன்பக்க வடிவமைப்பு, ஏரோ-டைனமிக்ஸ் ஆப்டிமைஸ் செய்யப்பட்ட அலாய் வீல்கள் போன்றவை இதில் இடம்பெறும்.

உட்புறத்தில், புதிய நிறங்கள் மற்றும் மெட்டீரியல்கள் பயன்படுத்தப்படும் என எதிர்பார்க்கப்படுகிறது. டாடா நிறுவனம் இன்னும் அதிகாரப்பூர்வமாக காரின் உட்புற வடிவமைப்பு மற்றும் வசதிகள் பட்டியலை வெளியிடவில்லை. ஆனாலும், இதன் வசதிகள் ICE மாடலைப் போலவே இருக்க வாய்ப்புள்ளது. அதன்படி, இதில் மூன்று ஸ்கிரீன்கள் (சென்ட்ரல் இன்ஃபோடெயின்மென்ட், முன்பக்க பயணிக்கான டிஸ்ப்ளே, டிஜிட்டல் டிரைவர் டிஸ்ப்ளே), வென்டிலேஷன் வசதியுடன் கூடிய பவர் முன்பக்க சீட்கள், பனோரமிக் சன்ரூஃப், வயர்லெஸ் சார்ஜர், பவர் டெயில்கேட், வயர்லஸ் ஆப்பிள் கார்பிளே மற்றும் ஆண்ட்ராய்டு ஆட்டோ, 360 டிகிரி கேமரா, ஆம்பியன்ட் லைட்டிங், டால்பி அட்மாஸ் கொண்ட 12-ஸ்பீக்கர் ஜேபிஎல் ஆடியோ சிஸ்டம் மற்றும் லெவல் 2 ADAS போன்ற அம்சங்கள் இருக்கலாம்.

டாடா டியாகோ இவி ஃபேஸ்லிஃப்ட்

2026-ம் ஆண்டின் மத்தியில், டாடா மோட்டார்ஸ் டியாகோ இவி-யின் ஃபேஸ்லிஃப்ட் மாடலையும் அறிமுகப்படுத்தும். இதில் புதிய முன்பக்க டிசைன், புதிய கலர் ஆப்ஷன்கள், புதிய பம்பர்கள் மற்றும் மறுவடிவமைப்பு செய்யப்பட்ட வீல்கள் ஆகியவை அடங்கும்.

இந்த எலக்ட்ரிக் ஹேட்ச்பேக் காரின் உள்ளே, பெரிய ஃப்ளோட்டிங்-டைப் டச்ஸ்கிரீன் இன்ஃபோடெயின்மென்ட் சிஸ்டம், ஆட்டோமேட்டிக் கிளைமேட் கண்ட்ரோல், டிஜிட்டல் MID, பின்பக்க ஏசி வென்ட்கள் மற்றும் புதிய டாடா மாடல்களில் வருவது போல, ஒளிரும் டாடா லோகோவுடன் கூடிய இரண்டு-ஸ்போக் ஸ்டீயரிங் வீல் ஆகியவை இடம்பெறும். 360 டிகிரி கேமரா, சன்ரூஃப் போன்ற அம்சங்களும் சேர்க்கப்படலாம். தற்போதைய டியாகோ இவி, 19.2kWh மற்றும் 24kWh பேட்டரி பேக் ஆப்ஷன்களுடன் வருகிறது.

டாடா அவின்யா எக்ஸ்

இந்த ஆண்டின் இறுதியில், டாடா மோட்டார்ஸ் அவின்யா சீரிஸ் மூலம் லக்சரி எலக்ட்ரிக் கார் சந்தையில் நுழைய உள்ளது. மற்ற டாடா எலக்ட்ரிக் கார்களைப் போலல்லாமல், அவின்யா சீரிஸில் பெட்ரோல் அல்லது டீசல் இன்ஜின் ஆப்ஷன் இருக்காது. இது முழுக்க முழுக்க எலக்ட்ரிக் மாடலாக மட்டுமே வரும். இதை விற்பனை செய்ய பிரத்யேகமான ரீடெய்ல் ஷோரூம்கள் அமைக்கப்படும்.

அவின்யா சீரிஸ் கார்களில் தட்டையான தரை, விசாலமான கேபின் இடம், மற்றும் தொழில்நுட்பத்தில் மேம்பட்ட அம்சங்கள் நிறைந்த ஒரு லக்சுரி அனுபவம் கிடைக்கும். ஒருமுறை முழுமையாக சார்ஜ் செய்தால், 500 முதல் 720 கிலோமீட்டர் வரை பயணிக்க முடியும் என்று எதிர்பார்க்கப்படுகிறது.