டிசம்பரில் ராயல் என்ஃபீல்டு மாஸ்..! 1.03 லட்சம் விற்பனை..!

ராயல் என்பீல்ட் 2025 டிசம்பர் மாதத்தில் 1,03,574 மோட்டார்சைக்கிள்களை விற்று 30% ஆண்டு வளர்ச்சியைப் பதிவு செய்துள்ளது. உள்நாட்டு சந்தையில் 37% வளர்ச்சி கண்ட நிலையில், ஏற்றுமதியில் சிறிய சரிவு ஏற்பட்டது.

ராயல் என்ஃபீல்டு விற்பனை

பிரபல இருசக்கர வாகன உற்பத்தியாளரானராயல் என்பீல்ட் 2025 ஆண்டை வலுவான விற்பனை சாதனையுடன் நிறைவு செய்தது. டிசம்பர் மாதத்தில் மட்டும் நிறுவனம் 1,03,574 மோட்டார்சைக்கிள்களை விற்பனை செய்துள்ளது. கடந்த ஆண்டு இதே மாதத்தில் விற்கப்பட்ட 79,466 யூனிட்களுடன் ஒப்பிடும்போது, ​​இது 30 சதவீத ஆண்டு வளர்ச்சியை காட்டுகிறது. உள்நாட்டு சந்தையில் தொடர்ந்த தேவை, புதிய மாடல்களின் வெற்றிகரமான அறிமுகம் மற்றும் உலகளாவிய ரைடிங் சமூகத்துடன் உருவான உறவு ஆகியவை இந்த வளர்ச்சிக்கு முக்கிய காரணங்களாக அமைந்துள்ளன.

டிசம்பர் மாத விற்பனையில் உள்நாட்டு சந்தையே முக்கிய பங்காகியுள்ளது. 2024 டிசம்பரில் 67,891 யூனிட்களாக இருந்து உள்நாட்டு விற்பனை, இந்த ஆண்டு 37% உயர்ந்து 93,177 யூனிட்களாக அதிகரித்துள்ளது. இதன் மூலம் இந்திய சந்தையில் ராயல் என்ஃபீல்டின் பிடிப்பு மேலும் வலுவடைந்துள்ளது. அதே நேரத்தில், ஏற்றுமதி சந்தையில் சிறிய சரிவு காணப்பட்டது. சில வெளிநாட்டு சந்தைகளில் தேவை குறைந்ததன் காரணமாக, ஏற்றுமதி 10% குறைந்து 10,397 யூனிட்களாக பதிவாகியுள்ளது.

ராயல் என்ஃபீல்டு டிசம்பர் சேல்ஸ்

மொத்தமாக 2026 நிதியாண்டில் (இதுவரை), ராயல் என்ஃபீல்டு 9,21,098 மோட்டார்சைக்கிள்களை விற்பனை செய்துள்ளது. இது கடந்த ஆண்டின் இதே காலத்துடன் ஒப்பிடுகையில் 27% வளர்ச்சியாகும். இதில் உள்நாட்டு விற்பனை 8,21,908 யூனிட்கள் என பதிவாகி, 26% ஆண்டு வளர்ச்சியை கண்டுள்ளது. ஏற்றுமதி விற்பனையும் 99,190 யூனிட்களாக உயர்ந்து, 34% வலுவான வளர்ச்சியை பதிவு செய்துள்ளது. மாதந்தோறும் ஏற்ற இறக்கங்கள் இருந்தாலும், சர்வதேச சந்தைகளில் பிராண்டின் வளர்ச்சி தொடர்வதை இது காட்டுகிறது.

சர்வதேச சந்தைகளில் தனது இருப்பை மேலும் வலுப்படுத்தும் நோக்கில், ராயல் என்ஃபீல்டு நேபாளத்தில் மேம்படுத்தப்பட்ட ஹண்டர் 350 மாடலை அறிமுகப்படுத்தியுள்ளது. புதிய ஸ்ட்ரீட்-ஸ்டைல் ​​வண்ணங்கள், மேம்பட்ட எர்கோனாமிக்ஸ், புதுப்பிக்கப்பட்ட பின்புற சஸ்பென்ஷன் மற்றும் ஸ்லிப்-ஆண்ட்-அசிஸ்ட் கிளட்ச் போன்ற அம்சங்கள் இடம்பெற்றுள்ளன. டிசம்பர் மாத செயல்திறன் குறித்து நிறுவன நிர்வாகம் கருத்து தெரிவிக்கையில், “2025 ஆம் ஆண்டு வலுவான வளர்ச்சியும், ரைடிங் சமூகத்துடன் ஆழ்ந்த உறவும் கொண்ட ஒரு நினைவுகூரத்தக்க ஆண்டாக அமைந்துள்ளது” என்று தெரிவிக்கப்பட்டுள்ளது.