எங்க திரும்பினாலும் இ-பைக், இ-ஆட்டோ... தினமும் இவ்ளோ பெட்ரோல் மிச்சமாகுதா? காற்று மாசுபாட்டுக்கும் 'குட்-பை'!

மத்திய அரசின் ரூ.10,900 கோடி மதிப்பிலான ‘பிஎம் இ-டிரைவ்’ (PM e-DRIVE) திட்டத்தின் கீழ் இந்தியாவில் மின்சார வாகனப் புரட்சி தீவிரமடைந்துள்ளது. இத்திட்டத்தில் இதுவரை 34.18 லட்சத்திற்கும் மேற்பட்ட மின்சார வாகனங்கள் பதிவாகியுள்ளன.

2 ஆண்டுகளை நெருங்கும் 'பி.எம் இ-டிரைவ்' திட்டம்!

சாலைகளில் சீறிப்பாயும் மின்சார வாகனங்கள் வெறும் பயணத்தை மட்டும் எளிதாக்கவில்லை; இந்தியாவின் காற்று மாசுபாட்டையும், எரிபொருள் செலவையும் வரலாறு காணாத வகையில் புரட்டிப் போட்டுக்கொண்டிருக்கின்றன. மத்திய அரசின் புகழ்பெற்ற 'பிஎம் இ-டிரைவ்' (PM e-DRIVE) திட்டம் தனது 2-வது ஆண்டை நெருங்கி வரும் வேளையில், அது ஏற்படுத்தியுள்ள தாக்கம் ஆச்சரியத்தை அளிக்கிறது.

34 லட்சத்தை எட்டிய மின்சாரப் புரட்சி!

மின்சார வாகனங்களை நாடெங்கும் பரவலாக்கவும், சார்ஜிங் வசதிகளை மேம்படுத்தி உள்நாட்டு உற்பத்தியைப் பெருக்கவும் தொடங்கப்பட்ட இத்திட்டத்தில், இதுவரை 34.18 லட்சத்திற்கும் அதிகமான மின்சார வாகனங்கள் பதிவாகியுள்ளன (செப்டம்பர் 26, 2026 நிலவரப்படி).

முன்னதாக மார்ச் 31, 2024 உடன் 'ஃபேம்' (FAME) திட்டம் முடிவடைந்ததும், இடைக்காலமாக 'இஎம் Rancho/EMPS 2024' திட்டம் ரூ.778 கோடியில் 6 மாதங்கள் செயல்படுத்தப்பட்டது. அதனைத் தொடர்ந்து, அக்டோபர் 1, 2024 அன்று ரூ.10,900 கோடி பிரம்மாண்ட நிதியுடன் 'பிஎம் இ-டிரைவ்' களம் கண்டது.

பதிவான வாகனங்களின் விவரங்கள்

இருசக்கர வாகனங்கள்: ஒட்டுமொத்த பதிவில் 91% பங்களிப்புடன் (சுமார் 31.19 லட்சம்) இருசக்கர வாகனங்களே முதலிடத்தில் ஆதிக்கம் செலுத்துகின்றன.

ஆட்டோக்கள்: 2.88 லட்சம் எலக்ட்ரிக் ஆட்டோக்கள் பதிவாகி 8.4% பங்கைப் பெற்றுள்ளன.

பிற வாகனங்கள்: 11,121 இ-ரிக்‌ஷா, இ-கார்ட்களும், 236 மின்சார லாரிகளும் பயன்பாட்டுக்கு வந்துள்ளன.

வியக்க வைக்கும் புள்ளிவிவரங்கள்: ஒரு நாளின் சேமிப்பு எவ்வளவு?

மின்சார வாகனங்களின் வருகையால் அரசு வெளியிட்டுள்ள சுற்றுச்சூழல் மற்றும் பொருளாதாரக் கணக்கீடுகள் வியப்பைத் தருகின்றன.

நாள் ஒன்றுக்கு சுமார் 31.3 லட்சம் லிட்டர் எரிபொருள் மிச்சப்படுத்தப்படுகிறது. இது தோராயமாக 13 லிட்டர் பெட்ரோல் டேங்க் கொண்ட 2.4 லட்சம் மோட்டார் சைக்கிள்களுக்கு முழு டேங்க் பெட்ரோல் நிரப்புவதற்குச் சமமாகும். தினசரி சுமார் 38.5 லட்சம் கிலோ கரியமில வாயு (CO2) காற்று மண்டலத்தில் கலப்பது தவிர்க்கப்படுகிறது. இந்த அளவு நச்சு வாயுவை ஒரே நாளில் உறிஞ்ச வேண்டும் என்றால், சுமார் 6.4 கோடி வளர்ந்த மரங்கள் தேவைப்படும்.

உயிர்காக்கும் அவசர சேவையிலும் இ-வாகனங்கள்!

பயணிகள் வாகனங்களை மட்டுமின்றி, அவசர மருத்துவ சேவையையும் பசுமைப் பாதையில் கொண்டு செல்ல அரசு இறங்கியுள்ளது. இதற்காக 'பிஎம் இ-டிரைவ்' திட்டத்தின் கீழ் 3,811 எலக்ட்ரிக் ஆம்புலன்ஸ்களை களமிறக்க ரூ.500 கோடி நிதி ஒதுக்கப்பட்டுள்ளது.இதற்கு ஆதரவாக வாகன நிறுவனங்களும் களம் கண்டுள்ளன;

ஃபோர்ஸ் மோட்டார்ஸ் நிறுவனம் தனது பிரபல ‘டிராவலர்’ தளத்தில், ஒருமுறை சார்ஜ் செய்தால் 235 கி.மீ வரை செல்லக்கூடிய இ-ஆம்புலன்ஸை அறிமுகப்படுத்தி அசத்தியுள்ளது.இந்தியாவின் தூய காற்று மற்றும் பசுமைப் பொருளாதார இலக்கை நோக்கிய இந்த மின்சாரப் பயணம், நாளுக்கு நாள் அசுர வேகத்தில் முன்னேறி வருகிறது.