Swift Sport: பவர்ஃபுல் அவதாரத்தில் புதிய சுஸுகி ஸ்விஃப்ட் ஸ்போர்ட் கார்..! எப்போ ரிலீஸ்?

இந்தியாவில் நாம் பார்க்கும் ஸ்விஃப்ட் காருடைய பவர்ஃபுல் வெர்ஷனான புதிய ஸ்விஃப்ட் ஸ்போர்ட் இந்த வருட கடைசியில அறிமுகமாகலாம் என தகவல் வெளியாகி உள்ளது. அதைப்பற்றி பார்க்கலாம்.

New Suzuki Swift Sport Car

இந்தியாவில் சமீபத்தில் அறிமுகமான நான்காம் தலைமுறை ஸ்விஃப்ட் காரை அடிப்படையாக வைத்து, ஒரு புதிய ஸ்விஃப்ட் ஸ்போர்ட் மாடலை சுஸுகி உருவாக்கி வருவதாக தகவல் வெளியாகியுள்ளது. ஜப்பானைச் சேர்ந்த 'பெஸ்ட் கார் வெப்' என்ற பத்திரிகை வெளியிட்ட ஒரு ரிப்போர்ட்டின்படி, இந்த ஆண்டின் இறுதியில் புதிய தலைமுறை ஸ்விஃப்ட் ஸ்போர்ட்டை சுஸுகி அறிமுகப்படுத்த திட்டமிட்டுள்ளது. இந்த ஹாட் ஹேட்ச்பேக் மாடல் முன்னதாகவே வரும் என எதிர்பார்க்கப்பட்ட நிலையில், சில காரணங்களால் தாமதமாகியுள்ளது.

புதிய ஸ்விஃப்ட் ஸ்போர்ட், வழக்கமான ஸ்விஃப்ட்டை விட கொஞ்சம் அகலமாக இருக்கும் என்றும், இதனால் இதன் தோற்றம் இன்னும் ஸ்போர்ட்டியாக இருக்கும் என்றும் கூறப்படுகிறது. மேலும், சிறந்த ஓட்டுதல் அனுபவத்தைக் கொடுப்பதற்காக, காரின் பாடி மற்றும் சஸ்பென்ஷன் அமைப்பை சுஸுகி மேம்படுத்தியுள்ளது.

148 hp பவர், 240 Nm டார்க்

புதிய ஸ்விஃப்ட் ஸ்போர்ட்டில் 48-வோல்ட் மைல்ட்-ஹைப்ரிட் தொழில்நுட்பத்துடன் கூடிய 1.4 லிட்டர் டர்போசார்ஜ்டு நான்கு சிலிண்டர் பெட்ரோல் இன்ஜின் பொருத்தப்பட்டுள்ளது. இந்த இன்ஜின் 148 குதிரைத்திறன் (hp) சக்தியையும், 240 Nm டார்க்கையும் உருவாக்கும். இதற்கு முந்தைய மாடலில் இருந்த இன்ஜினும் 1.4 லிட்டர் டர்போ பெட்ரோல் இன்ஜின்தான். ஆனால், அது 138 hp பவரையும், 230 Nm டார்க்கையும் மட்டுமே கொடுத்தது.

கியர்பாக்ஸ் மற்றும் பெர்ஃபாமென்ஸ்

முந்தைய மாடலைப் போலவே, இந்த புதிய ஸ்விஃப்ட் ஸ்போர்ட்டிலும் 6-ஸ்பீடு மேனுவல் மற்றும் 6-ஸ்பீடு ஆட்டோமேட்டிக் டிரான்ஸ்மிஷன் ஆப்ஷன்கள் கொடுக்கப்படும். இப்போதைக்கு இது ஃபிரன்ட்-வீல் டிரைவ் (FWD) மாடலாக மட்டுமே வந்தாலும், அடுத்த தலைமுறை மாடலில் ஆல்-வீல் டிரைவ் (AWD) சிஸ்டம் கொடுக்கப்படலாம் என்றும் சில தகவல்கள் தெரிவிக்கின்றன.

பெர்ஃபாமென்ஸை பொறுத்தவரை, இந்த கார் வெறும் 8 வினாடிகளில் 0-விலிருந்து 100 கி.மீ வேகத்தை எட்டிவிடும். இதன் அதிகபட்ச வேகம் மணிக்கு 210 கி.மீ. ஆகும். ஓட்டுதல் அனுபவத்தைத் தாண்டி, காரின் வெளிப்புற தோற்றத்திலும் பல மாற்றங்கள் செய்யப்பட்டுள்ளன. ஸ்போர்ட்டியான முன்பக்க கிரில், ஃபிரன்ட்-லிப் ஸ்பாய்லர், சைடு ஸ்கர்ட்ஸ், 17-இன்ச் அலாய் வீல்கள், இரட்டை எக்ஸாஸ்ட் பைப்புகள் மற்றும் ரியர் டிஃப்யூசர் போன்றவை இதன் முக்கிய அம்சங்கள். காரின் உள்ளே செமி-பக்கெட் சீட்கள், மெட்டாலிக் ஃபினிஷ் செய்யப்பட்ட பெடல்கள் மற்றும் பிரத்யேகமான அப்ஹோல்ஸ்டரி போன்றவை கொடுக்கப்படலாம்.

இந்தியாவில் வருமா?

மாருதி சுஸுகி நிறுவனம் இதுவரை ஸ்விஃப்ட் ஸ்போர்ட் மாடலை இந்தியாவில் அறிமுகப்படுத்தியதில்லை. அதனால், இந்த புதிய தலைமுறை மாடலும் இந்தியாவிற்கு வருவதற்கான வாய்ப்புகள் மிகவும் குறைவு. இந்த காரின் விற்பனை இங்கு குறைவாக இருக்கலாம் என்பதும், இதன் 1.4 லிட்டர் டர்போ இன்ஜினை உள்நாட்டில் தயாரிக்காததும் முக்கிய காரணங்களாகப் பார்க்கப்படுகிறது.