158 எச்பி பவர், ரேடார் வசதி மற்றும் அட்ஜெஸ்ட்டபிள் சீட் உடன் புதிய டிரையம்ப் டைகர் 1200 பைக்! இந்தியாவில் எப்போது அறிமுகம்? பைக்கின் எஞ்சின் பவர், சிறப்பம்சங்கள் மற்றும் எதிர்பார்க்கப்படும் விலை நிலவரம் என்ன?
இந்தியாவில் களமிறங்கும் 2027 டிரையம்ப் டைகர் 1200 பைக்!
சர்வதேச பிரீமியம் அட்வென்ச்சர் டூரர் பைக் சந்தையில் தனது ஆதிக்கத்தைத் தக்கவைக்கும் நோக்கில், பிரபல இருசக்கர வாகன தயாரிப்பு நிறுவனமான டிரையம்ப் (Triumph), 2027-ம் ஆண்டுக்கான தனது புதிய 'டைகர் 1200' மாடலை அதிகாரப்பூர்வமாக அறிமுகப்படுத்தியுள்ளது. கூடுதல் பவர், மறுவடிவமைப்பு செய்யப்பட்ட சஸ்பென்ஷன் மற்றும் ரேடார் அடிப்படையிலான நவீன பாதுகாப்புத் தொழில்நுட்பங்களுடன் தயாராகியுள்ள இந்த பைக், வரும் மார்ச் மாதம் இந்திய சந்தையில் விற்பனைக்கு அறிமுகமாக உள்ளது.
நீண்ட தூர நெடுஞ்சாலைப் பயணங்கள் மற்றும் கடினமான சாகசப் பயணங்களை மேற்கொள்ளும் ரைடர்களைக் குறிவைத்து உருவாக்கப்பட்டுள்ள இந்த மாடல், சக்திவாய்ந்த எஞ்சினுடன் சிறந்த ஓட்டுநர் வசதியையும், உயர் மட்ட பாதுகாப்பையும் உறுதி செய்கிறது.
24
அதிகரித்த எஞ்சின் செயல்திறன்
புதிய 2027 டிரையம்ப் டைகர் 1200 பைக்கில் 3 சிலிண்டர்கள் கொண்ட 1,160 சிசி லிக்யூடு கூல்டு எஞ்சின் பொருத்தப்பட்டுள்ளது. அதிகபட்சமாக 158 எச்பி (hp) பவரையும், 130 என்எம் (Nm) டார்க்கையும் வெளிப்படுத்தும் திறன் கொண்டது. முந்தைய தலைமுறை மாடலைவிட இதன் பவர் 8 எச்பி உயர்த்தப்பட்டுள்ளது குறிப்பிடத்தக்கது.
எஞ்சினின் சீரான இயக்கத்திற்காக சில முக்கிய பாகங்கள் மேம்படுத்தப்பட்டுள்ளன. மேலும், 6-ஸ்பீடு கியர்பாக்ஸ் மற்றும் குறைந்த பராமரிப்பு தேவைப்படும் ஷாப்ட் டிரைவ் (Shaft Drive) தொழில்நுட்பம் இதில் தொடர்கிறது. இது சமதள நெடுஞ்சாலைகள் மட்டுமின்றி, செங்குத்தான மலைப்பாதைகளிலும் தடங்கலற்ற செயல்திறனை வழங்குகிறது.
34
உயரத்தை அட்ஜஸ்ட் செய்யும் நவீன சீட் வசதி
பொதுவாக பெரிய அட்வென்ச்சர் பைக்குகளில் அதிக இருக்கை உயரம் (Seat Height) சவாலாக இருக்கும் சூழலில், அதற்குத் தீர்வாக புதிய டைகர் 1200 பைக்கில் இருக்கை உயரத்தைத் தேவைக்கு ஏற்ப மாற்றியமைக்கும் வசதி சேர்க்கப்பட்டுள்ளது. பைக் நிற்கும் சமயங்களில், சஸ்பென்ஷன் அமைப்பு செயல்பட்டு இருக்கையின் உயரத்தை 30 மிமீ வரை குறைக்கிறது.
மேலும், கூடுதல் ஆப்ஷனாக வழங்கப்படும் 'லோ சீட்' (Low Seat) வசதியைப் பயன்படுத்தும்போது, இருக்கை உயரம் அதிகபட்சமாக 790 மிமீ வரை குறையும். இதனால் குறைந்த உயரம் கொண்ட ரைடர்களும் கூட சிக்னல்கள் மற்றும் நிறுத்தங்களில் பைக்கை மிக எளிதாகக் காலூன்றி கையாள முடியும். அத்துடன், வெவ்வேறு வகையான சாலை நிலைகளுக்கேற்ப தகவமைத்துக் கொள்ளும் வகையில் இதன் சஸ்பென்ஷன் அமைப்பும் ட்யூன் செய்யப்பட்டுள்ளது.
சர்வதேச அளவில் டைகர் 1200 ஜிடி புரோ (GT Pro), ஜிடி எக்ஸ்புளோரர் (GT Explorer), ராலி புரோ (Rally Pro) மற்றும் ராலி எக்ஸ்புளோரர் (Rally Explorer) என நான்கு வேரியண்ட்டுகளில் கிடைக்கிறது. இதில் ஜிடி புரோ 20 லிட்டர் ஃபியூயல் டேங்க்கையும், ராலி எக்ஸ்புளோரர் 30 லிட்டர் ஃபியூயல் டேங்க்கையும் கொண்டுள்ளன. இவற்றில் ஜிடி புரோ மற்றும் ராலி எக்ஸ்புளோரர் ஆகிய இரண்டு மாடல்கள் மட்டுமே இந்தியாவில் களமிறக்கப்படும் என எதிர்பார்க்கப்படுகிறது.
இந்தியாவுக்கான இதன் அதிகாரப்பூர்வ விலை விவரங்கள் இன்னும் வெளியிடப்படவில்லை. எனினும், மேம்பட்ட தொழில்நுட்பங்கள், கூடுதல் எஞ்சின் ஆற்றல் மற்றும் ரேடார் பாதுகாப்பு அம்சங்கள் சேர்க்கப்பட்டுள்ளதால், முந்தைய மாடலை விட இதன் விலை சற்று அதிகமாகவே நிர்ணயிக்கப்பட வாய்ப்புள்ளது. மார்ச் மாதம் வெளியாகும் அதிகாரப்பூர்வ விலை அறிவிப்பே, இந்திய பிரீமியம் அட்வென்ச்சர் பிரிவில் இந்த பைக் ஏற்படுத்தப்போகும் தாக்கத்தைத் தீர்மானிக்கும்.
