Mahindra New SUV: டாடா பஞ்ச்சுக்கு போட்டியாக வரும் பேபி ஸ்கார்பியோ... மஹிந்திராவின் மாஸ் சம்பவம்

Mahindra new compact SUV : மஹிந்திராவின் புதிய காம்பாக்ட் எஸ்யூவி மீண்டும் சோதனை ஓட்டத்தில் சிக்கியுள்ளது. பாக்ஸ் போன்ற வடிவமைப்பு, டெயில்கேட்டில் ஸ்பேர் வீல் இருப்பதால், இது 'பேபி ஸ்கார்பியோ N' ஆக இருக்கலாம் எனப் பேசப்படுகிறது.

Mahindra new compact SUV

இந்தியாவின் எஸ்யூவி மார்க்கெட்டில் தனது இடத்தைத் தொடர்ந்து வலுப்படுத்த மஹிந்திரா நிறுவனம் தீவிரம் காட்டி வருகிறது. ஏற்கனவே உள்ள மாடல்களுக்கு ஃபேஸ்லிஃப்ட் கொடுப்பது ஒருபக்கம் இருந்தாலும், புத்தம் புதிய எஸ்யூவி-க்களையும் களமிறக்கத் தயாராகி வருகிறது. அந்த வகையில், மஹிந்திராவின் புதிய காம்பாக்ட் எஸ்யூவி ஒன்று மீண்டும் சோதனை ஓட்டத்தில் கேமராவில் சிக்கியுள்ளது.

இந்த புதிய மாடல், 2025 ஆகஸ்டில் மஹிந்திரா அறிமுகப்படுத்திய 'விஷன் S' கான்செப்ட்டை அடிப்படையாகக் கொண்டது என்று கூறப்படுகிறது. நிறுவனத்தின் புதிய NU_IQ ஆர்க்கிடெக்சரில் உருவாக்கப்படும் இந்த காரின் தயாரிப்பு மாடல்கள் 2027-ம் ஆண்டு முதல் சந்தைக்கு வரும் என எதிர்பார்க்கப்படுகிறது.

பாக்ஸ் டிசைனுடன் புதிய எஸ்யூவி

சோதனை ஓட்டத்தில் எடுக்கப்பட்ட படங்களைப் பார்க்கும்போது, இந்த காரின் அடிப்படை வடிவமைப்பு தெளிவாகத் தெரிகிறது. நேராக நிமிர்ந்து நிற்கும் முன்பக்கம், உயரமான பானெட், சதுரமான டிசைன் மற்றும் செங்குத்தான ஸ்லாட்களைக் கொண்ட கிரில் என இதன் தோற்றம் அமைந்துள்ளது. பெரிய வீல் ஆர்ச்சுகள் மற்றும் உயரமான கிளாஸ் ஏரியா, இந்த காருக்கு ஒரு கெத்தான எஸ்யூவி லுக்கைக் கொடுக்கிறது. அதே சமயம், கான்செப்ட் மாடலில் இருந்த சில மிகையான டிசைன்கள், இந்த தயாரிப்பு மாடலில் எளிமையாக்கப்பட்டுள்ளன.

பின்னால் ஸ்பேர் வீல்; ஸ்கார்பியோ சாயலா?

இந்த புதிய எஸ்யூவியின் பின்பக்கத்தில்தான் பலரின் கவனத்தையும் ஈர்க்கும் விஷயம் உள்ளது. டெயில்கேட்டில் முழு அளவு ஸ்பேர் வீல் பொருத்தப்பட்டுள்ளது. இது காருக்கு இன்னும் ரக்கட் ஆன தோற்றத்தைக் கொடுக்கிறது. கிட்டத்தட்ட நேராக இருக்கும் பின்பக்கக் கண்ணாடிக்கு இருபுறமும், மெல்லிய செங்குத்தான டெயில் லேம்ப்கள் கொடுக்கப்பட்டுள்ளன. சதுரமான டெயில்கேட்டும், சிறிய பின்பக்க ஓவர்ஹேங்கும் இது ஒரு காம்பாக்ட் கார் என்பதை உறுதி செய்கிறது. இந்த டிசைன் அம்சங்களால்தான், இதை 'பேபி ஸ்கார்பியோ N' என்று பலரும் அழைக்கத் தொடங்கியுள்ளனர்.

புது எஸ்யூவி

கிடைத்திருக்கும் தகவல்களின்படி, இது நான்கு மீட்டருக்கும் குறைவான நீளம் கொண்ட ஒரு காம்பாக்ட் எஸ்யூவியாக இருக்கும். இதன் வீல்பேஸ் சுமார் 2,665 மில்லிமீட்டர் இருக்கலாம் என்றும் கூறப்படுகிறது. NU_IQ ஆர்க்கிடெக்சர், ஃபிரன்ட்-வீல்-டிரைவ் மற்றும் ஆல்-வீல்-டிரைவ் என இரண்டு சிஸ்டம்களுக்கும் ஏற்றவாறு வடிவமைக்கப்பட்டுள்ளது. மேலும், வலது மற்றும் இடது புற டிரைவிங் நாடுகளுக்கும் ஏற்ற வகையில் இதை மாற்றியமைக்க முடியும்.

டீசல் இன்ஜின் மற்றும் மேனுவல் கியர்பாக்ஸ்?

சோதனை ஓட்டத்தில் உள்ள காரில் டீசல் இன்ஜின் மற்றும் மேனுவல் கியர்பாக்ஸ் பொருத்தப்பட்டிருக்கலாம் எனத் தெரிகிறது. இந்த கார், XUV 3XO மாடலுடன் பல பாகங்களைப் பகிர்ந்து கொள்ளும் என்பதால், மஹிந்திராவின் தற்போதைய பவர்டிரெய்ன் ஆப்ஷன்கள் இதிலும் இடம்பெற வாய்ப்புள்ளது. இந்த புதிய ஆர்க்கிடெக்சர் பெட்ரோல், ஹைப்ரிட், எலக்ட்ரிக் எனப் பலதரப்பட்ட பவர்டிரெய்ன்களை ஏற்கும் வகையில் உருவாக்கப்பட்டுள்ளதால், எதிர்காலத்தில் இந்த பிளாட்ஃபார்மில் எலக்ட்ரிக் மாடல்களையும் மஹிந்திரா அறிமுகப்படுத்தலாம்.

'பேபி ஸ்கார்பியோ N' வருமா?

விஷன் S கான்செப்ட்டில் காட்டப்பட்ட உயரமான பானெட், சதுர வடிவ வீல் ஆர்ச்சுகள், வலுவான பாடி கிளாடிங், நிமிர்ந்த ஸ்டைல் போன்ற முக்கிய டிசைன் அம்சங்கள் இந்த தயாரிப்பு மாடலிலும் தக்கவைக்கப்பட்டுள்ளன. அதே நேரத்தில், புரொஜெக்டர் ஹெட்லேம்ப்ஸ், முன்பக்க கேமரா போன்ற நவீன அம்சங்களும் சோதனை வாகனத்தில் காணப்படுகின்றன. இறுதி வடிவம் எப்படி இருக்கும் என்பதை மஹிந்திரா அதிகாரப்பூர்வமாக அறிவிக்கவில்லை என்றாலும், இந்த புதிய காம்பாக்ட் எஸ்யூவி, நிறுவனத்தின் எஸ்யூவி வரிசையில் ஒரு முக்கிய மாடலாக அமையும் என எதிர்பார்க்கப்படுகிறது.