இ-ஸ்பிரிண்டோ ஜி1 vs எனிக்மா ஜிடி 450: ரூ.90,000 விலைக்குள் சிறந்த எலக்ட்ரிக் ஸ்கூட்டர் எது?

ரூ.90,000 விலையில் சிறந்த எலக்ட்ரிக் ஸ்கூட்டர் எது? இ-ஸ்பிரிண்டோ ஜி1 மற்றும் எனிக்மா ஜிடி 450 புரோ ஸ்கூட்டர்களின் விலை, மைலேஜ் மற்றும் அம்சங்கள் பற்றிய முழு ஒப்பீடு இதோ.

ரூ.90,000 விலைக்குள் சிறந்த எலக்ட்ரிக் ஸ்கூட்டர்கள்

இந்திய இருசக்கர வாகனச் சந்தையில் பட்ஜெட் விலையில் தினசரிப் பயன்பாட்டிற்கு ஏற்ற எலக்ட்ரிக் ஸ்கூட்டர்களுக்கான தேவை அதிகரித்து வரும் நிலையில், இ-ஸ்பிரிண்டோ ஜி1 (e-Sprinto G1) மற்றும் எனிக்மா ஜிடி 450 புரோ (Enigma GT 450 Pro) ஆகிய 2 எலக்ட்ரிக் ஸ்கூட்டர்களைப் பற்றிப் பார்ப்போம். நடுத்தரக் குடும்பங்கள் தினசரி அலுவலகம் செல்வதற்கும், கடைத்தெருப் பயன்பாடுகளுக்கும் ஏற்ற வகையில் உருவாக்கப்பட்டுள்ள இந்த 2 ஸ்கூட்டர்களின் விலை, மைலேஜ், பேட்டரி திறன், சார்ஜிங் நேரம் மற்றும் சிறப்பம்சங்கள் பற்றி விரிவாக பார்ப்போம்.

1. இ-ஸ்பிரிண்டோ ஜி1 (e-Sprinto G1)

குடும்பப் பயன்பாடு, அதிக இடவசதி மற்றும் பட்ஜெட்டிற்கு ஏற்ப பேட்டரியைத் தேர்ந்தெடுக்கும் வசதியை விரும்பும் எளிய மக்களுக்கான சிறந்த தேர்வாக இ-ஸ்பிரிண்டோ ஜி1 விளங்குகிறது. கடந்த அக்டோபர் 2026-ல் அறிமுகப்படுத்தப்பட்ட இந்த ஸ்கூட்டரில் 2.0 kWh, 2.5 kWh மற்றும் 3.0 kWh என3 விதமான பேட்டரி ஆப்ஷன்கள் வழங்கப்படுகின்றன.

மைலேஜ் - இதன் அடிப்படை மாடல் ஒரு முழு சார்ஜில் 80 கி.மீ மைலேஜும், நடுத்தர மாடல் 100 கி.மீ மைலேஜும், பெரிய பேட்டரி கொண்ட டாப் மாடல் அதிகபட்சமாக 130 கி.மீ மைலேஜும் தரும் எனச் சான்றளிக்கப்பட்டுள்ளது.

சார்ஜிங் மற்றும் வேகம் - இதன் பேட்டரியை முழுமையாக சார்ஜ் செய்யச் சுமார் 4.5 மணி நேரம் ஆகும். நகர்ப்புறப் பயணத்திற்கு ஏற்றவாறு இதன் அதிகபட்ச வேகம் மணிக்கு 50 கி.மீ ஆகக் கட்டுப்படுத்தப்பட்டுள்ளது.

சிறப்பம்சங்கள் - இதில் 28 லிட்டர் பெரிய சீட் ஸ்டோரேஜ், 165 மிமீ கிரவுண்ட் கிளியரன்ஸ், எல்.இ.டி விளக்குகள், டிஜிட்டல் மீட்டர், ரிவர்ஸ் மோடு மற்றும் யுஎஸ்பி சார்ஜிங் வசதிகள் உள்ளன.

விலை - இதன் ஆரம்ப எக்ஸ்-ஷோரூம் விலை தோராயமாக ரூ. 89,999 முதல் தொடங்குகிறது.

எனிக்மா ஜிடி 450 புரோ (Enigma GT 450 Pro)

வழக்கமான பட்ஜெட் எலக்ட்ரிக் ஸ்கூட்டர்களை விடச் சற்றே கூடுதல் வேகம் மற்றும் சிறந்த பிரேக்கிங் பாதுகாப்பை விரும்பும் தினசரிப் பயணிகளுக்கான மாடல் இதுவாகும்.

பேட்டரி & மைலேஜ் - இதில் 2.4 kWh லித்தியம்-அயன் பேட்டரி பொருத்தப்பட்டு, ஒரு முறை முழுமையாகச் சார்ஜ் செய்தால் சுமார் 120 கி.மீ வரை மைலேஜ் கொடுக்கும் திறன் கொண்டது.

வேகம் மற்றும் சார்ஜிங் - இதன் அதிகபட்ச வேகம் மணிக்கு 60 கி.மீ என்பதால் நகரத்துச் சாலைகளில் சற்று சுறுசுறுப்பாகப் பயணிக்க உதவுகிறது. சாதாரண சார்ஜர் மூலம் இதனை முழுமையாக சார்ஜ் செய்ய 5 முதல் 7 மணி நேரம் வரை ஆகும், ஆனால் 10-ஆம்ப் ஃபாஸ்ட் சார்ஜர் பயன்படுத்தினால் 3.5 மணி நேரத்திலேயே சார்ஜ் செய்துவிடலாம்.

பாதுகாப்பு & அம்சங்கள் - இதில் கூடுதல் பாதுகாப்பிற்காக முன்பக்க டிஸ்க் பிரேக், பின்பக்க டிரம் பிரேக், பின்னால் அமர்பவருக்கு பேக்ரெஸ்ட் (Backrest) வசதி, யுஎஸ்பி சார்ஜிங் மற்றும் சைடு-ஸ்டாண்ட் சென்சார் போன்ற அம்சங்கள் கொடுக்கப்பட்டுள்ளன.

விலை - இதன் ஆரம்ப எக்ஸ்-ஷோரூம் விலை தோராயமாக ரூ. 86,902 ஆக நிர்ணயிக்கப்பட்டுள்ளது.

விலை & பேட்டரி ஒப்பீடு

ஆரம்ப விலையைப் பொறுத்தவரை எனிக்மா ஜிடி 450 புரோ ரூ. 86,902 என்ற விலையில் கிடைப்பதால், இ-ஸ்பிரிண்டோ ஜி1 மாடலை விடச் சுமார் ரூ. 3,097 வரை விலை குறைவாக உள்ளது. ஆனால் இ-ஸ்பிரிண்டோ ஜி1 மூன்று விதமான பேட்டரி தேர்வுகளை வழங்குவதால், அதிக தூரம் பயணிப்பவர்கள் 3.0 kWh பெரிய பேட்டரியைத் தேர்ந்தெடுத்து 130 கி.மீ வரை மைலேஜ் பெற முடியும்.

வேகம் மற்றும் பிரேக்கிங் விஷயத்தில் எனிக்மா ஜிடி 450 புரோ தனது 60 கி.மீ டாப் ஸ்பீடு மற்றும் முன்பக்க டிஸ்க் பிரேக் மூலம் முன்னிலையில் நிற்கிறது. அதே சமயம் இ-ஸ்பிரிண்டோ ஜி1 தனது 28 லிட்டர் பெரிய பூட் ஸ்பேஸ், தட்டையான கால் வைக்கும் இடம் மற்றும் பேட்டரி தேர்வுகள் மூலம் குடும்பப் பயன்பாட்டிற்கு மிகவும் ஏற்றதாக உள்ளது.

குறைந்த விலையில் சற்று கூடுதல் வேகம் மற்றும் டிஸ்க் பிரேக் வேண்டும் என்பவர்கள் எனிக்மா ஜிடி 450 புரோ மாடலையும், குடும்பத்துடன் பொருட்களை வைத்து ஓட்டுவதற்கு அதிக இடவசதியும் பேட்டரி ஆப்ஷன்களும் வேண்டும் என்பவர்கள் இ-ஸ்பிரிண்டோ ஜி1 மாடலையும் தேர்ந்தெடுக்கலாம்.