Bike Insurance: பைக் டேமேஜ் ஆகிடுச்சா? இன்ஷூரன்ஸ் பணத்தை உடனே பெற இந்த 5 விஷயங்களை செய்யுங்க!

Bike Insurance: உங்கள் பைக் டேமேஜ் ஆகிடுச்சா? கவலை வேண்டாம். இதற்கான இன்ஷூரன்ஸ் பணத்தை உடனே கிளைம் செய்வது எப்படி? அதற்கான நடைமுறை என்ன? என்பது குறித்து இந்த செய்தியில் பார்க்கலாம். 

ஓன்-டேமேஜ் பைக் இன்ஷூரன்ஸ்

ஓன்-டேமேஜ் பைக் இன்ஷூரன்ஸ், அதன் பெயருக்கு ஏற்றபடியே, விபத்து, இயற்கை சீற்றங்கள், திருட்டு அல்லது தீ விபத்து போன்றவற்றால் உங்கள் பைக்கிற்கு ஏற்படும் சேதங்களுக்கான ஒரு காப்பீட்டுத் திட்டமாகும். உங்களிடம் தேர்டு-பார்ட்டி இன்ஷூரன்ஸ் மட்டும் இருந்தால், அதனுடன் இந்த ஓன்-டேமேஜ் கவரேஜையும் சேர்த்து வாங்கிக்கொண்டால், உங்கள் பைக்கிற்கு ஏற்படும் இழப்புகளையும் ஈடுசெய்யலாம். ஓன்-டேமேஜ் பைக் இன்ஷூரன்ஸை க்ளைம் செய்யும் நடைமுறை பற்றி விரிவாகப் பார்ப்போம்.

ஓன் டேமேஜ் பைக் இன்ஷூரன்ஸ் க்ளைம் செய்வதற்கான வழிமுறைகள் என்ன?

உங்கள் இன்ஷூரன்ஸ் நிறுவனத்திற்கு தகவல் தெரிவியுங்கள்

விபத்து நடந்தவுடன் நீங்கள் செய்ய வேண்டிய முதல் வேலை, உங்கள் இன்ஷூரன்ஸ் நிறுவனத்திற்கு உடனடியாகத் தகவல் கொடுப்பதுதான். இன்ஷூரன்ஸ் நிறுவனத்தின் நடைமுறைகளைப் பொறுத்து, அவர்களின் டோல்-ஃப்ரீ ஹெல்ப்லைன் எண், வெப்சைட் க்ளைம் போர்டல், மொபைல் ஆப் அல்லது இமெயில் மூலம் நீங்கள் அவர்களைத் தொடர்புகொள்ளலாம்.

விரைவாகத் தகவல் கொடுத்தால், க்ளைம் நடவடிக்கை உடனடியாகத் தொடங்கும். இப்போதெல்லாம் டிஜிட்டல் க்ளைம் முறை வந்ததால், இந்த முழு செயல்பாட்டு முறையும் மிகவும் சுலபமாகவும், சிக்கல் இல்லாமலும் இருக்கிறது. அதனால், முதலில் உங்கள் இன்ஷூரன்ஸ் நிறுவனத்தைத் தொடர்புகொண்டு, உங்கள் பாலிசி விவரங்களையும், க்ளைம் செய்யக் காரணமான சம்பவத்தின் விவரங்களையும் கொடுங்கள்.

FIR பதிவு செய்யுங்கள்

திருட்டு அல்லது மூன்றாம் நபர்கள் சம்பந்தப்பட்ட பெரிய விபத்துகள், அதிக நிதி இழப்புகளை ஏற்படுத்தியிருந்தால், பாலிசிதாரர்கள் அதிகாரப்பூர்வ பதிவுக்காக FIR பதிவு செய்ய வேண்டும். நீங்கள் காவல் நிலையத்திற்குச் சென்று முதல் தகவல் அறிக்கை (FIR) பதிவு செய்ய வேண்டும்.

க்ளைம் ஃபார்மை நிரப்புங்கள்

இன்ஷூரன்ஸ் நிறுவனத்திற்குத் தகவல் தெரிவித்த பிறகு, க்ளைம் ஃபார்மை நிரப்பி, ஓட்டுநர் உரிமம், இன்ஷூரன்ஸ் பாலிசியின் நகல், RC (பதிவுச் சான்றிதழ்), சேதமடைந்த பாகங்களின் புகைப்படங்கள், கேரேஜிலிருந்து பெறப்பட்ட பழுதுபார்ப்பு மதிப்பீடுகள் போன்ற ஆவணங்களைச் சமர்ப்பிக்க வேண்டும். தேவையான அனைத்து தகவல்களையும் சரியாகக் கொடுத்தால், க்ளைம் விரைவாக அங்கீகரிக்கப்படும்.

உங்கள் வாகனம் ஆய்வு செய்யப்படும்

உங்கள் ஓன்-டேமேஜ் பைக் இன்ஷூரன்ஸ் க்ளைம் பதிவு செய்யப்பட்ட பிறகு, இன்ஷூரன்ஸ் நிறுவனம் உங்கள் சேதமடைந்த வாகனத்தை ஆய்வு செய்ய ஒரு சர்வேயரை அனுப்பும். அந்த சர்வேயர், சேதத்திற்கான காரணம் மற்றும் அளவை மதிப்பிட்டு, பழுதுபார்ப்புச் செலவுகளைக் கணக்கிட்டு, சரிபார்ப்பின் அடிப்படையில் உங்கள் க்ளைமை அங்கீகரிப்பார்.

க்ளைம் செட்டில்மென்ட்

க்ளைம் அங்கீகரிக்கப்பட்ட பிறகு, நெட்வொர்க் கேரேஜில் பைக்கை சரிசெய்து கேஷ்லெஸ் க்ளைம் பெறலாம் அல்லது நீங்களே பழுதுபார்ப்புக்கான பணத்தைச் செலுத்திவிட்டு, ரீபேமெண்ட் க்ளைம் செய்துகொள்ளலாம். நீங்கள் நெட்வொர்க் கேரேஜில் சரிசெய்யும் ஆப்ஷனைத் தேர்ந்தெடுத்தால், இன்ஷூரன்ஸ் நிறுவனம் க்ளைம் தொகையை நேரடியாக கேரேஜுக்குச் செலுத்திவிடும். இதனால் உங்களுக்கு எந்தவிதமான நிதிச் சுமையும் இருக்காது.

ஓன்-டேமேஜ் பைக் இன்ஷூரன்ஸ் க்ளைம் செய்ய சரியான சந்தர்ப்பங்கள் எவை?

* உங்கள் பைக் விபத்தில் சேதமடைந்து, பழுதுபார்க்க வேண்டிய நிலை ஏற்பட்டால்.

* தீ அல்லது வெடிவிபத்து காரணமாக உங்கள் பைக் சேதமடைந்தால்.

* உங்கள் டூ-வீலர் கலவரங்களால் சேதப்படுத்தப்பட்டால்.

* நிலநடுக்கம், சூறாவளி அல்லது வெள்ளம் போன்ற இயற்கை சீற்றங்களால் உங்கள் வாகனம் சேதமடைந்தால்.

* உங்கள் பைக் திருடு போனால்.

நீங்களே சேதம் ஏற்படுத்தினால் கிடையாது

ஒட்டுமொத்தத்தில் அன்றாட தேய்மானம் அல்லது நீங்களே வேண்டுமென்றே ஏற்படுத்தும் சேதங்களைத் தவிர, உங்கள் வாகனத்தில் திடீரென ஏதேனும் சேதம் ஏற்பட்டால், ஓன்-டேமேஜ் பைக் இன்ஷூரன்ஸ் பாலிசியை நீங்கள் க்ளைம் செய்யலாம். க்ளைம் அங்கீகரிக்கும் முறை சுமூகமாக‌ நடக்க, க்ளைம் செய்யும்போது இந்த வழிமுறைகளை கவனமாகப் பின்பற்றுவதை உறுதிப்படுத்திக் கொள்ளுங்கள்.