27 Nakshatras in astrology: அஸ்வினி முதல் ரேவதி வரை..27 நட்சத்திரங்களின் முக்கிய குணங்கள் என்ன?

27 Nakshatras: அஸ்வினி முதல் ரேவதி வரை 27 நட்சத்திரங்களுக்கும் தனித்தனி குணங்கள் இருப்பதாக ஜோதிடத்தில் கூறப்படுகிறது. உங்கள் நட்சத்திரத்தின் முக்கிய குணம் என்ன? அதிபதி கிரகம் எது? பிறந்த நட்சத்திரம் சொல்லும் குணாதிசயங்களை தெரிந்துகொள்ளுங்கள்.

27 நட்சத்திரங்கள்

ஜோதிடத்தில் ஒருவரின் ராசியைப் போலவே ஜென்ம நட்சத்திரமும் முக்கியமானதாகக் கருதப்படுகிறது. ஒருவர் பிறந்த நேரத்தில் சந்திரன் எந்த நட்சத்திரப் பகுதியில் சஞ்சரித்துக் கொண்டிருந்தாரோ, அதுவே அவரது ஜென்ம நட்சத்திரமாகக் கணிக்கப்படுகிறது.

வேத ஜோதிட முறையில் ராசி மண்டலம் 27 நட்சத்திரங்களாகப் பிரிக்கப்பட்டுள்ளது. ஒவ்வொரு நட்சத்திரமும் நான்கு பாதங்களாகப் பிரிக்கப்படுவதால் மொத்தம் 108 நட்சத்திர பாதங்கள் உள்ளன. ஒவ்வொரு நட்சத்திரத்திற்கும் தனித்தனி அதிபதி கிரகம், தெய்வம், குறியீடு மற்றும் பாரம்பரிய குணாதிசயங்கள் கூறப்படுகின்றன.

27 நட்சத்திரங்களின் முக்கிய குணங்கள் என்ன?

1. அஸ்வினி

அதிபதி: கேது

அஸ்வினி நட்சத்திரத்தில் பிறந்தவர்கள் வேகம், சுறுசுறுப்பு, துணிச்சல் மற்றும் புதிய முயற்சிகளில் ஆர்வம் கொண்டவர்களாக ஜோதிடத்தில் கூறப்படுகிறார்கள். ஒரு விஷயத்தை செய்ய வேண்டும் என்று முடிவு செய்துவிட்டால், அதிகம் யோசித்து காலம் கடத்தாமல் உடனே களத்தில் இறங்கிவிடுவார்கள்.

புதிய தொடக்கங்கள், சுறுசுறுப்பு, சுதந்திரமான செயல்பாடு மற்றும் குணப்படுத்துதல் போன்ற அம்சங்களுடன் அஸ்வினி நட்சத்திரம் தொடர்புபடுத்தப்படுகிறது. மற்றவர்களின் கட்டுப்பாட்டில் இருப்பதைவிட தங்களுக்கான பாதையைத் தாங்களே உருவாக்கிக் கொள்ள விரும்புவதும் இவர்களின் முக்கிய குணமாகக் கூறப்படுகிறது. அதே வேகம் சில நேரங்களில் அவசர முடிவுகளுக்கும் வழிவகுக்கலாம்.

2. பரணி

அதிபதி: சுக்கிரன்

பொறுப்பு, சகிப்புத்தன்மை, படைப்பாற்றல் மற்றும் மாற்றங்களை ஏற்றுக்கொள்ளும் திறன் ஆகியவை பரணி நட்சத்திரத்துடன் தொடர்புடையவை. எவ்வளவு சிரமம் வந்தாலும் ஒரு விஷயத்தை முடித்துவிட வேண்டும் என்ற மனஉறுதி இவர்களிடம் அதிகமாக இருக்கும் என ஜோதிடத்தில் குறிப்பிடப்படுகிறது.

3.கார்த்திகை

அதிபதி: சூரியன்

கார்த்திகை நட்சத்திரத்தில் பிறந்தவர்கள் தைரியம், ஒழுக்கம், தெளிவான முடிவெடுக்கும் திறன் கொண்டவர்களாக ஜோதிடத்தில் கூறப்படுகிறார்கள். மனதில் பட்டதை நேரடியாகப் பேசும் இவர்கள், தவறுகளை தயக்கமின்றி சுட்டிக்காட்டும் குணத்தையும் கொண்டிருப்பார்கள்.

4. ரோகிணி

அதிபதி: சந்திரன்

ரோகிணி நட்சத்திரத்தில் பிறந்தவர்கள் அழகுணர்வு, கலை ரசனை, படைப்பாற்றல் மற்றும் குடும்பத்தின் மீது அக்கறை கொண்டவர்களாக ஜோதிடத்தில் கூறப்படுகிறார்கள். செழிப்பான, வசதியான வாழ்க்கையை உருவாக்கிக் கொள்ள வேண்டும் என்ற விருப்பமும் இவர்களிடம் அதிகமாக இருக்கும்.

5. மிருகசீரிடம்

அதிபதி: செவ்வாய்

இந்த நட்சத்திரத்தில் பிறந்தவர்கள் புதிய விஷயங்களைத் தேடித் தெரிந்துகொள்வது, கற்றுக்கொள்வது, ஆராய்ச்சி செய்வது போன்றவற்றில் அதிக ஆர்வம் கொண்டவர்களாகக் இருப்பார்கள். புதிய இடங்களைப் பார்ப்பதிலும் விருப்பம் இருக்கும். அதே நேரத்தில் சில சமயங்களில் மன அமைதியின்மையும் ஏற்படலாம்.

திருவாதிரை முதல் மகம் வரை

6. திருவாதிரை

அதிபதி: ராகு

திருவாதிரை நட்சத்திரத்தில் பிறந்தவர்கள் மாற்றங்களை எதிர்கொள்ளும் துணிவு, ஆழமான சிந்தனை மற்றும் மீண்டு வரும் மனப்பக்குவம் கொண்டவர்களாக ஜோதிடத்தில் கூறப்படுகிறார்கள். சவால்களிலிருந்து பாடம் கற்று, புதிய அனுபவங்களுடன் முன்னேறும் தன்மையும் இவர்களிடம் காணப்படும்.

7. புனர்பூசம்

அதிபதி: குரு

புனர்பூசம் நட்சத்திரத்தில் பிறந்தவர்கள் நம்பிக்கை, நேர்மறை சிந்தனை மற்றும் மீண்டு எழும் மனப்பக்குவம் கொண்டவர்களாக ஜோதிடத்தில் கூறப்படுகிறார்கள். தோல்வி வந்தாலும் தளராமல் மீண்டும் முயற்சிப்பதுடன், பிறருக்கு உதவும் எண்ணமும் ஆன்மிக நாட்டமும் இவர்களிடம் காணப்படும்.

8. பூசம்

அதிபதி: சனி

பூசம் நட்சத்திரத்தில் பிறந்தவர்கள் பொறுப்பு, ஒழுக்கம் மற்றும் குடும்பத்தின் மீது அக்கறை கொண்டவர்களாக இருப்பார்கள். பிறரைப் பாதுகாத்து வழிநடத்துவதுடன், தங்களது கடமைகளை முறையாக நிறைவேற்றுவதிலும் உறுதியாக இருப்பார்கள்.

9. ஆயில்யம்

அதிபதி: புதன்

ஆயில்யம் நட்சத்திரத்தில் பிறந்தவர்கள் ஆழமான சிந்தனை, நுட்பமான அறிவு மற்றும் கூர்ந்த கவனிப்பு கொண்டவர்களாக ஜோதிடத்தில் கூறப்படுகிறார்கள். சூழ்நிலைகளை விரைவாகப் புரிந்துகொள்ளும் இவர்கள், தங்களது எண்ணங்களை எளிதில் வெளிப்படுத்தாமல் மனதிற்குள் வைத்துக்கொள்ளும் இயல்பும் கொண்டிருப்பார்கள்.

10. மகம்

அதிபதி: கேது

மகம் நட்சத்திரத்தில் பிறந்தவர்கள் பாரம்பரியம், குடும்பப் பெருமை, மரியாதை மற்றும் தலைமைப் பண்பு கொண்டவர்களாக ஜோதிடத்தில் கூறப்படுகிறார்கள். முன்னோர்களை மதிக்கும் இவர்கள், பொறுப்புகளை ஏற்று மற்றவர்களை வழிநடத்த விரும்பும் தன்மையையும் கொண்டிருப்பார்கள்.

பூரம் முதல் விசாகம் வரை

11. பூரம்

அதிபதி: சுக்கிரன்

பூரம் நட்சத்திரத்தில் பிறந்தவர்கள் அன்பு, கலை ரசனை, அழகுணர்வு மற்றும் மகிழ்ச்சியான வாழ்க்கையை விரும்பும் தன்மை கொண்டவர்களாக ஜோதிடத்தில் கூறப்படுகிறார்கள். நண்பர்கள், உறவுகளுடன் நேரம் செலவிடுவதிலும் கலை மற்றும் பொழுதுபோக்கிலும் அதிக ஆர்வம் காட்டலாம்.

12. உத்திரம்

அதிபதி: சூரியன்

உத்திரம் நட்சத்திரத்தில் பிறந்தவர்கள் பொறுப்புணர்வு, நேர்மை, உறவுகளை மதிக்கும் குணம் மற்றும் தலைமைப் பண்பு கொண்டவர்களாக ஜோதிடத்தில் கூறப்படுகிறார்கள். கொடுத்த வாக்குறுதியைக் காப்பாற்றவும், எடுத்த பொறுப்பை சிறப்பாக நிறைவேற்றவும் முயற்சிப்பார்கள்.

13. ஹஸ்தம்

அதிபதி: சந்திரன்

ஹஸ்தம் நட்சத்திரத்தில் பிறந்தவர்கள் கைத்திறன், புத்திசாலித்தனம் மற்றும் காரியங்களை திறமையாக முடிக்கும் ஆற்றல் கொண்டவர்களாக ஜோதிடத்தில் கூறப்படுகிறார்கள். கலை, கைவினை மற்றும் நுணுக்கமான பணிகளில் இவர்களின் திறமை சிறப்பாக வெளிப்படலாம்.

14. சித்திரை

அதிபதி: செவ்வாய்

சித்திரை நட்சத்திரத்தில் பிறந்தவர்கள் அழகுணர்வு, படைப்பாற்றல் மற்றும் தனித்துவமான சிந்தனை கொண்டவர்களாக ஜோதிடத்தில் கூறப்படுகிறார்கள். மற்றவர்களிடமிருந்து வித்தியாசமாக செயல்பட விரும்பும் இவர்கள், கலை, கட்டிடக்கலை மற்றும் வடிவமைப்பில் ஆர்வம் காட்டலாம்.

15. சுவாதி

அதிபதி: ராகு

சுவாதி நட்சத்திரத்தில் பிறந்தவர்கள் சுதந்திரம், தனித்துவம் மற்றும் புதிய முயற்சிகளில் ஆர்வம் கொண்டவர்களாக இருப்பார்கள். மற்றவர்களை அதிகம் சார்ந்திருக்காமல், தங்களுக்கென தனிப்பாதையை உருவாக்கி முன்னேற விரும்புவார்கள்.

16. விசாகம்

அதிபதி: குரு

விசாகம் நட்சத்திரத்தில் பிறந்தவர்கள் லட்சியம், விடாமுயற்சி மற்றும் வெற்றி பெறும் ஆர்வம் கொண்டவர்களாக ஜோதிடத்தில் கூறப்படுகிறார்கள். ஒரு இலக்கை நிர்ணயித்துவிட்டால், அதை அடையும் வரை தொடர்ந்து முயற்சிக்கும் குணம் இவர்களிடம் காணப்படும்.

அனுஷம் முதல் உத்திராடம் வரை

17. அனுஷம்

அதிபதி: சனி

அனுஷம் நட்சத்திரத்தில் பிறந்தவர்கள் நட்பு, விசுவாசம், பொறுமை மற்றும் உறவுகளைப் பேணும் குணம் கொண்டவர்களாக ஜோதிடத்தில் கூறப்படுகிறார்கள். ஒருவரை நம்பிவிட்டால் அவருக்குத் துணையாக நிற்பதுடன், கடினமான சூழ்நிலைகளையும் பொறுமையாக எதிர்கொள்வார்கள்.

18. கேட்டை

அதிபதி: புதன்

கேட்டை நட்சத்திரத்தில் பிறந்தவர்கள் புத்திசாலித்தனம், பொறுப்புணர்வு மற்றும் பாதுகாப்பு உணர்வு கொண்டவர்களாக கருதப்படுகின்றனர். அனுபவத்திலிருந்து கற்றுக்கொண்டு முன்னேறும் இவர்கள், குழுவில் முக்கிய பொறுப்புகளை ஏற்று திறமையாகச் செயல்படக்கூடியவர்களாக இருப்பார்கள்.

19. மூலம்

அதிபதி: கேது

மூலம் நட்சத்திரத்தில் பிறந்தவர்கள் ஆழமான தேடல், ஆராய்ச்சி மற்றும் உண்மையை அறியும் ஆர்வம் கொண்டவர்களாக ஜோதிடத்தில் கூறப்படுகிறார்கள். ஒரு விஷயத்தின் அடிப்படைக் காரணத்தை அறிய விரும்பும் இவர்கள், ஆன்மிகம் மற்றும் மறைபொருள் சார்ந்த விஷயங்களிலும் ஆர்வம் காட்டலாம்.

20. பூராடம்

அதிபதி: சுக்கிரன்

பூராடம் நட்சத்திரத்தில் பிறந்தவர்கள் தன்னம்பிக்கை, உற்சாகம் மற்றும் உறுதியான மனப்பான்மை கொண்டவர்களாக இருப்பார்கள். ஒரு முடிவை எடுத்துவிட்டால், அதில் உறுதியாக இருந்து இலக்கை அடையும் வரை தொடர்ந்து முயற்சிக்கும் தன்மை இவர்களிடம் காணப்படும்.

21. உத்திராடம்

அதிபதி: சூரியன்

உத்திராடம் நட்சத்திரத்தில் பிறந்தவர்கள் பொறுப்பு, நேர்மை, தலைமைப் பண்பு மற்றும் நிலையான வெற்றியை விரும்பும் குணம் கொண்டவர்களாக இருப்பார்கள். மெதுவாக முன்னேறினாலும், உறுதியான இடத்தை அடைய தொடர்ந்து முயற்சிப்பார்கள்.

திருவோணம் முதல் ரேவதி வரை

22. திருவோணம்

அதிபதி: சந்திரன்

திருவோணம் நட்சத்திரத்தில் பிறந்தவர்கள் அறிவைப் பெறுதல், கற்றுக்கொள்ளுதல் மற்றும் அதை மற்றவர்களுடன் பகிர்தல் போன்றவற்றில் ஆர்வம் கொண்டவர்களாக இருப்பார்கள். கல்வி, தகவல் தொடர்பு மற்றும் ஆலோசனை வழங்குவதிலும் திறமை காட்டலாம்.

23. அவிட்டம்

அதிபதி: செவ்வாய்

அவிட்டம் நட்சத்திரத்தில் பிறந்தவர்கள் ஆற்றல், செயல்திறன், இசை உணர்வு மற்றும் குழுவுடன் இணைந்து செயல்படும் திறன் கொண்டவர்களாக இருப்பார்கள். சாதிக்க வேண்டும் என்ற ஆர்வத்துடன், சமூகத்தில் தங்களுக்கென தனி இடத்தை உருவாக்க விரும்புவார்கள்.

24. சதயம்

அதிபதி: ராகு

சதயம் நட்சத்திரத்தில் பிறந்தவர்கள் ஆராய்ச்சி, புதுமை மற்றும் சுதந்திர சிந்தனை கொண்டவர்களாக இருப்பார்கள். மர்மங்களை அறிந்துகொள்ள ஆர்வம் காட்டும் இவர்கள், வழக்கமான பாதையைவிட வித்தியாசமாகச் சிந்தித்து செயல்பட விரும்புவார்கள்.

25. பூரட்டாதி

அதிபதி: குரு

பூரட்டாதி நட்சத்திரத்தில் பிறந்தவர்கள் ஆழமான சிந்தனை, கொள்கைப் பிடிப்பு மற்றும் ஆன்மிக நாட்டம் கொண்டவர்களாக ஜோதிடத்தில் கூறப்படுகிறார்கள். வாழ்க்கையின் ஆழமான அர்த்தத்தைத் தேடுவதிலும், தங்களது கொள்கைகளில் உறுதியாக இருப்பதிலும் ஆர்வம் காட்டலாம்.

26. உத்திரட்டாதி

அதிபதி: சனி

உத்திரட்டாதி நட்சத்திரத்தில் பிறந்தவர்கள் பொறுமை, அமைதி, முதிர்ச்சி மற்றும் ஆழமான சிந்தனை கொண்டவர்களாக இருப்பார்கள். அவசரப்படாமல் சூழ்நிலையை நிதானமாக ஆராய்ந்து முடிவெடுக்கும் தன்மை இவர்களிடம் காணப்படும்.

27. ரேவதி

அதிபதி: புதன்

27 நட்சத்திரங்களில் கடைசி நட்சத்திரமான ரேவதி நட்சத்திரத்தில் பிறந்தவர்கள் கருணை, மென்மையான பேச்சு, படைப்பாற்றல் மற்றும் பிறருக்கு உதவும் குணம் கொண்டவர்களாக ஜோதிடத்தில் கூறப்படுகிறார்கள். மற்றவர்களை வழிநடத்துவதிலும், ஆதரவாக இருப்பதிலும் ஆர்வம் காட்டலாம்.

நட்சத்திரம் மட்டும் ஒருவரின் குணத்தைத் தீர்மானிக்குமா?

ஒருவரின் நட்சத்திரத்தை மட்டும் வைத்து அவரது முழுமையான குணம் அல்லது வாழ்க்கைப் பலனைத் தீர்மானிக்க முடியாது. ஜோதிட முறையில் நட்சத்திரத்தின் நான்கு பாதங்கள், சந்திரன் இருக்கும் ராசி, லக்னம், கிரகங்களின் நிலை, பார்வை, சேர்க்கை மற்றும் தசா - புக்தி உள்ளிட்ட பல அம்சங்களையும் சேர்த்தே தனிப்பட்ட ஜாதகப் பலன்கள் கணிக்கப்படுகின்றன.

குறிப்பு: மேலே கொடுக்கப்பட்டுள்ள குணாதிசயங்கள் பாரம்பரிய ஜோதிட விளக்கங்களின் அடிப்படையிலான பொதுவான நம்பிக்கைகள். இவற்றை அறிவியல் ரீதியாக நிரூபிக்கப்பட்ட தனிநபர் குண மதிப்பீடாக எடுத்துக்கொள்ளக் கூடாது.